Harei ini (20/4), Quoc hoi mbang ka 16 hu ngak Mbang ka 2 di Mbang nyaom biai ka sa. Var page, Quoc hoi brei pang Harak ba tagok, Pathau khan maong iek tapa saong nyaom biai di kapul ka: du thao Sarak di Quoc hoi ka dom co che, sarak cakrok samar patagok ilamo Viet Nam; bruk padang ban Dong Nai daok dalam Trung uong… Var biar harei, dom lambaok vakil brei nyaom biai di labik ka bruk ngak hu meng jalan ngak patagok kinh te – xa hoi saong kadung jien karja dahlau thun 2025 saong bruk ngak dom bilan akaok thun 2026…

Brei panuac di Danak dak pataom mbaok 100 urang taha, kaok palei, akok puk palei, khu pho, urang hu angan je, haau janeng di bhum taneh gah Meraong negar, birau peih ngak di Ban Can Tho, Ndai tuong Nguyễn Trọng Nghĩa, Ủy viên Mentri Chính trị, Bí thư Trung ương Đảng, Akok Tổng cục Chính trị Bol lin bhap bini  Viet Nam taong yaom glong bruk ngak di dom urang taha palei, akaok palei, akaok khu pho, urang hu angan je, halau janeng lac dom urang ngak bruk praong di bhum palei, but pajaih, pambuak Dang saong bhap bini, lac labik jia hatai tame di pakat uy, karja saong bhap bini. Ong Nguyễn Trọng Nghĩa caong takre dom urang nan brei kham merat padang ngak dom pakat chinh tri di bhum palei; jhul pakhang bruk ngak mbang kinh te - xa hoi, patrun kathaot khang kajap; padang bruk pakajap bruk khik brei salamat di taong abih bhap bini.  

Tinh Gia Lai daok yam tame tabung glaong bilan thu, pandiak bhang dui atah ngak ka halau ia di dom kraong, ia craoh saong danao kurang samar drah. Bruk kurang ia tuh daong jeng sa bruk duh hatai ngan haong yaok rituh hecta phun pala, abih di nyu nan lac di dom bhum palei gah Pei di tinh. Piah daong dom bein phun, rilo baoh sang rahra brei pah mac jhaok, cakac dalam trun danao piah duah halau ia di ala taneh daok veik. Tinh uy Gia Lai hu pandar peih jalan ngak cakrok pasamar ka kraong ribaong hu taong abih jien buh tame ngak tal 17 ribau ty dong, dalam tukvak ngak 2025-2030.

Hadei tukvak pablei oh hu, baoh la-u di tinh Vĩnh Long saong Dong Thap daok tagok yaom, kurang la-u pablei, urang pala biak uan tabuan. Urang blei di dom tinh ini  blei la-u di urang  ngak nong yaom glong jang bilan dahlau labaih 20 ribau dong sa pluh 12 baoh. Yau ye, la-u xiem bhong yaom labaih 80 ribau dong sa pluh, la-u xiem hijao yaom labaih 65 ribau dong sa pluh. Yaom lac po bein hu laba labaih jaik 30 ribau dong sa pluh. Yaom la-u tagok glong kayua  tame bilan pandiak, rilo urang takre menyum la-u.

Malam kabroi 19/4, Raya Pahat padhih ban raya Ho Chi Minh mbang ka I hu peih pakak haong bruk praong meng dahlau mai, pataom labaih 10.000 urang pahat padhih. Danak dak hu 168 kapul hu mbaok tame, pakacah 44 mon, lac jalan srap gap kapul ka Raya Pahat padhih dalam negar 2026. Harei peih pakak rah tabiak praong hu dom banah ilamo, adaoh tamiak, peih nduac radaih moto ngak mekre. Dom lambaok vakil saong urang pahat padhih ngak adat likau apui ginreih di Gilang Ho Chi Minh – Dhan Jabat di Ban raya Ho Chi Minh.

Lac taneh ia hu rilo bhap bini Islam abih di dunya, Indonesia taduan hu rilo urang ngak Haji abih di dunya ini, labaih 220.000 urang nao haji yaok thun. Yau nan min, urang caong khik nao haji rilo jang bruk pabak brei. Labaih 5,7 trieu urang dalam sarak daok cang, dom urang brei cang tal 26 thun meng hu brei nao. Thun ini, jien bayar lac danak dak Haji  bhian labaih 55 trieu ripah (labaih 3.150 dola My), biak ralo jien ngan haong urang ngak di Indonesia.

       Rajaei Brazil, Tay Ban Nha saong Mexico hu pagun sanya patagok bruk pambuak daong ka Cuba piah patakik bruk srau kadau kan kandah kayua My kak kajap bruk pakauk dui atah. Tukvak jaik ini, rilo meng lac hadei jalan ngak di Venezuela, karja My patui veik patagok dom jalan pakauk ngan haong Cuba, dalam nan hu peih praong bruk patakik jien padai, kak kajap bruk bayar jien, patagok prein kateik ngan haong bruk pajeng ba di tasik saong nang luong…ngak kan kandah luac jalan pasiam kinh te di Cuba.

Jabat chuc nang Trung Quoc birau chap mek sa kapol nyaom ngak tabiak, pablei salih alak ja biak ralo, chap khik hu jaok 20.000 thung alak kaok gam haong rilo kaya karei, kaya papaok, kuhria taong abih tagok tal 260 trieu nhan dan te. Tapa duah thau, gah chuc nang di Trung Quoc brei pasang iek 7 labik di ban Lữ Lương saong Thái Nguyên, tỉnh Sơn Tây, nan dom labik ngak tabiak, padauk kaya, papaok, mbat in nhan mac…