Di nyaom biai ka Sa Kapol nyaom pakacah - Meyaom di Trung uong rah tabiak  page ini harei 15/4, Thu tuong Lê Minh Hưng kakei lac: Bruk pakacah, meyaom brei ngak tui dom bruk chinh tri, abih di nyu lac bruk ngak salah saong ngak hu dom bruk pakacah ngak mbang kinh te - xa hoi, dalam nan jhul pakhang patagok kinh te 2 taka so. Thu tuong caong khin dom bruk pakacah pamong tal bhum palei, paglong ilamo urang jakar bhum palei, phuong, xã piah hu rilo jalan pakacah, siam lagaih. Tui nan brei meyaom saong pambak praong dom urang naih gheih, joi , bruk ngak lagaih, jalan ngak siam;  pabak prein khang salih jalan ngak hu lagaih. 

Meng bilan 9 thun 2025 mbiah tal ini, Kong an 8 tinh, ban gah Meraong negar duah mboh, pacang cakak hu 6.528 bruk, chap khik labaih 14.290 urang pambak tal matuy; pasang iek, duah mboh labaih 32.000 urang pandar matuy suan hukum, urang ghien jru phien saong khik iek cakak ghien. Bruk pambuak gah dunya, pambuak dom gah piah ngak hu siam; pasang iek catang dom jalan taphia negar, jalan hu makna praong, rik tame pacang cakak matuy gah langiu tame negar.

Roya Chol Chnam Thmay - thun birau di urang bangsa Khmer, daok peih ngak dalam chreih chrai. Meng dom bhum palei tal dom baoh baha Khmer di grauk labik Bhum taneran kraong Cuu Long, labik peih ngak roya chreih chrai rilo sambo mau, yawa alat ragam, thaik tamia saong bui sambai. Oh lac likau brei hu sa thun birau salamat, Roya Chol Chnam Thmay daok brei mboh raidiuk dak harei dak siam, trei sir di bhap bini Khmer. Dalam bingun ini, xa Phu Tam, Ban raya Can Tho daok peih bruk pakacah vah Ghe Ngo sit piah peih padang ngak veik ilamo biak gheih di bhap bini Khmer gah Meraong negar.

Dalam labaih 3 bilan tapa, gah y te TPHCM taduan hu 629 kadha mai meng bhap bini, dalam nan hu labaih 600 panuac hu langyah blaoh. Meng nan du lieu nan, So Y te  daok salih jalan ngak bruk, sumu ramik pasiam dom bruk cuang kandah saong paglong jitvu. Tui taong yaom di gah y te TPHCM, bruk bhap bini hu mac jamraih piah yaih khan biak lagaih saong khan veik sumu oh lac paglong bruk ngak bo daok piah ka gah y te brei salih karei.

Di Bhum taneran kraong Cuu Long yaom paneing that tuk halei jeng glong, ba mai kien laba tani tanat ka urang pala. Di tinh Vĩnh Long, paneing bhong meriak urang blei hu yaom meng 35.000 -45.000 đồng sa kilo. Ini lac yaom glong abih dut saong rilo janih phun karei, abih di nyu lac dalam tuk jien buh tame pala dak harei dak tagok glong. Meng bruk pablei tabiak tani tanat, mikva  mboh sahanang hatai peih praong taneh pala phun paneing, ini lac phun pala ba mai kein laba glong jien mek tame karo kajap.

Bingun padeih padei Harei Dunya urang ngak lac harei 1/5 thun ini, Trung Quoc  brei padeih rilo mbang kapal ahaok par nao Dong Nam A saong chau Đại Dương. Tui dom urang ilamo taneh ia ini, kayua yaom xang menyek  kapal ahaok tagok, gam kurang di dom labik. Urak ini,  yaom xang menyek kapal ahaok tagok dua mbang dut saong dalau diah, dalam tuk yaom jien ndik haok di dunya oh tagok, ba tal dom gah kapal haok ngak bruk rilo khat lahik rilo.

Labaih 250 urang ti nan  urak ini daok lahik hadei sruh radaih pajeng urang karam di tathik Andaman angaok jalan gah Meraong Bangladesh tal Malaysia. Gah bol lin daong hu 9 urang gaok bala di harei 9 bilan 4. Dalam nan hu 6 urang ngak bruk ini. Sa urang daok diuk khan veik, gaok urang pablei manuac dui ba pagat lac ngak bruk di Malaysia.

Sa mbang patuh biak trak rah tabiak di sang mac ndien di bang Chhattisgarh, bhum Kreh negar Ấn Độ ba tal takik di nyu lac 14 urang metai saong jaik 20 urang karei njauk rambuac. Karja bang iew brei pasang iek taong abih gah, tui panuac sanya daong jien padai ka baoh sang urang gaok bala saong urang njauk rambuac. Bala sa mbang tra ngak ka urang mboh huac bruk ngak kong nghiep di dom labik ngak nang luong saong kuac mek kaya khoang di An Do./.