Dalam nyaom biai harei 14/4, UBTVQH mbang 16 yasa padang 10 phuong di Dong Nai saong njauk hatai padang ban Dong Nai. Bruk padang ban Dong Nai saong dom phuong pabak prein khang patagok cakrok birau ka tinh Dong Nai bo daok rik tame ka bhum meraong Negar saong dalam negar. Ini lac bruk salih piah cakrok patagok saong bruk khik ramik ba tinh Dong Nai jeng ban praong, klak rabha, pambuak daong patagok Ban raya HCM.

Thun ini, dalam tinh Lam Dong hu jao brei 6.233 bien che urang jakar pakat xa, blaoh meng brei hu 5.243 urang. Yau nan min, njauk caik hatai karei dalam bruk parabha urang ngak bruk. Rilo labik khin hu urang ilamo glong min oh ka pabak, bruk kan kandah di ban praong do thi, jitvu saong langyah  harak gal karja. Dalam tuk nan, di dom labik karei labaih urang jakar. Njauk caik hatai kurang bruk pataom tame dom gah chuyen mon birau yau kong nghe thong tin, salih pandar taka so, kaya alam moi truong.

So Salamat kaya kan TPHCM peih bruk pambuak harak haong 100 doanh nghiep co so pabak var mbang saong kaya mbang ka sang bac paglong bruk ngak saong pasang iek var mbang huak ka anek saih. Urak ini hu 317 don vi pabak var mbang huak ka dom sang bac. Bruk mbaok harak pacang labik gaok bruk kaya mbang jru mek, takik rah tabiak bruk kan kandah saong bruk ngak di doanh nghiep. Ban raya  kakei  urang amaik ame tui iek, pambuak bruk pasang iek  piah var mbang huak ka anek saih hu salamat. 

Bhap bini Khmer di xã Nha Bích, tỉnh Đồng Nai (dahlau huyện Chơn Thành, tỉnh Bình Phước) daok uan raok Chol Chnam Thmay dalam bruk praong prang. Bruk njauk caik hatai dom harei Roya hu bruk Roya  ling ong Tà, adat likau ka prein yawa khang kajap, ngak hamu hu padai ngak apuh hu tangei di Khmer. Ong Nguyễn Hồng Thái, Chủ tịch UBND xã Nha Bích khan lac, langiu bruk daoh tamia dalam dom harei Tet, bhum palei daok ba tabiak bruk ngak suai lavik, dom ilamo di urang Khmer.

Tinh Ca Mau urak hu taneh praong taong abih taneh hu jaik 148.200ha. Dom harei tapa, langik thu lagu suai lavik, pandiak catang hangin khang labaih 12.000 ha glai pakat 5 biak praong. Dahlau di nan, So Ngak nong saong Alam truong Ca Mau caong khin dom po glai pataom tame tame khik ramik kajap glai di labik tapen negar.

Yaok trieu bhap bini Campuchia yam tame dom harei padei piah raok Roya Khmer Chol Chnam Thmay. Dalam Tet, meng 14 tal 16/4, bhap bini Campuchia hu makna piah pataom mbaok, nao baha, dom bruk ngak ilamo saong tuai damuai di dom labik danei angan. Karei dom thun dahlau, Roya mbang ini di ban ine Phnom Penh thun ini njauk ndem tal dom mbang dieu hanh hu labaih 1.500 urang pok meyaom ilamo bangsa.

Oh huac kan kandah di dalam negar, dom kapol ngak pahala di Ai Cap kham merat ngak brei pajeng kaya pandap  daong pahala daong samar ka bhap bini  Palestin di Gaza. Dalam 2 thun metah tapa, Cairo pajeng Gaza labaih 900.000 tan kaya daong ngak pahala, meblah 70% kaya daong ngak pahala ka Gaza. Yau nan min, tui dom harak pathau khan, daong ngak pahala di Gaza daok biak takik dut saong bruk ngak di urak ini.

Sa urang likei adam patuh phao di sa dang bac  bruk ngak di gah Meraong negar Tho Nhi Ky harei 14/4, ngak 16 urang njauk rambuac. Dom urang njauk rambuac patauh phao nan hu gru pato saong anek saih. Urang patuh phao lac anek saih dahau diah bac di sang bac ini – patuh phao pametai rup eng hadei tuk canh sat pagui mek./.