Tapa pasang duah, bruk ngak tui Sarak pasiam, padang veik sang daok chung cu klak khut tayah, oh daok kajap di Ban raya Ho Chi Minh njauk ngak suai jang dut haong tukvak hu jao pandar, gam haong nan rah tabiak dom bruk karei tuk ramik pagam dom labik ngak bruk karja. Kayua nan, Phaok Akaok UB Bhap bini Ban raya Ho Chi Minh ong Bùi Xuân Cường hu jao ka So Padang dang ngak, pambuak haong jabat hu pambuak piah pasang duah dom adat hukum ka bruk pasiam, padang veik sang daok chung cu klak; samar drah hu harak UB Bhap bini dom phuong, xa, dac khu tacei ba ngak jeng sa jalan bruk ngak padang tabiak bruk kuhria jien buh tabiak pasiam chung cu; pasang duah, caik ngak dahlau bruk pasiam dom sang chung cu; khik kajap karo salamat bruk diuk rai saong jien padai di rahra.

Pachreih tui Bruk jak ba pakacah gauk ngak bruk piah salam uan Nyaom roya Dang bo tinh Dong Thap, vaktu 2025 -2030, page ini, UBND tinh padang ngak 4 bruk di danak dak Jalan mbak nao mai di tapen kraong Bảo Định. Ini lac sa dalam dom danak dak hu makna praong di tinh Dong Thap hu phun jien meng gilang pariak karja. Tui kuhria mboh dahlau thun 2027, danak dak ini hu ngak salah blaoh, rik tame gam ngak jeng pasak do thi di tỉnh, pacang caga glut jaleih dua tapen kraong Bảo Định, pacang bruk langik salih karei, pacang ia ndik, khik brei salamat raidiuk bhap bini.

UB Bhap bini Ca Mau peih pablei 250 baoh sang daok rahra di Ban Ca Mau hu yaom pablei labaih 14 trieu dong/m2. Danak dak hu peih pablei dalam bruk UB Bhap bini tinh Ca Mau bahrau ba tabiak adat brei ka urang hu sang daok meng baoh sang di drei, min daok di atah labik ngak bruk jeng hu mbang tui sarak daong sang daok rahra. Kuhria di thun ini, tinh Ca Mau brei peih ngak 14 danak dak sang daok rahra. Taong abih, jaik 9.400 baoh sang daok rahra hu ba tabiak darak pasar, min tok pabak hu banah hatai caong sit dut haong hatai caong labaih 15.000 baoh sang dalam bhum.

Bilan padai He Thu 2025 hu rilo salih karei oh lagaih ka gah padai brah di Ban Can Tho. Tui mikva urang ngak nong, mbang camereip, urang blei hu caik jien takai blei haong yaom jien 6.200 dong sa kilo, yau nan min tuk yuak blaoh tok daok 5.000 dong sa kilo. Oh lac urang ngak nong, rilo doanh nghiep pablei salih, pablei brah tabiak negar langiu gaok kan  kandah. Kayua bruk pablei salih gaok kan kandah, brah daok labaih ralo, urangbblei oh blei veik. Urak ini, So Kong thuong Ban Can Tho daok kham merat ba tabiak jalan daong ka doanh nghiep saong mikva urang ngak nong trun khat lahik.

Hu ieu lac “labik pala habei bhong rilo abih” di bhum taneran kraong Cuu Long, ba mai jien mek tame rilo mbiah ka yaok ribau baoh sang urang ngak nong, min dom thun jaik ini, taneh saong habei rok hu di tinh Vinh Long trun rilo. Makna mai meng darak pasar pablei tabiak oh lagaih, ngak ka yaom pablei dalam negar trun rilo, urang pala habei oh daok chreih takre buh jien tame pala. Meyah yau thun 2021, taneh pala habei bhong hu labaih 14.000ha, ye urak ini tok daok labaih 2.600ha, lac trun jaik 6 mbang.

Takik abih 4 urang metai saong 48 urang karei njauk rambuac dalam mbang glut jaleih sang glong rilo tal labik kakuk langkan di Kaoh pulao Java di Indonesia di biar harei kabroi 7 bilan 9. Tui jabat khik iek bala di bhum palei ini, bruk rah tabiak tuk labaih 100 urang, ralo lac urang kumei, daok kakuk dalam aduk praong dalam sa sang bac gam bac gam daok di Bogor di tinh Tây Java. Tui taong yaom camereip, bruk ba tal bala meda  kayua sang nan hu rilo manuac saong oh kajap. Urang jakar daok duah thau ngak brei cambiac laic.

Iran brei ciuk ka danak dak ngak hat nhan saong patakik bruk ngak meda uranium meyah dom bruk taong bhat pakat dunya hu taoh talaih. Bruk ini hu payua tal dom negar E3 dalam nan hu Anh, Pháp saong Đức, pambuak tal dom mbang ndom biai mboah tangin haong Iran ka danak dak hat nhan di negar ini. Dalam puac bilan 8 bahrau blaoh, dom negar E3 hu peih “co che pasiam” piah taong bhat veik di Lien Hop Quoc ngan haong Iran, ngan haong bruk brei thau lac negar ini oh ngak tui dom pagun sanya tui bruk mbaoh tangin ka hat nhan hu tut tangin meng sa pluh thun ini.

Dua urang ma-in xo so Powerball di bang Missouri saong bang Texas di Mỹ njauk Yai glong abih kuhria jien 1,8 ti USD. Ini lac yai praong ka dua kuhria meng lavik mai dalam bruk xổ số di Mỹ. Urang njauk so meda taduan hu jien yai brei parabha tabiak rilo mbang yaok thun, min ralo urang khin taduan jien sa samar drah, yaom lac njauk bayar jien glong jang rajaei lien bang ba tabiak jeng yau karja pak ini ba tabiak.