Pok sap ndom meyai pato tacei di nyaom biai dalam negar thau tani tanat saong peih ngak Sarak Nyaom biai mbang ka 2 Mban chap hanh Trung uong Ndang mbang ka XIV, meng online tal dom labik dalam negar hu jaik 2,2 trieu urang lambaok vakil hu mbaok di page ini, Tong Bi thu, Chu tich negar Tô Lâm sa mbang tra pandar, brei tong abih majam chinh tri, patui ngak salah blaoh saong paglaong papraong bruk ngak hu, siam lagaih di bruk karja palei 2 pakat. Piah pakat xa jeng sa prein paglaong pakat karja tinh, dom sarak saong damak dak brei hu salih jeng bruk ngak tantu. Gam haong di nan, dom bruk mbaoh tangin ini brei pamaong tapak tal bruk paglaong raidiuk bhap bini rahra.

Uan raok harei raya Tet Chôl Chnăm Thmây thun 2026 di mikva urang bangsa Khmer, dom harei blaoh tapa, urang dang akaok dom Mentri, dom gah pakat nagar Trung uong saong di dom ban raya Can Tho hu mai tal palei alin kaya brei ka dom po acar, halau janeing agama saong mikva urang bangsa Khmer daok di dalam ban raya. Lambaok vakil ka dom sang baha saong mikva urang bangsa Khmer ndom lac brei patui ngak siam jalan ngak di Ndang, sarak, hukum di Karja saong adat cambaic di bhum palei; kham merat ngak mbang pala drak, gul pataom daong gauk, khik ramik saong patagok ilamo bhap bini siam lagaih di urang bangsa Khmer.

UB Bhap bini daok di tinh Dong Thap pambuak haong Kongti co phan pablei tabiak blei tame Blue Ocean, harei ini pablei tabiak lô paok baoh kruac bung mbang akaok meti tal darak pasar nagar Australia. Dong Thap hu taneh pala jaik 4.400 ha phun baoh kruac bung, mek hu baoh labaih  65.000 tan yaok thun. Dalam tinh hu 16 bhum pala gam saong 22 ma lek taka so pablei tabiak darak pasar nagar Amirik saong Korea Dalam nan maong mboh lac, Dong Thap hu 1 bhum pala kruac bung akaok meti hu ginup kein lagaih pablei tabiak darak pasar nagar Australia. Ini lac bruk hu makna piah ka gah kaya kan kruac bung di tinh daok peih praong darak pasar dalam tukvak anak tal.

Dalam tinh Dong Nai daok hu 46/95 phuong, xa mboh daok mbuan si rah tabiak apui khuah apui mbang glai di tanut pakat 5 lac pakat biak kan kandah. Piah khik kajap karo bruk caga apui khuah, jeng ye padam tui apui khuah glai, Chi kuk Pasang iek glai pandar dom karja dom xa hu glai, pato tacei, tacei ba rahra bhap bini pandar apui dalam bruk ngak mbang, pala drak saong ramik dom hareik harom njauk tukvak brei ka tani tanat; peih bruk tut angan mbaoh tangin sanya pacang khik glai, pala drak jaik glai tui njauk adat hukum; pakauk bruk cuh hareik harom, cuh apuh hala dalam tukvak kuhria kakei dahlau bruk khan apui khuah glai pakat 4, pakat 5.

Di taong abih dalam tinh Dak Lak urak ini hu labaih 537.000 ha glai pala. Dalam nan, hu labaih 200 ha glai nyu mbuan si apui ghuah apui mbang. UB Bhap bini tinh Dak Lak hu pandar brei tal dom bhum palei, dom labik urang po glai padang jalan ngak cambaih laih, caga srap gap ginap manuac urang, radaih lamo saong khik tani tanat hatai srap gap langyah pacang caga dom bruk tamuh tabiak. Bruk pathau khan jeng daok hu peih ngak praong dalam tal rahra bhap bini daok jaik glai.

Chu tich akaok nagar Cuba ndom mayai lac negar ini srap gap cambaic blaoh tuk halei jeng hu bruk pambuak haong Nagar Amirik brei ka dom asal kadha yau ye rahra panduan nao daok labik karei, pablei salih jru aphil saong karo an ninh, min tapi tui njauk jalan hu ngak meng bruk “iek praong yau gauk jeng ye ieik samu yau gauk”. Urang dang akaok nagar Cuba ndom ka dom bruk taong bhat di Nagar Amirik jeng ye ngak brei ka kinh te di nagar Cuba kan kandah jang, abih di nyu nan lac rah tabiak bruk kurang sang menyek. Gam tui di nan jeng ndom ka dom kan kandah trak bo rahra bhap bini nagar Cuba daok bom taduan nyu.

Rajaei Cong ndang Angrik Anh hu peih tabiak jalan kuhria pasiam dom adat di Angrik tui tanut asar di Lien minh (EU). Negar Angrik brei halan tian pandar rilo dom adat pambuak tal ndap nda kaya, tanut kaya mbang menyum saong quyen loi kein raba brei ka urang ngak bruk di EU. Jalan kuhria di bruk ini lac patakik dom bruk gar tavak bruk ngak mbang blei salih daok ngak kan kandah ka dom gah ngak mbang pablei salih Angrik kuhria meng hadei Brexit.

Jabat iek glang Langik tasik Japan brei thau rilo labik di gah Pur saong gah Pei negar ini hu pandiak catang karei kandah thun bilan. Ban Shizuoka nagar Japan pandiak hu tanut 30,3°C, samu haong tanut pandiak bhian mboh di labik ini di puac bilan 7. Di ban ine Tokyo, pandiak tagok mbiah tal 27,3°C. Jabat iek glang Langik tasik Japan kakei caga rahra brei caga dom bruk mbuan kan kandah yau bau tal.