Patui veik danak dak Mbang nyaom biai ka sa, Quoc hoi mbang ka 16, page ini 20/4, Quoc hoi brei panuac ngan haong Danak dak padang ban Dong Nai daok dalam trung uong. Dom lambaok vakil ndom khang lac, bruk padang ban Dong Nai brei daong prein patagok bahrau oh la ka Dong Nai blaoh daok daong lagaih ka labik gah Meraong saong ka sa negar. Ini lac bruk salih mbuan mbiah ka bruk patagok bruk pasang dui ba bhum palei piah ba Dong Nai jeng ban medin praong, hu bruk klah rabha, pambuak, daong gauk piah gam patagok haong Ban raya Ho Chi Minh, mek hu jalan jeng gah cakrok hu makna di negar…

          Mentri Kong an daok duah thau hatai sahaneng ka Sarak ramik pasiam, pabak dom asal kadha di Sarak 168 di Rajaei ka bruk taong phat hanh chinh khik brei salamat, jalan mbak. Tui nan, Sarak du thao khan brei cambaic laic, langyah catang jang dom bruk ngak suan rah tabiak tuk tabiak jalan, ralo meng lac gah radaih ngak mbang pajeng ba. Cuc Canh sat jalan mbak khan lac, sarak Ramik pasiam pabak Sarak 168 oh tagok jien taong phat dom bruk ngak suan di gah jalan mbak.

Raya tapuk pachreih bac di chung cu, gilang tapuk, ginraong tapuk di bhap bini, sang iek ruak,…lac dom bruk di Ban raya Ho Chi Minh ngak tui Harei tapuk saong ilamo puac tapuk thun ini. Sa dalam dom bruk naih gheih tuk peih ngak bruk ilamo puac tapuk di sang chung cu lac lagaih haong ban raya Ho Chi Minh lac labik hu rilo sang chung cu glaong. Taphia jlan tapuk, ban raya Ho Chi Minh daok hu dom labik tapuk. Bruk ini urak ini daok hu ngak iek dahlau di phuong Cát Lái piah pambak ilamo puac tapuk, ba tapuk nao tal jaik jang haong rahra.

          Harei Tapuk saong Ilamo bac tapuk rah tabiak di Sang bac THCS Trần Hưng Đạo, phường Phú Yên, tỉnh Đắk Lắk ngan haong bruk ngak: alin tapuk, paok jien bac ka anek saih naih joi; yaih khan tapuk saong taom mbaok urang cih vak tapuk; Parang iek thaot binguk “Ilamo dom bangsa” di Kapol Nghe si Thaik binguk Viet Nam; peih bruk parang iek “Dak Lak - Drap ar 4000 thun; parang iek tapuk nghe thuat, radaih pajeng tapuk saong rilo bruk jum pataom, ma-in sambai ka anek saih…

Mang xa hoi bahrau ba tabiak video cuak gilac thaik thaot sa drei ikan ong di tasik Mui Ne, phuong Mui Ne, tinh Lam Dong (labik ban Phan Thiet, tinh Binh Thuan klak). Dalam video, drei ikan ong atah jang 5m, luai nyuk di tasik, gaok tuk mai mblo akaok tagok angaok mbaok tasik. Vil taom dan, rilo rahra saong tuai damuai mboh biak chreih chrai, gam gam pandar phone cuak gilac bruk kan si mboh ini. Dahlau nan, di bhum tasik Phú Quý, jeng rah tabiak tapol ikan ong jaik 100 drei, brei mboh he sinh thai di labik jeng daok khik kajap hu bruk tani tanat, siam mekre.

Tui kuhria mboh birau abih meng Kadung jien Dunya (IMF), Ấn Độ urak ini dang di labik ka 6 dalam angan dom taneh ia ngak mbang praong di dunya, “laik trun” dut haong labik dang ka 4 meng khik hu 4 ini mai. Urak ini, Ấn Độ dnag hadei Mỹ, Trung Quốc, Đức, Nhật Bản saong Negar Anh dalam dom taneh ia praong abih di dunya. Yau nan min, bruk kadun trun oh njauk lac bruk ngak kinh te An Do trun biar. Biak mai, meyah kuhria tui jien negar ini, bruk ngak kinh te An Do khik hu bruk cakrok patagok khang kadang, glong abih di dunya. 

          Hadei bruk mbang akaok meti peih ngak di thun 2025, yai pakacah nduac brei ka robot thaik menuac di Bac Kinh thun ini patui veik dui pachreih bruk caik hatai tuk brei mboh tantu bruk patagok ka ilamo kong nghe saong tukvak pandar. Robot jayak thun ini lac “Lightning” di hang Honor mek hu yai glong abih haong bruk nduac hu 50 minit 26 giay tui hukum kuhria tanut di pakat ta-eng kuhria. Tukvak nduac ini tagok 3 mbang dut haong robot mek hu yai glong abih thun blaoh./.

Anak bruk ruak soi tagok glong di Nhat Ban, dom urang ilamo gah y te daok kakei chip drah samar, caong khin ba uranaih nao klauk jru pacang caga ruak njom mbak mbuan ruak trak. Dom jit ruak kayua dom urang njom ruak meng negar langiu tame, hadei di nan samar njom mbak dalam negar. Di Nhat Ban, vaktu bilan pataih mai meng akaok bilan hè - njauk tame akok thun bac birau - lac tuk tabung glong hu rilo urang ruak soi./.