Ban raya Ho Chi Minh peih bruk pasang duah iek glai dalam bhum Ba Ria – Vung Tau klak tukvak thun 2024-2025. Tui ong Hồ Trúc Thanh, Phaok Yam ndok So Ngak nong saong Alam langik Ban raya Ho Chi Minh, bruk pasang duah mbang ini hu makna, daong taong yaom hu cambaih laih ka 3 janih glai dalam bhum Ba Ria – Vung Tau dahlau diah. Tui jalan ngak, meng bilan 9 tal bilan 11/2025, dom gah ndom meyai tacei ba hu ngak bruk tapak di 21 xa, phuong, dac khu hu glai, ngan haong taneh daok peih bruk pasang duah lac labaih 33.640ha glai saong taneh ngak kaya glai.

Tui Cuc Pala drak saong Khik caga phun pala, dalam 9 bilan tapa, baoh kayau paik hu jaik 6 ribau tấn. Dom janih phun kayau mbang baoh hu pala ralo lac phun pa-ok, patei, baoh thanh long, maneih, kruac, quyt, kruac bung, chom chom, durian, pandiuk, panat. Kuhria dalam thun ini, baoh kayau di bhum taneh gah Meraong negar paik hu jaik 7.300 ribau tan. Kuhria abih veik, baoh kayau saong phun mbang baoh  hu patagok. Yau nan min, bruk pambuak gauk meng bruk pala phun mbang baoh tal paik pablei daok takik; ngak tabiak takik, ba tal bruk khik iek pala kaya nong, brei tabiak baoh gaok rilo kan kandah.

Anak rilo bruk oh njauk hatai di amaik ame anek saih dalam thun bac bahrau, dom sang bac brei adat ka tukvak brei bac blaoh samar drah, brei lagaih tal bruk raok pajeng di amaik ame, Chanh jabat So Pato Megru Ban raya Ho Chi Minh brei thau, kuhria ka tukvak tame bac di var bac page oh tame bac hadei mon 8 tuk, bac blaoh hadei mon 10 tuk 30 minit; var biar harei bac blaoh hadei mon 16 tuk 30 minit. Lammaok urang dang akaok So Pato Megru ban raya jeng pandar dom sang bac tuk pato bac 2 var/harei njauk brei kein lagaih ka amaik ame tuk raok pajeng anek kamuan nao bac.

Kayua ia ndik gah angaok kraong Mekong tuh trun saong hajan praong dalm bhum, yau nan ye ia di dom kraong ribaong di tinh An Giang daok tagok veik dalam dom harei anak tal. Bruk langik hajan ia ndik mbuan rah tabiak bala, brei thau ka bruk mbuan ia dauk  di dom labik dalam ban sit di Long Xuyên saong Rạch Gía tuk hajan praong, ia ndik. Piah pacang caga dom bruk ia kraong ndik, langik jhak, rayo Kuhria iek langik tasik tinh An Giang kakei  bhap bini bhian tui iek, pabak khaw tin, ia kraong ia hajan saong dom khaw tin kuhria iek langik piah hu jalan pacang caga siam lagaih, khik hu bruk ngak tabiak saong ia pandar.

Harei ini, di Ban raya Can Tho, ia ndik tagok 2,06m, tapa tanut kakei caga ka 3. Ia meng kraong Hậu, kraong Can Tho tagok glaong, sraiy tabiak ar kraong saong kadung cuah pacang ia, ngak labik tapen Ninh Kiều dauk dalam. Bruk daok dang nao mai, pablei salih di rahra gaok rilo kan kandah. Makna ia dauk hu langyah lac kayua he thong braong ia klak oh daok kajap, ia sraiy cagar tagok angaok mbaok jalan, gam haong tanut ia kraong Hậu glaong sraiy tagok jalan.

Bruk ginum biai makna biak praong mbang ka sa di UB taphia negar di Campuchia saong Thái Lan tamat hu rilo bruk jak jeng siam mekre, ba tabiak dom jalan ngak lagaih piah peih ngak hu ginup saong njauk gauk brei padeih patuh phao. Dua gah brei mboh bruk njauk gauk padeih taong abih gah, brei ba dom phao karaong tabiak truh labik mesruh metak, padang jalan ngak bruk. Dua gah brei pasang iek peih veik dom pambang negar  piah pajeng ndap nda pandar tapa yaok harei.

Rajaei Han Quoc brei tapa du thao kadung jien thun 2026 ngan haong kein lagaih glaong abih, piah pachreih rahra menek anek. Tui nan, sa baoh sang menek anek kacua hu daong taong abih 30,8 trieu Won (jaik 570 trieu dong). Thun 2024, bruk menek anek di Han Quoc tok hu 0,75 anek/urang kamei – tanut biar abih dalam dunya. Bruk srau kadau ka rahra ini daok jeng bruk kan kandah praong haong cakrok patagok kinh te saong bruk brei kein lagaih ka rahra di Han Quoc.

Bali - Suer riga padeih padei di Indoensia daok dang anak ia ribuk sua biak trak, ngak takik abih 9 urang metai, dom jalan mbak praong nao mai oh hu jeng yau dom labik yulit sirah rivang hu ralo tuai damuai. Ia ribuk  ngak khut tayak rilo danak dak duh ka bhap bini rahra di Bali dalam tuk mblang kapal ahaok dunya di kaoh pulao jaik Denpasar daok gal tavak. Rilo video di mang xa hoi jeng brei mboh ia ribuk sua di dom jalan praong ba tal bruk gal tavak.