Tui adat hukum urak ini yaok karja pakat xa hu ramik labaih 32 urang jakar. Min, UB Bhap bini Ban raya Ho Chi Minh, tanut ini oh ka pabak hatai caong di dom xa, phuong hu rahra rilo, pataom di rilo labik ngak kong, labik ngak tabiak – pablei salih ndap nda. Kayua nan Ban raya Ho Chi Minh likau Rajaei brei adat ka dom bhum palei hu rahra meng 50.000 urang ba tagok hu ramik rilo abih 3 Phaok Akaok UB Bhap bini pakat xa, piah patrun kateik geik ka urang ngak bruk, khik kajap bruk karja dua pakat hu ngak siam lagaih, njauk haong lagaih karei di ban medin.

Tui Mentri Ngak nong saong Alam langik, kuhria meng akaok thun tal ini, hu rah tabiak 20 janih bala di dom bhum dalam negar, dalam nan hu 11 mbang ribuk, 4 mbang ap thap nhiet doi ngak ia sua, dauk dalam ia di gah Barak Negar saong Kreh Barak negar, Kuhria tal abih harei 6/10, bala ngak ka 221 urang metai, lahik, 362 urang njauk rambuas, labaih 219 baoh sang njauk khut tayah, papeih pabung, labaih 541 ribau ha njam patam, phun pala rilo janih njauk ia dauk,… Taong kuhria khat lahik labaih 33.500 ty dong.

Xa An Thạnh, ban Can Tho daok di kreh kraong Hậu gam haong xa Cù Lao Dung, bhian njauk kan kandah tuk ia ndik, ngak kan kandah tal bruk ngak mbang saong raidiuk di rahra. Dahlau diah dom mbang ia ndik yaok thun, karja palei hu pasang iek, duah, pasiam majam ar pacang, braong ia, dom danak dak kraong ribaong. Gam haong nan, xa An Thạnh daok patagok bruk pathau khan, kakei caga ka ia ndik piah rahra pacang caga.

Kuhria di Jabat kuhria kraong ribaong tinh Ca Mau, dalam bilan 10 ini, rah tabiak dom mbang ia ndik glaong meda truh tapa tanut njauk kakei caga ka III. Cambaih laih lac, mbang ia ndik meng harei 8 – 12/10 hu tagok khang, tanut ia glaong abih di balai Gành Hào meda truh tapa tanut njauk kakei caga ka III labaih 20 cm; tanut ia ndik praong meng 3,5 – 4,1m. Akaok UB Bhap bini tinh Ca Mau pandar dom so, dom mban, dom gah di tinh saong UB Bhap bini dom xa, phuong, tui iek tani tanat dom khau tin kuhria dahlau, kakei caga ka ia ndik, angin khang, riyak praong di angaok tasik, dil samu pathau khan ka mikva thau, caga plaih, hu jalan ngak ka njauk.

Rahra Ban raya Ho Chi Minh brei hu ndik Metro ka 1 (Ben Thanh – Suoi Tien) oh mek jien dalam harei 1/1/2026 saong dua harei 16 – 17/2/2026 (29 saong harei 1 bingun Tet tui saka ia bilan) lac di bingun Tet Saka Prang saong Tet Nguyen dan. Bruk ini brei mboh ka sa xa hoi siam mekre, pambka praong hatai “ban medin anit ranam” saong pachreih rahra ba drei tame ndik radaih metro ini. Gam haong nan, brei ngak dom bruk ngak gheih, yaih khan di angaok radaih piah pambak praong hatai raok bal pataih bahrau saong pachreih rahra ndik radaih metro.

Di Thai Lan, hajan praong saong ribuk dalam adit tapa ngak tabiak ia sua saong glut jaleih taneh trak di rilo bhum palei, ngak takik abih 12 urang metai saong ngak kanjah jhak tal yaok rituh baoh sang rahra. Karja Thai Lan hu brei tapa bruk daong, dalam nan yaok baoh sang rahra njauk kan kandah brei tok mek hu 9.000 baht (samu haong labaih 280 USD). Taong abih jaik 700.000 baoh sang rahra hu daong, ngan haong kadung jien tagok tal jaik 6,2 ty baht (labaih 191 trieu USD).

Kapul daong hu duah mboh 54 atau talang, 8 harei hadei mbang jaleih aduk bilik sampahyang langkar di sa sang bac Gam daok gam bac Islam di gah Pur Java, Indonesia. Kuhria daok labaih 10 urang njauk lam dalam mbuk jaleih. Dom urang daong duah jeng daok ngak bruk luac harei piah duah dom urang daok dalam mbuk jaleih. Ini lac mbang jaleih sang di Sang bac Gam daok gam bac Islam Al Khoziny lac sa kanjah jhak trak abih dalam thun ini. Dom urang pasang duah hu maong iek makna di bruk jaleih sang, min bruk akaok meti brei mboh lac meda kayua bruk padang oh kajap.

Lien Hop Quoc pok meyaom ka bruk kham merat piah pasang iek saong patakik ngak vu khi hat nhan, maong bruk ini yau sa jalan ngak siam piah pasiam sron mbon salamat saong an ninh dunya. Dahlau nan, Tong thong Nga ndom lac, Nga srap gap brei tukvak veik 1 thun ka dom bruk hu ndom tal dalam Hiep uoc START brei abih harei pandar dalam harei 5/2/2026, ngan haong bruk My jeng hu bruk su-uk javap calei dreih yau nan. Tong thong My hu meyaom panuac ndom meyai gah Nga lac “sa jalan sahaneng gheih”.