Thu truong Nông Thị Hà ba akaok kapul ngak bruk Mentri Bangsa saong Agama mai rivang, tadhau ayuh Tet Chôl Chnăm Thmây di sang baha Pothiwong saong Candaransi di Ban raya Ho Chi Minh. Mbang mai rivang piah pahadar thau dhar phol bruk rik daong di mikva bangsa Khmer, gam haong nan pang caong takre piah pasiam bruk gul pataom di taong abih bangsa adei sa-ai. Thu truong taong yaom glaong dom bruk rik daong di dom po acar, halau janeing agama Phat Theravada Khmer dalam bruk tacei ba mikva daok dang “siam raidiuk, gheih agama”, ngak njauk ngak siam jalan ngak, hukum saong khik ramik yaom kaom siam gheih di Agama Phat.

Malam 13/4, Harei Tamat saong alin yai Raya Papar sap dalam negar mbag ka 17 hu rah tabiak di tinh Quang Ninh. Danak dak kayua Rayo Sap ndom Viet Nam saong Harak Mbao saong Papar sap Papar binguk Quang Ninh pambuak padang ngak. Di harei tamat, Mbang Padang peih ngak hu pok meyaom dom urang vak harak mbao saong alin 24 yai Ameh; 37 yai Pariak, 71 yai Kang; 60 yai Pachreih ka dom kadha dalam dom janih: papar sap tapak, phong su, phong su pasang duah, danak dak sap bangsa; podcast… Dalam nan, rilo kadha hu dalam nan bruk duah thau, duah mboh; rilo jalan ngak bruk papar sap hadah bahrau hu dom urang ngak harak mbao ngak biak tani tanat, hadah krah, hu yaom kaom ilamo saong ngak jeng sa bruk bhap bini rahra biak lagaih siam mekre. Kadha “Luac jalan khik ramik ilamo Cam: meng ilamo yao klak tal ilamo kong nghe lek taka so” di urang vak Nguyễn Ái Nghiêm di bilik ngak bruk Sap Bangsa – Jabat Rayo Sap ndom Viet Nam di Ban raya Ho Chi Minh mek hu yai Kang.

Di dom bhum dalam Ban raya Can Tho, urang ngak nong oh ngak padai bilan Dong Xuan ralao, salih tame di nan mikva hu salih tapa pala njam patam, gam lagaih haong langik, gam khik kajap jien mek tame. Naih gheih di mblang hamu di xa Tài Văn di angaok rilo taneh tangei, pluai, rilo abih lac tamakai…daok ma-om hijao dom mblang taneh hamu hu pala padai meng kal mai. Meng bruk ini, bruk ngak mbang jeng rah rah hu salih, dui tui bruk salih karei ka bruk ngak di palei pala.

Sa mbang jaleih taneh bahrau rah tabiak di angaok jalan gah Pur kraong Phú An, dalam xa Bình phú, tinh Dong Thap, ngak klaoh taong abih jalan mbak hu makna. Bruk bala ngak kan kandah tapak ngak ka 5 sang daok di 6 baoh sang rahra laik tame bruk kan kandah, meda jaleih tuk halei, ngak klaih klaoh bruk nao mai di 1.000 baoh sang rahra saong ngak kan kandah 500ha phun durian. Karja xa rabha bruk ka urang jakar khik iek 24/24 di labik, srap gap daong 6 baoh sang rahra panudan urang saong drap ar tuk hu bruk jhak rah tabiak.

Di labik barait Đông Hưng, xa Cái Nước, tinh Ca Mau hu sa jalan dalam palei pala atah labaih 30m njauk glut trak. Taong abih mbaok jalan menyek tapak ndaok njauk klaih klaoh, jalan glut dalam meng 0,5 tal 1,2m. Bruk glut jaleih oh ka padeih di nan tuk di dom labik danak patui veik rah tabiak dom inem tanrac atah labaih 5m, mbuan rah tabiak bruk pambak tabiak praong. Meng thun 2025, dalam tinh Ca Mau hu 402 labik jaleih hu atah taong abih labaih 629km; labaih 1.000 baoh sang njauk kan kandah, rilo jalan mbak khut tayah, khat lahik kuhria yaok pluh tik dong.

Khau tin meng Jabat Alam hu peih par di urang Trung Quoc, ahaok pasang duah Ia Bulan angan hằng Nga 7 kuhria hu peih par tagok di metehn pua thun ini. Bruk di Hằng Nga 7 hu caong takre ngak tabiak dom bruk cakrok samar dom ilamo ngak kong hu makna, pasang duah dom labik hu thau lac meda hu padang ia patau. Urak ini bruk srap gap daok hu peih ngak njauk tukvak, brei kein lagaih ka bruk par ahaok dalam meteh puac thun ini.

Urak ini yaok trieu urang di Sudan daok diuk hu tok meng sa var mbang yaok harei. Mbang mesuh metak di Sudan di bol lin saong Kapul saong samar srap gap tapa thun ka pak, ngak tabiak bruk eik lipa pambak praong saong ngak ka yaok trieu urang brei panduan nao labik karei, ngak tabiak sa dalam dom mbang srau kadau praog abih dalam negar. Tui Lien Hop Quoc, labaih 62% rahra Sudan, daok rah tabiak dom bruk lahik an ninh kaya mbang trak.

Urang jakar Malaysia hu khik kareik 34 anek saih daok tame daok chung hukum meng Thai Lan tame mbang Kelantan piah nao bac. Dom pathau khan meng akaok meti ndom lac kapul ini lac rahra Thai Lan, min bruk kuhria hu cambaih laih brei mboh taong abih jeng rahra Malaysia daok diukrai di Thai Lan. Dom jalan tapa negar chung hukum di labik ini hu kareik bambang labaih sa thun tapa, min yaok harei jeng hu yaok rituh anek saih, gam nan hu rahra Malaysia saong Thai Lan, panduan nao mai piah bac megru.