Harei ini 9/4, Quoc hoi pang pathau khan, harak pasang iek saong ginum biai tui kapol nyaom ka dom Hukum; biar harei, Quoc hoi pang Harak pathau khan ka bruk taong yaom ka jalan ba ngak brei patagok kinh te - xa hoi saong kadung jien karja thun 2025;  bruk patagok kinh te - xa hoi saong kadung jien dom bilan kaok thun 2026; harak Jalan ngak brei patagok kinh te - xa hoi 5 thun 2026 -2030. Gah langiu nyaom biai Quoc hoi, dom urang lambaok vakil khan lac, bruk patagok GDP kuhria rah tapa labaih 10% dalam sa thun lac bruk kham ngak hu meng thun 2026-2031, min dom jalan kan kandah haong Rajaei  dalam tukvak anak tal, khin brei pambuak sumu, kuhria tui dom jalan ngak.

UB bhap bini tinh An Giang birau taduan xã Mỹ Hòa Hưng lac xã kaoh pulao di tinh An Giang. Ini lac xa kaoh pulao hu ia taba ka dua di tinh An Giang hu taduan  hadei xã kaoh pulao Cù Lao Giêng. Mỹ Hòa Hưng lac xã kaoh pulao kreh kraong Hậu, hu taneh  praong jaik 20 km2. Bruk taduan brei angan lac xã kaoh pulao rik tame jhul pakhang bruk cak rok patagok kinh te - xa hoi, yulit pablei salih  jitvu di bhum palei Po negar  dahlau diah lac Tôn Đức Thắng.

Uan raok harei Raya Chol Chnam Thmay, UBMTTQ Viet Nam ban Can Tho peih bruk pataom mbaok dom hoa thuong, thuong toa, baoh sang dalam sarak, urang hu angan je, urang jakar, urang dang saong bhap bini Khmer. Urang ngak praong di Can Tho caong khin dom su sai, acar, urang jakar, urang dang, bol lin bangsa Khmer patui veik bruk jum pataom; peih ngak siam jalan tacei bam sarak di Dang, Karja; kham merat dom bruk pakacah anit ranam taneh ia, padang ngak palei pala birau.   

Meng akaok thun mbiah tal ini, tinh Vĩnh Long hu 19 labik glut jaleih, talah ar kraong ribaong, ar tathik atah 3.250 met, ngak kan kandah tal labaih 47 baoh sang bhap bini.  Kuhria taong abih khat lahik kayua bala labaih 19 ti dong. Tui So Ngak nong saong Alam moi truong Vĩnh Long, Mban Chi huy pacang khik bhap bini di taong abih 124 xa, phuong brei kuhria caga blaoh dahlau dom bruk. Tinh ba tabiak jalan pacang caga  tui bala rah tabiak, hu bol lin, mac jamraih  daong, khik brei salamat ka bhap bini  daok tapen kraong, tapen tathik.

Pambuak tal bruk nan, dom rahra bhap bini daok di xã Biển Bạch, tỉnh Cà Mau kurang ia hacih, Akaok UBND tinh Ca Mau caong khin, Sở Ngak nong saong Alam moi truong samar pasang iek, brei thau ka bruk kurang ia hacih piah pandar di xa Biển Bạch, khan brei thau cambaic laic, jalan pasiam dalam tukvak anak tal. Tui nan brei samar pasang iek bruk pabak ia pandar ka bhum palei pala dalam tinh, ba tabiak jalan langyah, dalam tukvak anak tal, oh caik ka bhap bini kurang ia pandar.

Meng bruk mesruh metak di labik tapen negar thun 2025 caik veik rilo bruk khut tayak biak trak ka drap ar dunya kalan Preah Vihear. Dom urang ilamo kakei dahlau, bruk pasiam veik kalan Preah Vihear, drap ar hu UNESCO taduan brei angan, meda dui atah dom pluh thun abih yaok pluh trieu USD. Dalam tuk nan, bruk ngak brei pakajap veik dom labik mbuan glut jaleih dui atah labaih 5 tal 10 thun saong bruk padang ngak veik kalan meda lahik tal 3 abap.

Rajaei Madagascar khan brei thau samar drah ka nang luong di dunya dalam 15 harei piah caga bruk sraw kadau ngak kan kandah biak trak tal taneh ia ini. Madagascar pambak tame biak ralo meng bruk blei menyek di negar langiu tame, ba tal taneh ia ini mbuan gaok kan kandah anak bruk yaom kaom xang menyek di dunya.

Meng thun 2027, Hy Lạp pakauk uranaih umo ala 15 thun pandar mang xa hoi, piah khik prein yawa  siam saong rup pabhap khang kajap ka uranaih. Bruk nan ba tabiak hadei hu tacei pato ralo urang amaik ame saong dam dara, dalam rilo urang khan brei thau bruk haduh hatai kurang ndik, pandik pandua saong pandar dien thoai biak ralo di uranaih. Thu tuong taneh ia ini iew dom adei uranaih brei sahaneng ka bruk oh siam meng mang xa hoi tal prein yawa saong raidiuk di drei./.