Thu tuong Rajaei bahrau hu harak payua pandar paglaong bruk pajeng ba saong khik kajap siam mekre, salamat jalan mbak dalam mbang pdeih padei Harei Pachip Po Hung saong bingun harei 30.4-1.5 jaik tal. Thu tuong pandar dom mentri, labik patagok radaih pajeng ba duh hatai caong nao mai di Rahra, rilo meng lac pajeng ba menuac urang tuai damuai hu nao mai lagaih, salamat; taong bhat catang dom bruk patagok yaom harak ve chung adat. Oh luai rah tabiak bruk gar tavak di jalan dui atah ka jalan mbak di dom jalan pasak tabiak tame Ha Noi saong Ban raya Ho Chi Minh, saong labik peih dom danak dak pahadar harei raya, labik ngak adat di raya.

Mentri Padang ngak taduan tinh Dong Nai lac ban raya ka I. Ini lac bruk praong  piah Dong Nai ginup jeng ban raya di Pakat negar. Ini lac bruk njauk brei salih tui buk khik iek lagaih haong bruk cakrok patagok, bruk pambuak kajap jeng yau brei mboh bruk dak harei dak patagok di bhum palei dalam bruk cakrok patagok di taneh ia.

Ban raya Ho Chi Minh peih Bilan ngak bruk Ka salamat kaya mbang thun 2026, pataom tame pacang caga njauk ruak mek dalam jitvu kaya mbang saong kaya mbang di jalan ban medin. Thun ini, asal kadha hu makna lac pasang iek salamat kaya mbang ngan haong jitvu mbang menyum saong kaya mbang jalan ban medin. Tui So Salamat kaya mbang Ban raya Ho Chi Minh, kaya mbang jalan ban medin lac sa banah raidiuk ban medin, salih ka bruk pakauk, ban raya caik dahlau bruk tacei ba, daong saong paglaong ilamo urang pablei salih piah dak harei dak hu pasiam kein lagaih hacih sa-at, ngak lagaih bruk ngak kaya mbang.

Bhum pala phun thanh long di tinh Dong Thap pataom tame di huyen Chợ Gạo saong Gò Công Tây, Tiền Giang dahlau diah. Ini lac bhum gaok kan kanadah kayua padiak bhang, njom ia mbak, yau nan ye po bein daok samar brei ngak dom jalan piah pacang caga. Dom po bein pagam mô tơ dien saong mac njuk pruh ia tu dong meng dom cambuac payeng vin phun thanh long. Taneh pala thanh long di tinh Dong Thap urak ini hu jaik 9.400 ha, brei baoh labaih 270.000 tấn.

Kreh bilan 4, tuk sap Paranưng saong Saranai sameng tagok, rilo palei Cam di labik Nam Trung Bo yam tame Rija Negar - rija peih akaok thun bahrau tui saka Cham. Ini lac rija bhap bini hu makna di urang bangsa Cam, kayua dom halau janeing bhap bini dang ngak adat hu dom adat likau hajan siam angin lagaih, ngak hagait hu nan. Rija daok lac labik khik ramik rilo janih tamia bhap bini di bol bhap urang Cam.

Quoc hoi An Do brei peih bruk ndem biai nao mai ka sa hukum camereip piah caik 1 dalam 3 binah dom ghe  di dom jabat hukum karja pakat negar saong tieu bang ba urang kumei tame. Bruk ini ba tal dom đảng cagar veik haduh hatai ka bruk parabha tui labik buh phieu, mbuan ba tal sraw kadau gah chinh tri dalam negar. Dom urang njauk hatai jia tame bruk salih birau yau nan brei mboh bruk bhap bini ngak po di negar An Do hu siam jang tuk dom urang kumei chinh tri sangka rilo jang ka dom bruk yau y te, bac da-a saong bruk taong paoh urang kumei.

Tong thong Prang Emmanuel Macron hu ieu pandar anek saih trung hoc padam phone saong puac tapuk, ba tabiak kadha sa “harei oh pandar phone” yaok bilan ka taong abih anek saih saong pakauk taong abih mang xa hoi ngan haong dom urang umo ala 15 thun. Gam haong nan ndom catang ka bruk njauk brei hu hukum piah pacng khik ka urang si jeng dam jeng dara plaih patruh dom bruk kanjah jhak kayua pandar kaya ndien tu biak rilo, daong dom urang nan pasiam bruk pataom tame ka sa bruk.

Di ban ine Havana di Cuba, radaih buyt Ciclobús lac radaih pajeng urang saong radaih juah, radaih patuh tapa jalan lubang ala ia tathik hu jeng bruk palih ruah di Cuba kurang xang menyek. Radaih buyt peih nduac meng menyek diesel pajeng labaih 60 urang gam radaih, hu meteh radaih piah caik radaih juah, radaih patuh. Yaom lac oh njauk jit vu  birau, min Ciclobús hu makna biak praong dalam tuk Cuba dang anak  bruk sraw kadau  kurang xang menyek biak ralo dalam dom pluh thun tapa./.