So Ilamo saong Pahat padhih Ban raya Ho Chi Minh bahrau peih pakak Jalan Thaot binguk. Ini lac sa dalam dom danak dak salam uan jak jeng di Nyaom roya lambaok vakil dalam negar mbang ka XIV di Ndang. Bruk ngak jeng “Jalan thaot binguk” hu maong yau lac bruk patui veik saong paglaong yaom kaom di labik ilamo gheih karei ini, rik daong ngak meda ilamo mbaok meta di ban medin pasak. Bingun ini, di Bein bangu thaik thaot seni nghe thuat Chi Lăng saong jalan Đồng Khởi – Nguyễn Du jeng rah tabiak labik parang “Kajap takai di ala hala dok Ndang – Gheih ghang ban raya angan Wa Ho”…

Sang iek ruak Đa khoa Trung uong Can Tho birau padang ngak Danak dak “Klak rabha anit ranam” mbang ka 9 haong urang ruak, rai diuk kan kandah. Langiu alin jien, danak dak  daok rik jien ngak pahala piah pambak praong dom ilamo siam gheih daong ka bhap bini.  Tapa 8 thun peih ngak danak dak, Sang iek ruak Đa khoa Trung uong Can Tho jak ba hu 37 ti dong piah daong ka labaih 8.800 mbang urang ruak. Thun 2025, sang iek ruak daong prein ka labaih 2.600 mbang urang ruak kan kandah kuhria jien tagok tal labaih 9 ti dong.

Piah klah rabha anit ranam, pambak tabiak hatai anit ranam rahra dalam bingun Tet, Kong an tinh Vinh Long pambuak haong UB Bhap bini xa Vĩnh Kim, Darak pasar praong Co.opmart gam haong labik ngak pahala peih danak dak “Bal pataih klah rabha – Tet anit ranam”. Bingun ini, Gah padang peih ngak hu alin brei 10 paok jien pachreih bac ka dom adei saih bac baoh sang kathaot saong alin brei 100 paok kaya alin Tet ka mikva gaok kan kandah. Tukvak anak tal, Kong an tinh Vinh Long daok peih ngak danak dak “Bal pataih tapen tasik” di labik tapen tasik Ben Tre saong Tra Vinh klak.

Di dom tinh Bhum taneran kraong Cuu Long, yaom ikan pra tagok glong meng 33.000 – 34.000 dong sa kilo, urang raong ikan mboh chreih chrai, caong khin yaom ikan pra glac veik ba jien mai yau meng 6-7 thun dahlau. Yau nan min,  tui kakei di gah ngak nong, urak ini yaom ikan pra  tamo  glong min urang raong juai jak gauk peih praong taneh raong,  raong njauk tui tukvak piah bruk pablei tabiak hu tani tanat, khik kajap angan je ikan pra Viet Nam. Thun 2025, jien mek tame meng ikan pra di Viet Nam hu jaik 2,2 ti USD, tagok 8% dut saong thun 2024.

Bruk njom ia mbak di tinh Dong Thap dak harei dak glaong tagok dahlau Tet Nguyen dan nethak Asaih Waw 2026. Cambaih laih lac, meng harei 13 tal 18/2, di angaok kraong Tiền, tanut ia mbak 4g sa lit njom tame dalam mblang hamu labaih 25-30km, hadei nan patrun rah rah. Thun ini, njom ia mbak hu kuhria lac biar jang thun dahlau, min jeng pambuak tal bruk ngak mbang saong daok dang di rahra di dom labik tapen kraong, bhum puac halau kraong. UB Bhap bini tinh Dong Thap daok peih tabiak dom bruk pasang iek catang ka langik tasik, hajan, kraong ribaong, halau ia; pasang duah majam ar pacang, braong ia pasang iek ia mbak, caga bruk mbuan rah tabiak ia ndik, jaleih ar kraong.

Dom labik jaik tathik Nhật Bản daok dalam tuk langik la-ar langaoh saong tuyet laik kapan rilo. Jabat Khi tuong Nhat Ban ba tabiak bruk kakei ka tuyet laik kapal”, gam kakei bhap bini brei caik hatai tal dom kan kandah kayua tuyet. Mbang tuyet laik kapal dui atah meng harei 20/01 mbiah tal ini di Nhat Ban  ngak takik abih 4 urang metai, 26 urang karei njauk rambuac saong sa kapol labaih 10 urang di tinh Aomori lahik.

Hajan praong dui atah meng harei 22/1 ngak ia dauk di 20 labik daok rahra dalam 6 quan di Jakarta - Indonesia. Takik abih 585 baoh sang rahra. Samu haong 1.623 urang, brei tabiak truh sang danaok. Urak ini karja palei daok pataom tame khik kajap ginup dom hatai caong njauk hu ka rahra panduan nao labik karei, dalam nan hu kaya mbang hu ngak dahlau, ia hacih, khan ao, jitvu pahacih sa-at saong dom kaya njauk hu karei.

TikTok khan lac ngak hu salah sa bruk ginum biai yaom 14 ti dola piah padang sa kong ty lien doanh Mỹ, tapa nan plaik njaik  bruk pakauk ngak tui hukum ba tabiak di Quoc hoi negar ini kayua huac rah tabiak sraw kadau taneh ia. Tui bruk ba tabiak, phien ban TikTok di Mỹ brei ngak tui jalan ta-eng, kayua hoi dong khik iek hu 7 urang ngak bruk. Tong thong Mỹ khan brei thau bruk ginum biai ini, sahaneng lac TikTok dalam tangin di dom urang Mỹ saong ngak bruk di taneh ia ini./.