Page ini, Akaok mentri Tư pháp Hoàng Thanh Tùng taduan adat di Thu tuong yaih khan anak Quoc hoi harak pathau khan ka 4 danak dak: Hukum Ho tich (pasiam veik); Hukum pasiam veik, pabak dom paka di Hukum Cong chung; Hukum pasiam veik, pabak dom paka di Hukum Daong adat karja; Hukum Taduan khaw tin (pasiam veik). Ong  Hoàng Thanh Tùng khan khan brei thau bruk padang ngak danak dak Hukum Ho tich (pasiam veik) piah hu njauk hatai yau gauk, sumu tui dom hukum, jhul pakhang bruk parabha pakat, adat ngak bruk. Sarak hukum pasiam asar kadha ka thẩm quyền tut angan ho tich jao brei ka UBND pakat xã  brei tut angan taong abih bruk, khaw tin ho tich. Tui nan, ho tich tut angan di xa phuong halei jeng hu.

Tui UBND TPHCM, thun 2025, dom bruk jak ba pakacah ban raya hu peih ngak siam, njauk bruk kadha, rilo jalan ngak, kaya meda, hu asar kadha cambaic laic, lagaih haong bruk ngak chinh tri. Ban raya patui veik bruk jak ba pakacah “ Urang jakar, kong chuc, vien chuc pakacah sami samar, hadah krah, sahaneng praong, ngak praong kayua kein laba praong, daong ka bruk cak rok patagok di TPHCM”. Dalam nan, makna padang ngak alam moi truong ngak siam, pachreih bruk brei ba drei tame ngak,  sami samar, hadah krah, caong khin halan hatian di  dom kapol urang jakar, kong chuc.  

Di bhum Taneran kraong Cuu Long daok tame bilan yuak padai dong xuan praong abih dalam thun min yaom xang menyek trun tagok ba tal urang ngak nong gaok kan kandah dalam tuk yuak kuak. Dom baoh sang takik trun pajaih padai 3 mbang dalam thun plaik njiak bruk khat lahik. Anak bruk takik ngak padai dalam thun, gah ngak nong daok peih ngak dom jalan brei takik pala trak yau takik trun pajaih, brei pruh ia patak pataom “ ia bak - thu meblak tame”, patak pataom kaya kan…Tui nan dom jabat chuc nang jeng ba tabiak brei khik tani tanat yaom kaom, abih di nyu nan lac khak drak saong kaya ngak nong.

Uan raok Chol Chnam Thmay, dom harei tapa, tinh Vinh Long padang rilo kapol nyaom mai rivang, alin kaya, tadhau ayuh Tet dom labik agama, baha Khmer, baoh sang dalam sarak karja saong urang jakar naih gheih di urang bangsa Khmer dalam tinh. Bruk ngak nan brei mboh bruk sangka ralo di pakat uy, karja ngan haong urang bangsa Khmer, gam caong khin brei ka mikva uan raok Tet dalam bui sambai, jum pataom, salamat saong patak pataom, dalam bui sambai anak bruk cakrok patagok di bhum palei, taneh ia.

Thanh pho Can Tho hu 11 kaya ndap ndap di 9 po ngak tabiak mek hu angan OCOP thun 2026, dalam nan hu 7 kaya taduan angan veik saong  4 kaya ba tame taong yaom mbang akaok meti. Mbiah tal ini,  dalam ban Can Tho hu 903 kaya OCOP di 454 po ngak tabiak. Jabat  Pambuak dom Danak dak pakat negar ban Can Tho caong khin dom po kaya nan brei caik hatai sangka patagok bhum pala tani tanat; pakhang bruk pambuak, patagok bruk ngak di bhap bini; njauk ndem tal lac kaya siam piah khik hatai jia di urang blei.  

Lien Hop quoc(LHQ) kakei dalau ka dom bruk khik caga laman lamuac oh siam ngan haong dom urang ngak bruk pahala tuk khan lac, labaih 1.000 urang  ngak pahala  metai di dunya dalam 3 thun tapa, glong jaik 3 mbang urang metai dalam 3 thun dahlau di nan. Urang dang kaok kapol daong pahala di LHQ Tom Fletcher khan lac, ini oh lac bruk gaok cuang kandah bo lac bruk pajaleih di gah khik daong urang. Dom urang ngak pahala oh lac pametai bo daok  takik, taong phat saong atah klak kein laba saong oh thei daong.

Gah thong tan karja Trieu Tien khan lac taneh ia ini birau ngak salah taong abih bruk ngak iek vu khi hu makna biak praong birau dui atah 3 harei jaik gauk, dalam nan hu akok siu ndan mbom bimon di ten lua dan dao mesruh metak saong he thong vu khik dien từ. Anak dom bruk nan, Rajaei Han Quoc khan brei thau bruk haduh hatai saong caong khin Trieu Tien brei padeih dom bruk ngak iek vu khi ngak sraw kadau, piah khik hu salamat dalam bhum.

Tui harak pathau khan birau abih meng Mentri Y te, Lao dong saong Phúc lợi Nhật Bản, jien bilan di urang ngak bruk bilan 12 thun 2026 tagok tal 3,3%, glong abih dalam jaik 34 thun tapa. Dalam tuk nan, jien bilan hu pasiam tui bruk lam phat di urang ngak di Nhat Ban dalam bilan 2 tagok 1,9% dut saong tukvak ini thun dahlau. Ini lac tagok glong abih kuhria meng thun 2021 yam tapa bruk kuhria mboh dahlau di nan di urang ilamo./.