Kapul Ngak bruk Ban raya Ho Chi Minh peih pakak Bilan Urang ngak kong mbang ka 18 ngan haong angan “Urang ngak kong Viet Nam: Salih bahrau hadah krah, paglaong bruk ngak hu meng bruk ngak”, pagam haong Bilan ngak ka salamat, pahacih sa-at labik ngak bruk thun 2026. Bilan Urang ngak kong thun ini, Kapul Ngak bruk Ban raya Ho Chi Minh pataom tame peih 7 danak dak hu makna, pamaong khang ka labik ngak. Bruk naih gheih lac bruk jhul khang danak dak kacah ngak bruk naih joi, ngak bruk hadah krah. Gam haong nan, ban raya peih rilo danak dak pok meyaom dom urang ngak kong naih gheih truh tapa kan kandah. Dom danak dak sangka ka kein lagaih, daong urang kong baoh sang kan kandah jeng hu jhul khang.

Mai rivang saong ngak bruk di tinh Vĩnh Long, Phaok akaok negar Võ Thị Ánh Xuân hu alin brei harak binguk 200 paok jien bac di Kapol nyaom Daong Kadung jien daong uranaih Viet Nam brei ka anek saih hu raidiuk kan kandah dalam tinh; alin 90 paok pandap ka baoh sang sarak saong 20 paok kaya ka uranaih hu raidiuk kan kandah. Phaok akaok negar jeng caong khin Vĩnh Long ngak brei patagok bruk cach mang, pamedeih bruk caong khin patagok; mek bruk paglong raidiuk, haniem phol di bhap bini ngak pasak.

Kuhria tal harei 28/4, di angaok Majam Pasang iek pakacah di Mentri Pato Megru hu taduan labaih 1 trieu 17 ribau anek saih tut angan pakacah tamat THPT thun 2026. Anek saih hu quyen pasiam khau tin tut angan tal 17h harei 5/5/2026. Hadei tuk tukvak ini, dom khau tin humakna, abih di nyu nan lac dalam mon pakacah, oh hu salih karei. Mbang pakacah tamat THPT thun 2026 kuhria rah tabiak meng hareo 10 tal 12/6, dalam nan dom harei 11 saong 12/6 lac tukvak anek saih ngak ginup kadha pakacah.

Dalam 3 harei padei Harei Pachit da-a Po Hung,  tinh Lam Dong taduan raok 350.000 mbang tuai damuai mai sirah, daok veik; jien mek tame labaih 768 ti dong. Rilo bruk ngak ilamo -  yulit yau adat ngak yang, dieu hanh, daoh tamia nghe thuat, kadha ma-in bhap bini…hu peih ngak, pachreih ja ba tuai damuai mai rivang. Tuai damuai mai Lam Dong oh lac rivang, padeih padei bo daok ba drei tame harei roya, rivang ma-in dom bruk ilamo meng kan, hu mbang kaya kan di bhum palei.

Biar harei 28/4, ong Phạm Kỳ Thống (umo 60 thun), daok di xa Đông Sơn (huyen Bình Sơn klak), tinh Quang Ngai nduac radaih patuh nao tabiak hamu pajeng padai. Dalam tuk daok ngak bruk, gaok hajan rinuk, ong thống nao pandaok di ala phun Gáo Kanyik di mblang hamu saong gaok jakala klak, metai di labik. Hadei tuk taduan hu khau tin, Kong an xa Đông Sơn hu mai tal labik, peih bruk ngak tantu cambaih laih, ngak bruk haong baoh sang urang metai. Tapa bruk ini jabat chuc nang pachreih kakei tal mikva tuk daok nao di jalan, gaok hajan hu tathro saong jakala ye oh pandaok di ala phun, gang ndien.

Rajaei Nhat Ban ba tabiak jalan ngak brei pabak menyek dalam negar meng bruk blei tame saong salih, dalam nan blei tame rilo meng Mỹ, pabak menyek ka taneh ia. Tui  Mentri kong nghiep Nhat Ban, tui kuhria hu labaih 60% menyek tamo  dalam 5 bilan meng bruk salih dom kaya karei, tapa nan dom mbang pajeng ba tui jalan tapa eo tathik Hormuz. Dom gah pambuak tal khan brei thau ka bruk haduh hatai kanda, tui nan eiw rajaei hu jalan pabak brei tani tanat.

Rajaei Duc daok kuhria ka kadung jien thun 2027, dalam nan hu taong abih jien brei mesraiy lac labaih 196 ty euro piah patagok co so ha tang saong quoc phong. Daong prein ka bruk peih praong jien buh tabiak mai meng kadung jien ha tang hu yaom 500 ty euro saong bruk taoh talaih adat “pacang jien mesre di karja”  ngan haong bruk buh jien taniak pandar ka quoc phong. Kadung jien ha tang saong yava langik brei pataom tame dom gah hu makna yau ye jalan mbak, ngak lek taka so saong majam sang iek ruak.

Hu takik di nyu 7  urang metai saong 13 urang karei njauk rambuac  kayua apui khuah  mbang sa danak dak padang ngak di gah barak ban ine Moscow di Nga. Gah bol lin chuc nang daong ba tabiak truh hu labaih 30 urang – ini lac labik  hu labaih 200 urang tuk nan daok ngak bruk. Gah kong to khan lac hu ba tabiak kaoh tui hukum piah ngak brei tantu  dom bruk suan gah padang ngak. Urak ini, dom kadha pasang iek daok kham ngak brei cambaic laic.