Biar harei 20/4, di Ha Noi, Tong Bi thu, Po negar ong Tô Lâm hu mbaok saong dang kaok var taom mbaok dom urang Quoc hoi mbang XVI lac urang bangsa takik. Ndem meyai biak salut mbut anit ranam, Tong Bi thu, Po negar ong Tô Lâm kakei lac, var taom mbaok  brei mboh bruk sangka di Dang, Karja ngan haong bhap bini dom bangsa takik, brei mboh bruk ngak di dom urang vakil Quoc hoi lac bangsa takik dalam dak harei dak hu makna praong dalam bruk chinh tri. Piah pabak bruk cakrok patagok di taneh ia dalam vaktu birau di Tong Bi thu, Po negar ong Tô Lâm caong khin, patui bruk  salih birau dalam bruk bangsa saong sarak  bangsa, bruk praong oh lac daong, bo daok salih brei hadah krah  piah patagok, ba mbuan lagaih piah bhap bini ngak mbang.

Brei panuac di var taom biai Drap ar Café Dunya birau peih ngak di tinh Dak Lak, ong Nguyễn Minh Vũ, Thứ trưởng thường trực Mentri Ngoại giao khan lac, bruk palih ruah café  bruk praog di ndem biai ilamo lac jalan roh duah hadah krah, rik tame padang angan je dom janih kaya nong dalam radiuk. Café Viet Nam harei ini oh lac hu tame dalam  bruk ngak kinh te di dunya bo daok lac bruk peih jalan ba ilamo, dalikan ka urang saong ilamo Viet Nam tal ayut sahabat dunya. 

Tuk padei harei roya 30/4 saong harei Dunya urang ngak 1/5, bruk khin nao mai rilo di TPHCM parilo  min urak ini harak ve daok labaih rilo kayua tuai damuai kanda, oh khin blei dahlau. Dalam tuk nan, harek ve ahaok saong radaih apui pataom tame ngak bruk duh ka urang tuk nao mai parilo. Gah jalan pasei pablei hu labaih  68.000 harak vé dalam harei padeih padei 30/4. Harak ve urang blei ralo abih lac melam 29 saong dah page harei 30/4, rahra ramik bruk ngak piah samar hu nao sirah ma-in…

So Ngak nong - Alam moi truong tinh Dong Thap khan brei thau, hajan gam hangin catang di biar harei 19/4 ngak 47 baoh sang  di xã An Long saong Tân Long par tabung. Kuhria rah tapa, khat lahik jaik 500 trieu dong. Hadei bala kayua langik rah tabiak, urang ngak praong di UBND 2 xã  An Long saong Tân Long padang kapol urang jakar trun tal labik piah tacei pato ramik pasiam, daong bhap bini tauk veik tabung sang, ramik sang danaok saong daong jien ka dom baoh sang khut tayak kuhria tui hukum ba tabiak.

So Khik iek kaya mbang salamat TPHCM birau khan  brei thau bruk pasang iek  rah tabiak  di Sang bac Tieu hoc Bình Qưới Tây harei 7/4 ba tal yaok rituk anek saih tame sang iek ruak kayua kaya mbang jru mek. Tui panuac tamat, dalam taong abih 740 anek saih mbang huak jala pandiak hu 266 urang njom ruak, 190 urang tame sang iek ruak. Tapa nan dut iek dich te saong yaok kuhria, jabat chuc nang thau lac jaik abih kaya mbang njom anek ruak, dalam nan hu ahar flan saong ia bai njam sabei cải haong rilaow lac mbon njom ruak. 

          Piah khik brei salamat ka urang nao Haji thun ini, dalam tuk sraw kadau di di bhum taneh jaik taphia, Tổng thống Indonesia Prabowo Subianto brei ka 363 urang jakar mai A Rập Xê Út piah daong bruk saong khik iek dom urang nao ngak adat hukum di taneh ia ini. Canh sat Taneh Indonesia jeng padang bol lin khik iek saong pacang dom kol kanjiak jhak pambak tame bruk nao haji ngak suan hukum. Tui nan, iew dom urang nao haji brei khan chip ka bruk ngak oh njauk.

Tui Mentri Yulit Campuchia, dalam tuk padeih Roya Khmer dui atah 3 harei meng blaoh, taneh ia ini taduan raok labaih 21 trieu tuai mai sirah rivang. 5 labik pachreih ralo tuai damuai mai yulit di bingun roya Khmer meng blaoh lac Ban ine Phnom Penh saong dom tỉnh Kampong Cham, Prey Veng, Siem Reap saong Kampong Speu. Campuchia daok kham merat peih ngak rilo jalan pacheih tuai damuai mai veik lac sa dalam dom bruk praong piah duah tame ka taneh ia. 

Sa mbang tayun megei baoh taneh khang 7,5 do richte rah tabiak do tinh Aomori, gah Barak negar Nhật Bản, ngak tayun megei rilo labik. Thu tuong Nhat Ban Takaichi Sanae iew bhap bini “brei panduan ba nao labik karei salamat” hadei kakei ka riyak sóng thần. Rajaei Nhat Ban brei ngak tui rilo jalan  piah khik iek saong jalan pacang caga haong bruk tayun megei taneh./.