Dalam mbang nao rivang pakat karja di negar Trung Quoc, harei kabroi 15/4 tui tukvak pak ini, Tong Bi thu, Po negar To Lam saong Tong Bi thu, Po negar Tập Cận Bình mai taom mbaok saong brei panuac di var taom mbaok dam dara Trung Quoc - Viet Nam hu mbaok di Danak dak “Bruk ngak meriak bhong roh duah, bac da-a”. Tong Bi thu, Po negar To Lam khan brei thau caong khin dom rairah dam dara dua negar dak padang  bruk ngak chinh tri karo kajap, jalan diukrai njauk lagaih; oh padeih bruk paglong jalan sahaneng pambuak talei rohim hu makna praong atah dhua suai lavik di Viet - Trung; pakhang bruk bac da-a, patagok bruk salih birau hadah krah, ngak po ilamo - kong nghe, iek praong ilamo - kong nghe, bruk brei ngak dahlau, rik daong  tame ngak brei cakrok patagok di yaok taneh ia saong pambuak bruk patagok di dua negar Viet Nam - Trung Quoc.

          Jalan peih drah samar Hậu Giang - Cà Mau daok ngak brei salah dom bruk ky thuat puac abih  piah kuhria caga dahlau raok radaih peih nao mai dalam harei 30 bilan 4. Jalan atah labaih 110 km kuhria jien buh tame ngak labaih 27.500 ti dong, dalam nan hu dua danak dak lac jalan Cần Thơ - Hậu Giang saong jalan Hậu Giang - Cà Mau. Danak dak  rik tame hu makna praong takik jien logistics, jhul patagok bruk kinh te - xa hoi khang kajap, pabak prein khang piah Ca Mau urak drei patagok di Bhum taneran kraong Cuu Long.

Radaih pajeng ba bhap bini di TPHCM birau pabak hu 2% bruk nao mai pajeng ba di bhap bini. Bruk peih ngak sumu dom jalan “ katung - jhuk”, dalam nan jitvu, patagok metro saong salih bruk bhian randap di bhap bini lac bruk praong. Tui ong Nguyễn Quốc Hiển, Pho akaok Mban khik iek jalan radaih pasei Ban raya HCM, jalan Metro ka 1 daok pajeng ba  60.000 urang dalam sa harei saong dak harei dak tagok. Ban raya jeng daok ngak samar dom jalan metro birau, pambuak Ban raya HCM haong bhum Binh Duong, Can Gio, Long Thanh…bruk ngak salah 187 km jalan pasei ban raya di thun 2030 saong 355km di thun 2035.

Di labik ramik hareik di palei 3, xã Hưng Phước, tỉnh Đồng Nai (dahlau diah lac huyện Tân Phú, tỉnh Đồng Nai), Bộ Chỉ huy Bol lin Biên phòng tỉnh Đồng Nai hu peih bruk cuh klak 10.620 paok pakao hala ba meng mai meng negar langiu, ralo lac pakao Jet saong Hero. Bruk cuh klak dom pakao nan oh lac langyah dom bruk ngak suan bo daok lac piah rik tame pathau khan, paglong bruk ngak tui hukum di bhap bini.

Urang nong tinh Vĩnh Long daok yuak padai Dong Xuan. Padai mbang ini yuak hu 7 tấn sa hecta brei labaih 392.000 tấn. Bilan yuak ini, gah ngak nong saong bhap bini bhum palei brei ngak siam dom jalan pacang caga bala meng langik, halak halin. Meng nan, padai Dong Xuan oh khat lahik kayua pandiak, njom ia mbak; padai takik ruak halak halin yau nan ye urang ngak hamu hu laba labaih.

Dunya sanya daong Sudan labaih 1,3 ti euro ( sumu 1,5 ti USD) piah daong ka dom bhap bini gaok kan kandah kayua bruk mesruh metak dui atah tapa thun ka 4 di taneh ia Dong Bac Phi ini. Tui Gah Y te Dunya (WHO), mesruh metak gal tavak abih dom balai iek ruak di taneh ia ini, ngan haong 217 labik y te taong tame. Bruk ngak pahala gaok kan kandah kayua jalan mbak gal tavak, khut tayak saong kan ngak harak gal, ngak ka rilo uranaih oh taduan hu bruk daong ngak pahala.

Dom urang metai kayua patuh ging padiak di sa sang mac dien di bhum kreh negar An Do tagok 19 urang, 17 urang njauk rambuac daok jru laka. Tui harak mbao Indian Express, meda lac bruk patuh nan kayua jalan brong thak pacah, ngak ia pandiak glong pruh tabiak gaok urang ngak daok huak kreh pandiak tuk nan. Bilan dahlau, apui khuah di sang mac  phao bingu di bhum gah Pei negar ba tal 17 urang metai.

Labaih 250 urang, dalam nan hu uranaih saong urang kumei, lahik hadei tuk sa gilai pajeng urang ti nan kableih di Tathik Andaman, daok tapen tathik gah Pei Myanmar, Thái Lan saong kaoh pulao Mã Lai. Bruk ngak mbang kinh te patagok, Malaysia lac labik  padeih di yaok trieu urang  mai meng dom bhum taneh kan kathaot di chau A. Yau nan min,  dom mbang tapa tathik kayua dom kol pablei manuac dui ba mbuan gaok bala saong bhian kaleih gilai kayua pajeng trak rilo manuac./.