Kuhria tal harei 21 bilan 9, TPHCM iek ruak ka labaih 5 trieu urang. Dalam nan, hu labaih 2 trieu uranaih, anek saih hu iek ruak, kuhria hu labaih 77%. Dom bhum palei daok hu ralo urang iek ruak jang lac xã Thạnh An iek ruak hu ka taong abih bhap bini, phuong Phước Thắng jaik 97%. Urak ini, daok 36 dalam 168  bhum palei iek ruak ala 30%. So Y te caong khin dom bhum palei ini brei pasang iek tal yaok labik daok di bhap bini oh ka hu iek ruak, brei thau kayua  halei saong ba tabiak jalan langyah lagaih.  

UBND ban Dong Nai daok duah thau hatai sahaneng ka du thao sarak daong jien nduac ruak thận ka labaih 800 urang. Jien buh tame labaih 13,6 ti dong sa thun. Urang ruak suy thận trak, bruk nduac thận tui vaktu lac raidiuk. Yaom lac hu kadung jien BHYT buh tabiak ralo jien piah iek ruak, jru ruak min kuhria yaok urang ruak lahik labaih 16 trieu dong sa thun. Urak taong abih ban Dong Nai hu 844 urang brei jru ruak than bhian. 

TPHCM kuhria buh jien tame jaik 3.000 ti dong padang ngak tatua Rạch Dơi saong jalan dui tame labaih 3 km, pambuak labik meraong TPHCM haong tinh Tay Ninh. Tui bruk kuhria dahlau, danak dak  padang ngak di quy IV thun 2027, ngak salah saong ba tame pandar di thun 2029. Bruk ngak tatua Rạch Dơi caong khik takik gal jalan, takik rah tabiak bala angok jalan mbak di gah Meraong Ban raya HCM; tui nan ba mbuan lagaih ka bruk ngak mbang kinh te - xa hoi, yulit saong pandar dom labik tapen kraong Soài Rạp.

Bol lin Bien phong tinh Dak Lak  pambuak haong pakat uy, karja bhum palei, dom jabat, don vi saong urang ngak pahala peih ngak rilo bruk uan raok Tet Trung thu, alin labaih 2.200 paok kaya ka uranaih di labik tapen negar saong tapen tathik. Dom kaya nan daong ka uranaih bhum taphia negar bui sambai ma-in Trung thu, brei mboh bruk daong peih ngak di urang jakar, urang Bol lin Bien phong gam haong dom kapol nyaom saong urang ngak pahala gam haong dom baoh sang daok ralo kan kandah, rik tame kuhria raidiuk.

Dom harei jiak ini, dalam tinh Dong Thap hajan praong gam gam dui atah lavik hadei. Ia hajan sre hamu, dauk bein,  ngak kan kandah tal buk pala drak. Di dom labik pala thanh long ralo yau Tân Thuận Bình, Mỹ Tịnh An, Lương Hòa Lạc, hajan praong dauk ralo bein phun thanh long daok tabiak bingu, tabiak baoh. Meyah dauk dalam ia dui atah, bingu saong baoh thanh long meda druh, ngak khat lahik ka po bein. Anak bruk ini, urang ngak nong daok samar njuk pruh ia tabiak, plaik njiak khat lahik.

Han Quoc peih praong Danak dak daong raong anek ka dom baoh sang metui medua. Tui sarak birau, yaok uranaih di baoh sang metui medhar, oh taduan hu bruk daong meng amaik ame raong ba, meda daong ralo tal 200.000 won yaok bilan, sumu labaih 3,7 trieu dong, mbiah tal tuk praong. Bruk peih praong sarak hu taong yaom  njauk ngak tuk hu daong uranaih, tui nan paglong bruk jien padai di amaik ame hadei klak gauk.

Yaok rituh ribau uranaih di Gaza hu gilac mai tame bac tapak mbang akaok meti hadei 3 thun. Dom anek saih dalam dom sang bac khut tayak, dom labik ngak daok dahlau atau padai-tuan saong rilo baoh sang oh hu ginup jien blei khan ao, tapuk siphau, tapuk atau mbut kalam. Kadung Jien uranaih LHQ khan lac, 98% sang bac Gaza yak klak atau khut kayua mesuh metak saong labaih 660.000 anek saih oh hu nao bac.

Patagok GDP di Iran brei takik veik labaih 10% kayua bruk mesuh metak haong Mỹ saong Israel. Ini lac bruk trun ralo abih di kinh te Iran dalam dom pluh thun tapa. Mỹ saong Israel mesruh metak haong Iran meng harei 28/2/2026, lac pacang bruk hat nhan saong ten lua dan dao di taneh ia Islam. Ini lac mbang ka 2 dalam oh ka sa thun, Washington saong Tel Aviv taong Tehran./.