Mentri Bangsa saong Agama mbaoh harak saong khan brei thau angan tinh bhum urang bangsa takik saong bhum ceik vaktu 2026-2030. Tui nan, dalam negar hu 15 tinh, ban lac bhum urang bangsa takik, nan lac: Tuyên Quang, Thái Nguyên, Lào Cai, Phú Thọ, Lai Châu, Điện Biên, Sơn La, Cao Bằng, Lạng Sơn, Thanh Hóa, Quảng Ngãi, Gia Lai, Lâm Đồng, Đắk Lắk saong TP Cần Thơ. Sarak angan ini hu makna biak praong piah peih ngak dom sarak patagok kinh te - xa hoi, brei caik hatai ka bhum urang bangsa takik saong bhum ceik  dalam vaktu anak tal.

UBND TPHCM birau iew dom so, dom gah samar lang talaih dom kan kandah, jhul pasamar bruk peih ngak Danak dak ngak jalan Vanh dai 4 TPHCM, tui bruk ba tabiak di Quoc hoi saong Rajaei. TPHCM caong khin Dong Nai saong Tay Ninh samar pasang iek, mbaoh harak ka danak dak; tui nan pataom tame bayar jien, daong, padang veik labik daok ka bhap bini, njauk tui bruk ba tabiak. Danak jalan Vành dai 4 atah labaih 200km, tapa TPHCM, Dong Nai, Tây Ninh saong Binh Duong dahlau diah.  TPHCM dang tabiak kuhria iek bruk ngak jalan nan.

Bol lin Bien phong Tay Ninh khik iek 19 xã taphia negar kuhria atah jaik 369 km, dalam nan hu labaih 276 km jalan tabak saong jaik 92km jalan kraong ia, jaik negar Campuchia. Ini  lac labik mbuan rah tabiak rilo bruk sraw kadau, njauk ndem tal lac dom kol matuy, pablei lau, bleik saleik saong tabiak tame negar suan hukum. Meng tuk tame negar  mbiah tal ini  gah bol lin bien phong  duah hu, langyah labaih 5.500 urang ngak suan hukum  di labik tapen negar Tây Ninh.

Dalam tuk langik pandiak yau ini, rahra di Dong Thap daok sami samar mek phun njam hang piah pambu thu. Urak ini, urang blei yaom meng labaih 25.000 -28.000 dong sa kilo, yaom ini tagok glong 3 mbang dut saong bilan dahlau. Hadei blei pataom baoh pablei ka dom labik pak gah dalam saong langiu tinh, duh ka bruk ngak thu kong my nghe. Bruk peih praong darak pasar  pablei kaya my nghe ngak meng njam hang di negar langiu hu blaoh saong daok ngak jeng rilo kaya siam gheih duah jien tame kajap, daong ka yaok ribau urang duah hu bruk ngak tani tanat, rik tame hu makna praong dalam ka bruk cakrok patagok kinh te bhum palei.

Piah pok meyaom saong yaih khan ka brah bingi pahe di bhum taneh Chín Rồng, tinh Ca Mau meda peih bruk Pakacah Brah bingi di bhum Taneran kraong Cuu Long, mbang ka 1. Bruk pakacah di dom kapol nyaom, HTX, bein raong, lien hiep HTX saong dom doanh nghiep ngak tabiak, pablei salih padai brah hu ngak padai di dom tinh, ban dalam bhum taneran kraong Cuu Long. Bruk jhul pasamar pambuak dom bruk meng ngak tabiak tal pablei, gam brei mboh labik dang di brah Viet dalam saong langiu negar.

Hàn Quốc hu tuai damuai dunya ralo abih dalam 3 bilan akaok thun ini, hu rilo urang takre mai mong iek  kapol daoh ma-in alat ragam BTS di pasak Seoul di bilan dahlau. Dalam 3 bilan akaok thun ini, taduan raok 4,76 trieu mbang tuai damuai dunya, tagok 23% dut saong tukvak ini thun 2025. Trung Quoc ba kaok hu labaih 1,45 trieu mbang tuai damuai, hadei di nan lac Nhat Ban, Đài Loan.

Uy ban urang Philippines negar langiu khan brei ka bhap bini ka bruk birau di kol pablei manuac, dalam nan hu kol nyu jak ba nao ngak bruk, min ba tame kateik kreih urang ngak bruk duh ka bol lin negar langiu di dom labik kalin kan. Uy ban urang Philippines di negar langiu  kakei lac, dom panuac da-a di urang negar langiu bo oh hu harak pambuak bruk  tapa Mentri Ngak bruk lac mbuan gaok bala, gam iew bhap bini brei caik hatai tuk meyao meyit  haong dom urang palih ruah.

Langik pandiak catang meda me-om tagok bhum gah Timur negar Mỹ tuk langik pandiak dui atah pambak praong di rilo ban raya. Tui kuhria mboh dahlau di Bein bingu Pasak ( New York) pandiak meda tagok tal labaih 30 do C, jiak 31 do C thun 1941. Dom urang ilamo  mboh lac pandiak glong dalam bilan 4 oh takik mboh, min bruk dui atah rilo harei lac takik gaok. Pandiak urak ini hu taong yaom lac bruk oh bhian rah tabiak di yaok labik jeng yau tukvak panjiak./.