Nyaom roya Dang bo TPHCM mbang ka I tamat blaoh bruk cak rok patagok taong abih gah lac padang TPHCM jeng do thi ilamo, salih birai, ba drei patagok di dunya, hu labik dang hadah hadai di bhum Dong Nam A saong daok dalam 100 ban di dunya. Pamong tal thun 2045, TPHCM uak drei patagok ban raya dunya. Piah ngak hu bruk ini, Nyam roya  brei thau 3 bruk praong, nan lac: sarak saong jalan ngak, ha tang saong urang ngak bruk. Gam haong nan, Nyaom roya ba tabiak bruk padang ngak veik labik labik patagok tui rilo jalan  nan lac “ 3 bhum - 1 dac khu - 5 bruk ngak khang kajap”, peih tabiak labik patagok birau saong khang kajap ka ban raya.

Tinh Dong Nai birau peih Nyaom roya Pakacah anit negar mbang ka I, meng thun 2025-2030, hu mbaok di 462 urang lambaok vakil ka dom kapol nyaom, urang lin pakacah, niah gheih dalam tinh. Bruk ini piah pamedeih veik saong patagok prein khang di bruk jum pataom bangsa. Meng nan, pabak prein khang ngak jayak dom bruk ba tabiak dahlau, bruk meng anak tal tui Sarak Nyaom roya Dang bo dom pakat, padang Dong Nai jeng tinh ilamo, salih birau, ba drei tame dunya, patagok samar, khang kajap, gam haong taneh ia yam tame dunya dalam samar birau.

Anak bruk pablei salih daok rah tabiak sraw kadau, UBND tinh An Giang ba tabiak jalan ngak dalam 3 bilan puac thun, dom so dom gah chuc nang peih bruk ngak tabung glong di klau jalan: jalan taphia negar, tathik saong dalam negar, kham merat pacang bruk pablei salih dauk, bleik saleik saong ndap ja piah tani tanat darak pasar.Meng akaok thun mbiah tal ini, An Giang mek hu  1.286 mbang ngak suan hukum, langyah bruk taong phat 1.360 mbang; kak jien phat ka karja labaih 211 ti dong. Ba tabiak langyah 40 bruk saong 51 urang.

So Bangsa saong Agama tinh Vĩnh Long daok peih dom mbang pathau khan “Trun takik bruk lakhah tuk umo daok sit saong tok gauk dalam but pajaih dalam bhap bini bangsa takik”. Asar kadha pathau khan dom hukum lakhah, pacang bruk tuk umo daok sit saong lakhah dalam but pajaih, langyah dom bruk lakhah suan hukum, dom bruk oh siam kayua  lakhah tuk umo daok sit saong tok gauk dalam but pajaih dalam urang bangsa takik…Bhum taneran kraong Cuu Long meblah jaik 13% urang bangsa takik tok diuk tok pasang tuk umo daok sit, dut haong dalam negar.

Ndem tal bruk glut jaleih taneh ar kraong Tiền di palei Tân Quới, xã Tân Long, tỉnh Đồng Tháp, urang ngak praong di Sở Ngak nong saong Moi truong tinh mai duah thau ka bruk glut jaleih taneh di labik ini. Tui kuhria mboh anak meta, labik ar kraong glut jaleih ia nduac khang, taneh cuah, laman lamuac mbuan glut jaleih. Sarak di tinh Dong Thap brei ba dom baoh sang  di labik glut jaleih tame daok di labik  Mã Trường, ấp Tân Quới, xã Tân Long.

Rajaei Indonesia daok jhul pakhang bruk padang ngak dom sang glong rilo tal chung cu di ban raya. Dom danak dak hu padang ngak pabak ka bruk caong khin hu sang daok ka urang jien mek tame takik saong mbiah. Sang praong meng 36 tal 45 met vuong, piah ba mai kein laba glong ka dom urang raidiuk gap mbiah. Dahlau di thun 2007, rajaei Indonesia ba tabiak padang ngak 1.000 baoh sang glong rilo tal ban raya daong, min ngak tok hu 78 sang glong dalam nan 74 sang padang glong daok klak saoh.

Thai Lan padang UB Tacei ba bruk pacang caga kol duis pambuak tal kong nghe. Ini lac bruk kham merat catang di Thai Lan piah pacang caga bruk pachot pagat online saong dom bruk rao jien kan thau tapa tai khoan so. Uy ban hu 23 urang, kayua Thu tuong Thai Lan ngak Akok, tacei ba ngak bruk  tapak.

Tui harak pathau khan birau di Gah Khí tượng Dunya (WMO), nong do Carbon dalam langik kuhria mboh glong abih meng dahlau mai, ba tal Baoh taneh pandiak tagok catang jang saong ba tal langik oh daok lagaih. Bruk nan kayua cuh menyek ngak meng cur patau saong dom mbang apui khuah glai, njauk ndem tal Nam Mỹ. Urak ini, hu labaih 50% thak nerak carbon hu glai, taneh saong tathik njom tame, min bruk nan daok dalam trun./.