Thu tuong Rajaei bahrau pandar Mentri Pato Megru salah blaoh sarak ka bruk oh mek jien tapuk bac megru pho thong; srap gap saong peih Mbang kacah tamat THPT thun 2026 khik kajap salamat, siam lagaih; peih ngak siam lagaih dom danak dak piah paglaong ilamo pato saong bac megru sap bahsa negar langiu, dak harei dak ba sap bahsa Anh jeng sap bahsa ka dua dalam sang bac. Gam haong nan pandar roh duah, pandar padang dom sang bac gam daok gam bac pambuak pakat dom xa tapen negar di dom labik, bhum taneh karei.

UBND tinh Dong Nai hu harak payua tal Thu tuong Rajaei ka bruk ba tabiak Sarak padang ngak danak dak  samar ngan haong Danak dak dui atah jalan metro Ben Thành - Suối Tiên mbiah tal Pasak karja tinh saong Mblang kapal ahaok dunya Long Thành. Tui UBND tinh Dong Nai , bruk buh jien tame ngak jalan metro pambuak tapak tal TPHCM saong Pasak karja tinh saong mblang kapal haok Long Thành lac bruk ngak brei  trun takik gal jalan; pambuak dom bhum; patago  dom kein lagaih di mblang kapal ahaok Long Thành.

Di tinh Lam Dong daok rah tabiak raya “Bilan jirah rivang he thun 2026” saong patabiak Quy hoach padang Labik jirah rivang pakat negar Mui Ne tal thun 2040, pamaong tal thun 2050. “Ngan haong kadha “Lam Dong – Mai piah ranam”, pagam haong patagok angan je labik jirah rivang “Lam Dong – Luac jalan di Tasik, Bangu, Ceik glai”, tinh Lam Dong oh lac caong khin yaih khan, pachreih ngak jeng bruk chreih chrai ka bilan jirah rivang he pandiak blaoh daok dak harei dak paglaong jitvu, prein meraik labik jirah rivang, pamaong tal patagok jirah rivang karo kajap, tani tanat saong bahrau.

Birau ini, di labik tapen kraong Tiền, xã kaoh pulao Long Phú Thuận, tinh Dong Thap hu rilo labik glut jaleih taneh bika trak; dom labik glut jaleih  mbang tame taneh, cakak jalan pambuak xã, ngak kan kandah tal bruk pajeng ba kaya drap ar saong raidiuk di rilo baoh sang. Bhian mai, glut jaleih taneh rah tabiak dalam bilan ia sua yau nan min, urak ini, rah tabiak di bilan pandiak. UBND tinh Dong Thap caong khin dom jabat brei peih ngak rilo bruk samar drah  piah khik brei salamat ka bhap bini.

Meraong Negar daok rah tapa mbang pandiak di rilo labik ngan haong pandiak glaong, dalam tuk hajan salih bilan rah tabiak suai jang dut haong yau bhian saong hajan di thun ini meda mbuan biar jang kuhria rah tapa di rilo thun. Anak bruk rah tabiak nan, jabat kuhria langik tasik pachreih dom bhum palei samar drah pasang duah majam taoh tathuak ia, ar pacang saong jalan pacang caga bala. Rahra brei srap gap pakajap sang danaok, pasang iek salamat ndien, tui iek tani tanat bruk rah tabiak di langik.

Trung Quoc  daok pasamar ngak salah hukum piah pakhang bruk cambaic laic saong njauk hukum gah daong ngak pahala. Dalam nan dalam nan ba tabiak bruk langyah biak catang saong dom bruk meblah, parabha gauk dom bruk daong ngak suan hukum. Trung Quốc caong khin ngak salah Hukum Daong xa hoi rik tame ngak brei salah, cambaic laic saong  pakhang hatai jia di bhap bini tame ngak brei salamat raidiuk.

Dalam bruk kham merat khik tani tanat bruk pakateik geik tagok karja Myanmar, Lien minh chau Au hu pa-atah tukvak dom jalan ngak taong bhat ngan haong Myanmar tal bilan 5/2027. Dom jalan ngak ini hu ngak dang drap ar, pakauk nao mai saong pakauk pajeng ba phao karaong ngan haong 105 menuac urang saong 22 gah phun jien hu pandar mbang akaok meti hadei tuk pajaleih bol lin bilan 02/2021 saong mbang kateik geik dom urang karei jalan sahaneng hadei nan.

Meng harei ini labaih 60 rajaei brei hu mbaok tame ginum biai dunya akaok meta dalam adit ini piah ginum biai ka bruk pambak tame  menyek. Ginum biai rah tabiak dalam darak pasar menyek di dunya trun tagok rilo saong yaom xang menyek glong. Njauk caik hatai lac oh hu mbaok di dua taneh ia praong di dunya Mỹ saong Trung Quoc./.