Ban raya Ho Chi Minh brei rabha bruk ka urang jakar meng ban mai labik ngak bruk piah pasiam bruk ngak, langyah tavak tavaiy daok kandaong ka rahra. Ini lac bruk pato tacei di Bi thu Ban uy Trần Lưu Quang di var taom gaok cu tri dalam harei kabroi. Gam haong nan pandar urang pan akaok dom bhum palei brei langyah patruh dom bruk daok kandaong, pandar dom bruk bahrau, lagaih piah langyah bruk di drei saong kein lagaih ka rahra. Jalan ngak kinh te hu ba tabiak lac Ban raya Ho Chi Minh brei mek hu tanut cakrok labaih 8% dalam thun ini.

Nyaom biai OCOP Bhum taneran kraong Cuu Long thun 2025 ngan kadha “Pambuak bruk patagok - An Giang thun 2025” daok rah tabiak di tinh An Giang. Ini lac bruk hu makna praong piah Danak dak OCOP bhum taneran kraong Cuu Long yam tapa tukvak birau. Hu rilo kein lagaih, bhum taneran kraong Cuu Long hu pandap OCOP mbang ka 2 dalam negar, labaih 3.900 pandap. Tapa nan brei mboh bruk ngak hu lagaih, jalan ngak brei patagok pandap OCOP di dom bhum  palei, ba tame ngak mbang mek hu kein lagaih di bhum taneh pala phun mbang baoh, kaya ikan dalam ia, padai brah, piah ka drei ngak tabiak ralo kaya bingi karei oh labik halei hu.

Nyaom roya Ndang bo tinh Vinh Long mbang ka I di akaok bilan 10 anak tal. Kuhria hu 500 urang lambaok vakil saong 300 urang lambaok vakil tuai hu da-a. Ngan haong kadha: “Padang Ndang bo saong majam chinh tri hacih sa-at, karo kajap; patagok prein khang gul pataom, bruk katmang saong ilamo; jhul khang bruk salih bahrau, patagok, ba Vinh Long patagok samar drah, karo kajap dalam jaman bahrau”. Ini lac bruk hu makna, peih tabiak tukvak patagok bahrau, ginup meda, gheih ghang siam mekre ka tinh dalam tukvak ba drei tame saong patagok karo kajap.

Tui Cuc jalan mbak Viet Nam, mbiah tal ini, hu labaih 43 trieu kuhria dalam abih tih 5 trieu 800 ribau tai khoan radaih pambuak bruk bayar jien tapa app online. Daok labaih 2, 8 trieu tai khoan radaih oh ka pambuak bruk bayar jien tapa app online. Caong khin  bruk pambuak tai khoan radaih haong bruk bayar jien tapa app online rah tabiak njauk tukvak. Cuc Jalan mbak Viet Nam caong khin dom po radaih brei pambuak bruk peih tai  khoan  bayar jien tapa online.

UB Bhap bini tinh Vinh Long ba tabiak samar chip ka bruk glut jaleih ar kraong Giao Hòa, daok dalam labik puk palei Châu Thành, xa Giao Long. Kayua langik hajan ribuk, dalam xa hu hajan praong dui atah ngak ia ndik tagok glaong hu ngak glut jaleih atah 30m di danak dak ar pacang glut jaleih ar kraong Giao Hòa. Urak ini mbaok jalan betong jalan mbak glut taluk ngak kan kandah tal bruk nao mai di rahra, kuhria taong abih jien khat lahik labaih 2 ty dong.

Akaok Quoc phong Thái Lan, Đại tướng Nattapon Nakpanich sanya pataom tame langyah bruk kandah gauk di Thái Lan - Campuchia dalam 4 bilan anak tal, Hoi dong An ninh Taneh ia brei thau ka bhap bini ka bruk rah tabiak di labik taphia negar. Langiu di nan bruk salamat di dom tinh taphia negar gah Meraong saong tapen negar Thai Lan - Myanmar. Ong khan lac Thái Lan  kareik dom pambang negar haong Myarmar saong brei iek vei dom jalan ngak daong ka bhap bini.

Rajaei Indonesia ndom lac brei patui veik danak dak Var mbang huak siam oh mek jien. Min dom danak dak taong yaom, pasang iek brei hu ngak tani tanat piah pacang cakak dom bruk ruak mek kaya mbang. Danak dak, hu peih tabiak di akaok thun ini, piah pasiam janih siam dalam kaya mbang ka uranaih saong patagok an ninh kaya mbang dalam negar. Min tal harei 22/9, hu labaih 5 ribau urang njauk ruak mek kaya mbang.

Dom urang ilamo Autralia birau khan brei thau hu sa hon hop virut dac hieu meda pametai hu vi khuan pacang jru taong ruak, peih tabiak caong khin birau dalam bruk pacang vi khuan di dunya. Urak ini pandap nan meda hu ba tame pandar piah ngak pahala saong peih jalan ngak iek dahlau anak tal.