Kuhria meng bilan 10 anak tal, Ban raya Ho Chi Minh brei peih 100% harak gar karja brei hu ngak di grauk labik, brei kein lagaih ka rahra saong gah ngak mbang pablei salih. Tukvak tapa, ngan haong bruk 38 kapul ngak bruk hu taduan harak gar di grauk labik di 168 labik karja pakat xa, phuong taong abih hu labaih 1.600 harak gar karja meng harei 1/8 tal ini. Dalam nan rilo meng lac harak gar di grauk labik karja, rilo meng labik di gah taneh riya. Dom harak gar di gah padang bruk ngak mbang pablei salih.

UB Bhap bini tinh Gia Lai tacei jalan ngak piah ba Bhum kinh te Pambang negar Dunya Lệ Thanh hu jeng pabah mbang hadar krah, ngak bruk luac harei melam luac adit 7 harei, pachreih urang buh jien tame ngak mbang, patagok kinh te- xa hoi khang kajap di bhum taphia negar. Meng nan ba  Pambang negar Dunya  Lệ Thanh hu jeng pasak kinh te chreih chrai, salih birau saong salamat, rik tame jhul pakhang bruk cakrok patagok bhum tapen negar Tay Nguyen gam sumu haong dunya.

Tui So Ngak nong saong Alam lamgik tinh Dong Thap, pala njam patam lagaih haong langik salih karei bhum ia taba Gò Công hu kein laba glaong tagok 2 tal 7 mbang dut haong pala padai. Glaong abih lac mbang njam hala brei kein laba kuhria rah tapa labaih 450 trieu dong/thun, glaong tagok 7 mbang jien mek tame meng phun padai. Meng di nan, urang ngak nong diuk rai khang kadang, peih mbang ngui karo kajap, oh daok duh hatai ka bala ngak kanjah jhak yau dahlau. Bhum ia taba Gò Công hu praong labaih 37.000 ha, langik oh lagaih, dalam bilan thu ye gaok bala, njom ia mbak.

Dom harei tapa, bilan ia ndik meng halau ia angaok kraong Me Kong tame dom mblang hamu di dom xã bhum tapen negar di tinh An Giang oh lac pabak taneh siam bo daok ba tui ikan hadang ia taba biak ralo, dalam nan lac ikan linh bingi boh thei jeng caong takre. Kayua akaok bilan, yaom ikan linh yaom glong, meng 250.000 tal 300.000 đồng sa kilo. Bilan taong chap ikan linh oh lac bilan duah hu rilo jien tame di dom urang taong chap  ikan bo daok lac duah hu bruk ngak ka rilo urang daok di bhum palei pala.

So Cong thuong Ban raya Ho Chi Minh brei thau dalam danak dak pablei trun yaom ndap nda pataom "Shopping Season – Chreih chrai blei ndap nda bilan He 2025", danak dak pablei trun yaom ndap nda hu angan City Sale brei rah tabiak meng harei 28/8 tal 7/9 anak tal di rilo labik, dalam nan hu ga metro Ben Thanh. Ini lac mbang akaok meti labik blei ndap nda dalam ala taneh di jalan metro ka 1 hu brei peih bruk pablei salih, pambuak tapak haong pasak pablei salih tui jalan bahrau, pagun sanya ba mai sa bruk ba drei tame bahrau ka rahra saong tuai damuai.

Karja Tong thong My Trump birau khan brei thau sa bruk ngak birau dalam sarak tame negar di taneh ia ini. Tui nan, Washington brei pasang iek tani tanat dom bruk sahaneng lac “cagar veik My” do mang xa hoi tuk pasang iek bruk brei daok veik di negar Mỹ. Urang brei panuac di Jabat Harak tame negar saong Di tru Mỹ mboh lac kein laba bo taneh ia Mỹ daong brei oh brei ka dom urang iek lap saong nduac tui dom jalan sahaneng cagar veik My.

Tong thu ky Lien Hop Quoc taong yaom, chau Phi hu taong abih dom bruk njauk ngak piah jeng sa “sieu cuong nang luong tai tao”. Nang luong hijao di chau Phi daong patrun jien ngak nang luong, ngak rilo chuoi pabak saong jhul samar bruk palahik carbon dalam dunya, kayua nan Tong thu ky Lien Hop Quoc ieu da-a dom gah buh tame jien padai saong ilamo kong nghe, piah ka drap ar alam langik di chau Phi ba mai kein lagaih ka rahra chau Phi.

Jabat Y te Lien minh chau Au khan lac, taneh ia ini hu biak rilo mbang tamu jit ruak kayua jamoh kaik dalam thun ini. Bruk langik salih karei oh lagaih ba tal alam labik daok tamuh rilo jit ruak birau. Kuhria tal harei 13 bilan 8 meng blaoh, hu 8 taneh ia chau Au khan brei thau ka 335 mbang urang njom virus Tay song Nile, dalam hu 19 urang metai. Italy lac taneh ia gaok kan kandah trak hu 274 mbang urang njom ruak./.