UB Bhap bini Ban raya Ho Chi Minh birau pok tagok HĐ Bhap bini Ban raya Ho Chi Minh brei salih bruk pandar taneh praong labaih 2.000 m2 glai pacang caga glai alam dunya di labik bhap bini ka 3 (dac khu Con Dao) piah peih ngak danak dak Padang ngak hatang pasak huyen Con Dao, vaktu ka 2. Tui UB Bhap bini Ban raya Ho Chi Minh, danak dak tuk ngak blaoh, paglong raidiuk mbang ngui bhap bini, pachreih bruk buh jien tame ngak mbang, patagok yulit; tui nan pabak bruk khik caga an ninh saong khik alam moi truong, inem krung sajarah dakrai.

UB Bhap bini tinh Vinh Long gam haong po buh jien tame padang ngak 4 danak dak dien hangin ngan haong phun jien buh tame ngak labaih 11.284 ti dong. Tuk ngak salah, 4 danak dak dien hangin pabak labaih 718 kWh yaok thun, pabak hu brum caong khin pandar yaok harei di taneh ia saong bhum taneh. Dom danak dak daok duah bruk ngak yaok rituh urang ngak rik tame pasalih bruk ngak saong  jien mek tame kadung tinh labaih 115 ti dong yaok thun.

Var ndem biai OCOP bhum taneran kraong Cuu Long thun 2025, ngan haong kadha “ Pambuak daong ka gauk cak rok patagok” kayua Mentri Ngak nong saong Moi truong pambuak haong UBND tinh An Giang peih bruk tamat. Hadei 4 harei peih tabiak, labik parang pandap OCOP taduan hu labaih 10.000 mbang tuai damuai  mai rivang, blei pandar. Mbiah tal tuk ini, Bhum taneran kraong Cuu Long hu labai 3.900 kaya kan di labaih 2.000 po pandap OCOP mek hu 3 patuk tagok; pandap OCOP dang dhi 2 dalam negar.

Dalam dom harei tapa, di Dong Thap, yaom panat janih 1 urang blei yaom 25.000 dong sa kilo, tagok 5.000 dong sa kilo dut sang bilan dahlau. Urak ini, urang pala panat samar drah di bhum pacang ia sua di bhum Dong Thap Muoi gah Pei tinh Dong Thap kham merat kayua yaom panat daok tagok dalam dom bilan puac thun.

Kong an tinh Gia Lai khan lac bruk pachot pagat pamuak tal bruk ngak ho chieu. Dom urang pachot pagat mong tame dom urang ngak harak gar ho chieu saong brei tut angan taduan harak gal tapa buu chinh karja. Khol nyu  ngak ja urang ba haral gal, iew  bhap bini payua jian dahlau, piah ba ho chieu mai tal sang. Meyah oh ngak tui, urang brei nao tal buu cuc piah mek. Tuk ngak tui panuac kol  nyu dom urang pachot pagat, rahra ngal mblo tabiak dom angan je panuac harak gal eng drei kol nyu thau.

Mentri Y te Palestine khan lac bruk njauk rambuac saong metai lahik dalam jaik 2 thun di Gaza tagok tal labaih 66.000 urang metai, meteh dalam nan lac uranaih saong urang kumei, gam labaih 168.000 urang njauk rambuac. Mentri Y te Palestine khan lac taka so yaok kuhria nan lac biak, kayua LHQ peih ngak thaong rilo urang ilamo.

Meng harei ini Han Quoc peih ngak danak dak mien thi thuc tame negar ka dom kapok nyaom urang tuai damuai rivang ma-in meng Trung Quoc dalam 15 harei, caong khin patagok bruk ngak mbang, gam patagok siam bruk pambuak talei rohim di dua negar. Dahlau di nan, Trung Quoc hu ba tabiak sarak  brei adat ka bhap bini Han Quoc tame negar oh cang hu thi thu dalam 30 harei.

Tong thong Donald Trump peih bruk taom gaok hu makna haong 4 urang ngak praong di Quoc hoi My di Nha Trang, dalam tuk kadung jien jaik abih tukvak. Bruk nan dak harei dak kan kandah tuk Quoc hoi poh ka brei tapa sarak  pandar jien halei dalam 12 sarak jien padai 2026, dalm tuk jaik tal harei 30 bilan 9 daok mai tal. Dahlau di nan, Nha Trang kakei lac rilo urang jakar brei padeih bruk di rajaei lien bang meyah kareik pabah mbang.