Di nyaom biai pambuak buh jien tame saong pambuak patagok di Ban raya HCM haong dom tinh, ban bhum Dong Nam Bo saong bhum Taneran kraong Cuu Long rah tabiak bahrau ini haong bruk hu mbaok di labaih 300 lambaok vakil, Phaok Akaok UB Bhap bini Ban raya HCM Bùi Minh Thạnh ndom lac, Ban raya HCM srap gap ngak tatua pambuak gam haong dom bhum palei saong gah ngak mbang pablei salih piah “ngak bruk quy hoach labik patagok, ngak labik jeng danak dak saong ngak danak dak jeng prein cakrok patagok”. Tui bruk ngak ini, siam lagaih pambuak oh tok di dom mbang taom gaok atau danak dak hu yaih khan, blaoh di dom kein lagaih buh jien tame saong pamaong tal peih ngak lagaih.

Dalam tinh Dong Thap urak ini hu 21 doanh nghiep hu brei Ba-ar chung nhan ngak mbang pablei salih brah tabiak negar langiu, rik tame ba sara brah bhum taneran kraong Cuu Long mai rilo darak pasar di dunya. Yau nan min, bruk pablei daok suai damuai. Dalam tuk negar Philippines gaok kan knadah, dom doanh nghiep salih tapa negar Trung Quoc, chau Phi saong Trung Đông. Dalam tuk nan, urang ngak nong yuak padai He Thu 2026. Ngak tabiak rilo padai brah tuk yaom trun dut saong dom bilan dahlau, ba tal urang nong saong doanh nghiep padai brah gaok rilo kan kandah.

UB Bhap bini tinh Gia Lai hu ba tabiak 2 mbaoh tangin buh jien tame 2 danak dak labik daok di phuong Quy Nhơn saong phuong Quy Nhơn Bắc piah duh Danak dak Labik Ban Medin – Jirah Rivang – Ilamo - Pahat Padhih danao Phú Hòa. Bruk buh jien tame 2 labik daok piah ngak jeng taneh duh ka dom baoh sang rahra gaok kan kandah kayua danak dak Labik Ban Medin – Jirah Rivang – Ilamo – Pahat Padhih danao Phú Hòa. Gam haong nan, daong pasiam ban medin, pandar siam taneh saong dak harei dak salah blaoh majam ha tang tui quy hoach.

Mbang ia ndik meng blaoh ngak khat lahik ralo tal bruk ngak nong tinh Vĩnh Long, dom bhum palei urak ini daok  kuhria khat lahik. Ta-eng xa Tân Phú hu 3 labik glut jaleih ngak lahik drap ar bhap bini. Dalam nan hu rilo labik  jaik glut jaleih, mbuan talah ar pacang dalam dom mbang ia ndik anak tal. Anak bruk nan, Chi cuc Thuy loi Vinh Long caong khin karja bhum palei pasang iek dom labik glut jaleih; pacang labik, padang talaoh, dom labik jaleih saong mbuan jaleih.

Tui Jabat Khoa hoc Kraong ribaong Bhum Meraong, halau ia tuh mai Bhum taneran kraong Cuu Long dalam bilan thu anak tal meda hu di tanut biar. Dom tukvak oh meda hu hajan karei bilan. Di labik Cái Lớn – Cái Bé, njom ia mbak meda hu meng puac bilan 12 saong khik tani tanat di tanut glaong dalam labaih bilan 2 tal bilan 4/2027. Akaok thun 2027, rilo bhum ngak padai – hadang di dom bhum palei mbuan kurang ia taba. Tanut mbak glaong abih meda rah tabiak dalam dom mbang ia ndik, meng puac bilan 3/2027 di labik Cái Lớn.

Urang umo atah meng 100 thun tagok di Nhat Ban tapa 100.000 urang, padang ky luc thun ka 56 patui gauk tagok glong, dalam nan urang kumei meblah jaik 90%. Dalam thun jien padai 2026, tui kuhria  hu labaih 54.290 urang umo 100 thun. Dom urang umo 100 thun hu Thu tuong payua harak thu ayuh umo atah saong baoh cup pariak piah pahadar. Tui bruk kuhria mboh cambaic laic bhap bini umo taha samar saong dom bruk iek glang siam prein yawa jeng yau raidiuk di Nhat Ban. 

Ha vien Mỹ hu brei tapa paok taong bhat praong dalam tame dom urang jakar Nga saong rilo kinh te pasak di negar ini. Gah padang hukum My hu lahik labaih sa thun piah nyaom biai mbaoh tangin ka hukum ini, ndom ka bruk neh rabha dalam negar My saong dom bruk piah taong bhat Nga ka mbang mesuh metak haong Ukraine. Hukum hu pathau khan ngak kan kandah dom kham merat di My piah jhul tagok bruk pambuak gilac bruk ndom biai di Nga saong Ukraine.

Rajaei Australia birau ba tabiak dom bruk salih njauk brei caik hatai ka he thong salih labik daok. Dalam dom bruk salih karei, njauk caik hatai abih lac bruk ngak catang  dui atah tukvak daok veik di anek saih negar langiu  saong tuai damuai, takik brei ka urang nao tui anek saih dunya, salih visa ngan haong urang ngak tui tukvak padeih padei, gam brei daong ka urang ngak dom gah daok kurang. Dom jalan ngak birau piah pakhang bruk khik iek urang negar langiu tame mai, daok veik saong tabiak truh negar Australia./.