Thu tuong Rajaei Lê Minh Hưng birau ini dang kaok nyaom biai ngak bruk haong Mentri Noi vu, Mentri Bangsa saong Agama, Thanh tra Rajaei ka bruk ngak meng akaok thun 2026, jalan ngak meng anak tal  saong langyah dom bruk ba tabiak, likau dom Mentri, jabat. Ngan haong Mentri Bangsa saong Agama, Thu tuong caong khin ngak brei salah Du thao Hukum adat cambat, agama (pasiam veik). Paglong bruk peih ngak dom danak dak pakat negar, parabha catang ka dom palei, khik kajap phun jien pandar njauk bruk. Ngak salah sarak daong ka anek saih, sinh vien, dam dara bangsa takik. Samar ngak salah ba tame cơ sở dữ liệu ka bangsa, agama, pambuak haong cơ sơ du lieu rahra…

Pahadar 51 thun Harei Peih paha gah meraong Negar, Yasa taneh ia, tinh Ca Mau peih Adat Ilamo, Kong nghe - Ilamo, Yulit saong Pakacah “Brah bingi di Bhum taneran kraong Cuu Long” mbang ka I. Dom bruk peih ngak meng harei 24/4 tal 1/5 anak tal. Bruk njauk caik hatai di adit lac hu 400 labik parang iek tui jaman birau saong pambak praong. Bruk rik tame paglong raidiuk, jalan sahaneng  ka bhap bini saong yaih khan thaik binguk  urang Ca Mau anit ranam.

Mentri Ngak nong saong Alam moi truong birau ba tabiak Sarak ka 1005 jao bruk ramik caga Danak dak “ Sumu dom bruk pasang iek hahlau ia di bhum gah meraong Ben Tre”, tinh Vinh Long. Danak dak peih ngak di dom xa Phú Phụng, Chợ Lách, Vĩnh Thành, Hưng Khánh Trung, Nhuận Phú Tân, Thành Thới, Hương Mỹ, Tân Thành Bình saong phường Bến Tre, duh ka bruk pruh ia ka labaih 24.000 hecta phun mbang baoh saong phun ngak mekre di urang pala.

Mblang hamu sara di xa Tân Thành, tỉnh Lâm Đồng (labik huyện Hàm Thuận Nam, tỉnh Bình Thuận klak) daok tame kuac mek sara dalam langik pandiak lagaih, yaom kaom tani tanat, urang ngak sara biak chreih chrai. Dalam xa Tân Thành, tỉnh Lâm Đồng hu labaih 300 baoh sang ngak sara di taneh labaih 60 hecta, dalam nan hu 25 hecta sara lang tamra. Thun ini, mek hu rilo ikan nguec, bruk blei sara  ngak kaya tagok rilo, dui atah ngak yaom sara  tagok glong, urang ngak sara meda laba labaih jaik 80 trieu dong sa hecta. 

UBND xã Vĩnh Viễn, Ban Cần Thơ birau ngak salah Danak dak labik ma-in brei ka uranaih di Sang bac Mẫu giáo Vĩnh Viễn 1. Danak dak padang ngak kuhria abih tih  500 trieu dong, dalam nan mblang ma-in praong labaih 320 met vuong, hu ngak mblang me-in gah langiu langik hu tabung pacang, hu tauk hareik katak, kaya ma-in, đu quay; piah me-in  hu siam, daong uranaih  pasram rup pabhap  saong sahaneng siam mekre.

Jabat công tố Pháp harei kabroi da-a urang kaya meda gah kong nghe My Elon Musk mai ngak bruk di Paris piah tangin sua ka mang xa hoi X ba dom asar kadha oh gheih saong pakauk. Gam haong Elon Musk, dom urang ngak praong saong urang dahlau diah  di mang xa hoi X jeng hu da-a mai tangi sua duah thau. Dom urang công tố taong yaom bruk ngak di kong  nghe chatbot Grok ngak tabiak saong ba dom asar kadha  suan hukum.

Yaok rituh  anek saih di Trung Java, negar Indonesia birau yau njom ruak jru mek kaya mbang kayua Danak dak Var mbang huak oh mek jien. Jabat chuc nang brei kareik pabah mbang  saong pacang don vi pabak jit vu dinh duong piah pasang iek. Urang jakar gah ini khan brei thau, hu 187 urang di rilo sang bac di labik ini lac kaya mek. Rilo urang ruak lac kumei metian, amaik daok brei kuman mam saong uranaih sit ba tame sang iek ruak.

Dalam tuk Iran - Trung Đông daok rah tabiak sraw kadau, ngak kan kandah tapak tal bruk pabak menyek, Rajaei Nhat Ban daok khik hu ginup xang menyek. Nhat Ban sanya  khik yaom xang menyek ala 170 yên sa lit. Langiu di nan, Nhat Ban  daok khik hu menyek tamo, pandar  hu labaih 230 harei tra./.