Ban raya HCM kham merat tal thun 2030 ngak hu 232km jalan, kuhria abih phun jien jaik 20 ti USD. Bi thu Thanh uy Ban raya HCM Trần Lưu Quang kakei lac bruk ngak hu 6 jlaan Metro saong 2 jalan pasei pakat negar bo Karja negar tacei ba ngak. Hu 3 jalan praong pambuak Metro ka 2  Bến Thành - Tham Lương, Metro ka 2 Bến Thành - Thủ Thiêm saong jalan Thủ Thiêm - Long Thành nan lac karja Ban raya caong khin ngak salah di thun 2030, gam hu jalan ba ngak tui cambaic laic, plaik njiak saong suai damuai.

Mentri Ngak nong saong Alam langik pambuak UB Bhap bini tinh An Giang, Dong Thap saong Ban Can Tho paeih bruk palao labaih 215.500 drei ikan pajaih tabiak kraong danao. Bruk palao pabak ikan hu angan di bhum, abih di nyu nan lac dom janih, pajaih kan si hu hu yaom ilamo khoa hoc saong kinh te daok kurang, meng nan daong pasiam kein lagaih, ngak rilo dom janih pajaih ikan dalam kraong danao di bhum Taneran kraong cuu Long. Dalam 4 thun tapa, dom tinh di bhum Taneran kraong Cuu Long hu palao labaih 2,5 trieu drei ikan tabiak kraong Hau saong kraong Tien, daong pasiam kein lagaih ikan.

Tinh Dong Thap hu taneh pala phun durian praong abih di bhum taneram kraong Cuu Long hu labaih 34.300 ha, brei baoh labaih 506.600 tấn. Taneh bein pala durian pataom tame rilo bhum palei di gah meraong tinh Tien Giang dahlau diah. Mbiah tal ini, po bein padang ngak hu 489 taka so taneh pala phu durian praong 14.840 ha. Tui So Kong thuong tinh Dong Thap, dalam bilan 10 meng blaoh, tinh pablei tabiak negar langiu  njam patam, baoh kayau hu 168 ribau tan, ralo lac tapa Hàn Quốc, Mỹ, Trung Quốc...

Mbang ia ndik kreh bilan 11 di Ban raya Ho Chi Minh daok di tanut glaong, kakei caga mbuan njauk ia dauk di dom bhum dhaong biar, tapen kraong. Kuhria dalam dom harei anak tal, tanut ia di balai Nhà Bè meda njauk tanut 1,65–1,72 m, balai Thủ Dầu Một kuhria tagok tal 1,75–1,82 m. Abih di nyu nan lac meyah ia ndik tagok glaong pagam tui hajan praong meda ngak kan kandah tal jalan mbak saong bruk ngak mbang saong rahra. Piah pacang caga, So Ngak nong saong Alam langik Ban raya Ho Chi Minh, hu pandar UB Bhap bini dom xa, phuong tapen kraong samar chip pasang iek, pakajap ar pacang, plaih bruk ia sraiy tapa ar pacang, ngak ia dauk di sa labik ngak kan kandah tal raidiuk rahra.

Di tinh Vinh Long, ia tagok glong pakat 3 di dom kraong, ri baong tagok glong abih di harei 18 bilan 11. Ia ndik tagok ngak dauik dom labik biar dhaong, njauk ndem tal, di dom labik gah angaok kraong, ia ndik meda ngak ribuk dauk taneh pala drak abih di nyu nan lac phun mbang baoh, binguk ngak mekre sang danaok. Tuk vak jaik ini, bala meng langik ngak ribuk dauk  labaih 348 ha padai, labaih 3.200 ha phun mbang baoh, 15 ha phun pala yaok thun, 290 ha bingu ngak mekre sang danaok saong jaik 230 ha njam patam, rilo taneh pala drak dauk dalam ia, mbuan lahik abih atau pala drak gilac. 

Mentri Pambuak langiu negar Indonesia hu ba mai sang ka 300 urang di negar ini hadei rilo bilan njauk kareik di balai daok pandaok di Malaysia kayua tame mai daok suan hukum. Kuhria hu labaih 2,5 trieu urang Indonesia daok ngak bruk di Malaysia. Rahra Indonesia dang akaok harak angan dom urang mai daok oh hu ginup harak gal njauk patiaok tabiak dalam meteh thun ini. Rajaei Malaysia brei patui veik hu ngak bruk catang ngan haong dom urang mai daok oh hu harak gal njauk hukum.

Tui kuhria mboh dahlau harei ini, Hoi dong Bao an LHQ ginum biai ka du thao sarak di My ka bruk padang Gah bol lin On dinh Dunya di Gaza. Du thao di My hu bruk njauk hatai di 8 tanh ia Arab saong Hồi giáo, taong yaom lac jalan peih tabiak jalan  jia tame  pamong tak bruk Palestine ba tabiak ngak. Meyah bruk ba tabiak di Mỹ hu khan tapa saong Gah bol lin On dinh Dunya hu peih ngak, ini lac mbang akaok meti kuhria meng thun 1993 Israel jao brei bruk khik iek salamat di Gaza ka gah bol lin gah langiu.

Ukraine hu mbaoh tangin saong Nga ka bruk pasiam bruk salih urang lin njauk mek kareik hadei dom mbang biai gauk jaik ini kayua Thổ Nhĩ Kỳ saong Dom Negar sit Ả-rập thong nhat (UAE) dang di kreh. Urak ini dua gah yasa “peih veik dom bruk mbaoh tangin di Istanbul” hu pambuak tal bruk palao bebas ka 1.200 urang Ukraine njauk mek kareik hu mai sang dahlau mbang padeih padei bilan la-an. Meng bilan 5 tal 7, Ukraine saong Nga hu ngak 3 gavang ndom meyai mbaoh tangin hu angan “mbaoh tangin Istanbul” dalam nan hu bruk jao bayar salih bol lin saong rup atau bol lin metai.