UB Bhap bini Ban raya Ho Chi Minh bahrau pato tacei dom so, dom gah saong bhum palei paglaong bruk pasang iek, thau ka urang ngak bruk, bruk ngak, jien bilan, jien alin saong pambuak urang ngak bruk di bingun Tet Nguyen dan Asaih Waw 2026. Jalan ngak piah tani tanat bruk pambuak gauk di urang ngak bruk, pacang caga bruk meblah gauk saong khik kajap an ninh quyen loi di urang ngak bruk. UB Bhap bini Ban raya Ho Chi Minh pandar So Noi vu pambuak haong dom labik pasang iek tani tanat bruk ngak mbang pablei salih saong raidiuk di urang ngak kong; pathau khan sarak di urang ngak bruk; pasang iek, taong bhat bruk ngak suan. Gam haong nan peih ngak bruk meyao meyit bruk ngak dahlau saong hadei Tet piah daong urang ngak bruk duah bruk ngak.

Urak ini, yaom padai brah di Bhum taneran kraong Cuu Long daok khik hu tani tanat. Di Can Tho, padai Jasmine pablei yaom 8.400 dong sa kilo, IR 5451 khik hu yaom 6.200 dong. Di tinh Dong Thap, yaom padai IR 50404 yaom pablei 6.600 dong sa kilo, padai OM 6976 yaom 7.400 đồng. Tui Hiep hoi gah padai brah Viet Nam, tui kuhria yaom padai brah daok khik tani tanat dalam tukvak anak tal, ba mbuan lagaih ka dom doanh nghiep  caga piah kaya padai brah pablei tui dom harak pambuak kakei blei di negar langiu. 

Ngan haong labik taneh lagaih hu klau mbaok tapen tasik, Ca Mau hu kein lagaih piah patagok bruk raong aring saong aring jeng lac sa dalam dom kaya dalam ia hu raong rilo saong hu yaom kaom kinh te glaong di tinh. Piah pacang khik saong patui veik patagok angan je ndap nda hu angan, tukvak tapa tinh Ca Mau peih rilo jalan langyah. Kaya aring hu Kuk so huu tri tue brei Mbaoh tangin brei angan kapul saong Mbaoh tangin brei tut angan pato tacei labik bhum taneh. So Khoa hoc – Kong nghe Ca Mau taong yaom, ini lac co so hukum hu makna piah ngak jeng dom jalan pasang iek asar siam saong pacang cakak bruk ngak ja angan.

Puac bilan 12 ini di Can Tho meda peih tabiak Harei roya Ilamo kraong ia Can Tho ngan haong kadha “ Can Tho – ilamo siam gheih di bhum kraong ia”. Tapa harei roya Ilamo kraong ia mbang ini  daong bhap bini paglong ilamo dalam bruk khik caga alam moi truong, njauk ndem tal lac ribaong kraong, pachreih bruk cakrok patagok gah du lich hu khang kajap; pakhang bruk kuac mek kaya drap ar hu siam, kaya duh katuai damuai rivang main bhum kraong ribaong, pambuak bruk yulit jalan kraong Ban raya HCM, Ban Can Tho  haong dom tinh Bhum taneran kraong Cuu Long; peih bruk pambuak tuor rivang ma-in, rivang ma-in tui jalan kraong ribaong pambuak dom taneh ia tapen kraong Mekraong.

Tukvak jaik ini, tinh An Giang bahrau rah tabiak rilo bruk anek saih taong paoh gauk blaoh cuak clip, ba tagok angaok mang ngak tagok bruk kan kandah tal hatai glo akaok sahaneng di anek saih. Piah pacang caga bruk taong paoh dalam sang bac, padang sa labik sang bac salamat, gah pato megru ba tabiak ba tabiak panuac pandar samar chip lac brei pasang iek, taong yaom veik taong abih bruk pasang iek, pacang caga saong taong bhat ka bruk taong paoh dalam sang bac; gam haong nan salih khang meng jalan sahaneng “taong bhat tuk rah tabiak blaoh” tapa jalan sahaneng “pacang caga meng dahlau, meng atah”, meng bruk pato bruk daok dang, pato megru ka jalan sahaneng saong padang ilamo ndom puac caik dahlau.

Dom urang metai lahik njauk rambuac saong pandap patuh dalam thun 2024 tagok glong abih dalam 4 thun tapa. Bruk ba tal urang metai, njauk rambuac kayua mbom min  tagok glong lac bruk  mesruh metak di Syri saong Myanmar, jeng yau bruk dom chau Au daok tabiak truh Hiep uoc Ottawa – harak hiep uoc dunya pakauk pandar, ngak tabiak, khik piah saong jao bayar ka min ngak njauk rambuac. Di Myanmar  urang njauk rambuac ralo abih hu tal labaih 2.000 mbang bala.

Majam Pagam tạng Japon brei thau ka dom urang alin tạng meng urang metai glo di negar ini dalam thun ini mek hu bruk ngak rilo abih, hu 134 bruk. Bruk patagok ini lac sa banah mai meng hatai sahaneng di bhap bini ka bruk hu makna di bruk alin tạng, taphia bruk rajaei peih praong daong jien padai ka dom co so y te hu brei thau tantu cambaih laih ka bruk metai glo. Yaom lac yau nan, dut haong rilo negar, bruk alin tạng di Japon jeng daok takik saong brei kham merat jang veik piah patagok bruk ngak pahla gheij ghang siam mekre ini.

Bhap bini Han Quoc daok duh hatai mblo tabiak du lieu urang hadei bruk mblo tabiak du lieu praong ralo di blah web pablei salih dien tu  Coupang. Thaok binguk  meng camera an ninh di jabat ngak bruk, labik payua uranaih atau tame baoh sang urang suan hukum daok hu jeng  bruk biak haduh hatai ngan haong rilo bhap bini rahra Han Quoc. Birau ini, canh sat chap mek 4 urang tame labaih 120.000 camera an ninh baoh sang. Dom urang mek thaot binguk  piah ngak tabiak saong pablei salih dom asar kadha mbuan ngak jhak urang./.