UBND TPHCM kakei lac oh padang kapol nao rivang, ayuh Tet urang jakar pakat angaok, pakauk  bruk pandar  jien karja ngak kaya Tet alin ka urang jakar tuk Tet Nguyen ndan Athaik Waw - Bính Ngọ 2026. Tui nan, caong khin brei pasang iek, peih ngak ginup, njauk sumu dom sarak di Dang, Karja  ngan haong urang buh prein tame ngak bruk kat mang, baoh sang sarak karja, urang kathaot, urang raidiuk kan kandah. Ngak siam sarak tani tanat raidiuk, patagok ilamo jum pataom, diukrai tui jalan “anit ranam, daong ba gauk” di bangsa, brei kuhria ngak dahlau, kham merat kuhria raidiuk, jalan sahaneng di bhap bini, khik ka yaok urang, yaok baoh sang  hu uan raok Tet bui sambai.

Dalam tinh An Giang hu 35 xã di bhum urang bangsa takik saong bhum ceik. Tukvak tapa, bruk ngak mbang saong raidiuk di bhap bini bangsa takik tani tanat, bruk khik brei tani tanat raidiuk bhap bini hu peih ngak siam. Mbiah tal ini, hu taong abih xã bhum urang bangsa takik hu jalan radaih o to tame tabiak di pasak xã, jalan pambuak dom xã hu tuh patau atau tuh betong; 95% palei biak kan kandah hu jalan mbak ngak khang kajap; taong abih xã biak kan kandah  hu gom dien tal sang, jaik 90% baoh sang hu pandar ia hacih sa-at.

Dom harei ini, rilo labik taong chap ikan di bhum taneran kraong Cuu Long chreih chrai jang, yaok rituh gaiy kapal pajeng bak ikan. Rilo po kapal gilai khan lac, dom mbang nao tathik  puac thun oh lac njauk ikan, bo daok pablei hu jien biak uan tabuan. Yau nan ye,  rilo po gilai  khan lac brei taong chap ikan tal tuk jaik Tet, tapa Tet. Tui ong Quách Tấn Tâm, Pho Yam ndoc  Mban Khik iek labik tapen ikan An Giang, dom mbang nao tathik puac thun  biak lagaih ikan hadang mek hu meng akok thun 2026 mbiah tal ini di labik tathik Tắc Cậu labaih 100 tấn kaya kan tathik.

Tinh Vĩnh Long kuhria hu labaih 12.000 tấn pandap nda pablei Tet Nguyen dan nethak Athaik Waw - Bình Ngọ 2026. Dom pandap yau brah rilo pabui, baoh manuk ada, kaya kan, menyek mbang, saradang, kaya ngak blaoh, njam patam, baoh kayau, xang menek saong khi ia. Kaya khik piah tagok meng 15 tal 20% dut saong bilan bhian. Mbiah tal ini, tinh hu 29 doanh nghiep, HTX saong 69 labik ngak kaya, baoh sang ngak mbang pablei salih, kuhria kaya khik piah labaih 12.000 tấn, kuhria labaih 900 ti dong.

Urang pala cuc mam xoi di bhum gah Pei negar daok ngak sami samar, tuk yaok pluh yot bingu cuc mam xoi chroh nerang aval. Tui dom po bein, bingu cuc mam xoi chroh nerang  aval meng 50 -70%, hu dom bein bingu mam xoi chroh nerang 100%. Yaom bingu cuc mam xoi trun labaih 50% dut saong tukvak ini thun dahlau. Tui Jabat kinh te, Ha tang saong Do thi phuong Sa Đéc, tỉnh Đồng Tháp, bingu mam xoi chroh nerang meblah 40%, ba tal langik la-ar oh njauk tuk ngak phun cuc chroh bingu samar jang.

Tong thong Han Quoc Lee Jae Myung kakei lac, meyah Mỹ kuhria jien je glong ngan jang dut haong chip ban dan blei meng negar langiu, ba tal yaom chip di Mỹ tagok glong. Dahlau di nan, Mỹ kakei dom labik ngak chip di Han Quoc saong Dai Loan meda dang anak jien je tagok tal 100% meyah oh peih praong bruk ngak tabiak di negar Mỹ.

Sa mbang langik la-ar meng Bắc Cực ngak tuyet laik kapal di Viễn Đông Nga, tui nan ngak gal tavak jalan di Trung Quoc saong Nhat Ban. Di kaoh pulao Kamchatka, tuyet  laik kapal labaih 2m pacang jalan tame dom sang glong rilo tal saong kareik rilo radaih. Langik la-ar trun tal Trung Quoc, gam tuyet laik rilo di Thuong Hai oh ka bhian mboh. Karja ban ini kakei dahlau langik la-ar dui atah takik di nyu 3 harei. Kayua tuyet laik saong la-ar, urang jakar Trung Quoc pacang dom jalan praong di 12 tinh saong khu tu tri, dalam nan hu Sơn Tây, Nội Mông saong Hắc Long Giang.

Hajan praong dalam dua adit tapa ngak ribuk di grauk labik Nam Phi, ngak khut tayak trak dom co so ha tang. Rajaei Nam Phi brei khan brei thau bala di taneh ia hadei dom mbang hajan praong saong ribuk dui atah ngak ribuk dauk trak, ngak rilo labik daok bhap bini tayak, yaok pluh urang metai saong yaok ribau urang panduan nao labik karei. Karja  bhum palei khan brei thau oh ka bhian mboh ribuk halei praong yau ini dalam meng 6-7 thun tapa./.