Salam uan Nyaom roya lambaok vakil Mat tran Negar Viet Nam Ban raya Ho Chi Minh mbang ka I, tukvak thun 2025-2030, page ini Ban raya Ho Chi Minh peih pakak labik parang “Mat tran Negar Viet Nam – Paglaong prein khang gul pataom”. Tapa labik parang ini brei mboh bruk gheih ghang siam mekre, anit ranam di Ban raya Ho Chi Minh – ban raya anit ranam, jeng daok cang yaok tukvak, yaok minit piah payua anit ranam tabiak bhum Kreh negar sa tian. Bingun ini dom urang lambaok vakil alin hidiah radaih piah ngak mbang, jien pachreih bac ka anek saih kathaot; jao bruk pasiam pakajap sang daok guk pataom ka dom baoh sang kan kandah… ngan haong taong abih yaom jien jaik 34 ty dong.

Akok UBND phuong Binh Kien, tinh Dak Lak  (ban Tuy Hoa, tinh Phu Yen dahlau diah) birau meyaom saong pok tagok likau meyaom 12 urang khin daong ka labaih 300 bhap bini rahra daok gal dalam ribuk ia sua. Dahlau di nan mbang ribuk ia sua meng blaoh, 12 bhap bini ban Long Thuy, tok hu sasruh ghe sit saong 4 gilai chai li-I oh huac metai lahik, tram rup  dalam ia ribuk luac 2 harei piah dui ba tabiak labaih 300 urang daok gar tavak dalam ia ribuk biak sahanak. Hadei mbang ini, UBND phuong Binh Kien  padang kapol daong bala di phuong gam bol lin hu 12 urang ngak bruk abih hatai.

Anak bruk rah tabiak srau kadau di ribuk ka 15, harei ini, tinh Lam Dong hu brei pakauk taong abih gilai taong mek ikan. Page 27/11, langik jhak pagam saong riyak praong ngak glut jaleih trak jalan ar tasik atah labaih 150m di khu pho Hàm Tiến 1, phuong Mũi Né. Bruk ini ngak kan kandah tapak tal dom baoh sang rahra saong labik pablei salih jirah rivang dalam labik. Anak bruk kuhria ribuk ka 15 njauk kan kandah tapak, bruk jaleih mbuan rah tabiak di rilo labik. Anak meta, kapul chuc nang hu cakak abih labik rah tabiak saong pasiam anak meta dom labik jaleih.

Piah daong ka bhap bini plaik njiak ribuk  ka 15 hu salamat, dom kaoh pulai di dac khu Truong Sa, Lu ndoan 146, Bhum 4 Hai quan peih ngak dom jalan pacang caga, ba tabiak bruk khik salamat ka bhap bini, urang nao ngak mbang di tathik saong bollin ngak bruk. Di dom labik pataok gilai hu labaih 200 gilai ikan ngan haong labaih 2.500 urang nao ngak mbang di tathik  ba tame ar hu siam salamat. Urang jakar, urang lin daong labik mbang huak padeih padei, brei labaih 20.000 lit ia taba saong kaya mbang, daong ka mikva sahanang hatai  dalam tuk ribuk ia sua daok rah tabiak sraw kadau.

Raong glang saong taong mek ikan hadang lac sa dalam dom kein lagaih di tinh Dong Thap. Thun ini, meng langik lagaih saong darak pasar pablei nduac ndap nda nan gah kaya dalam ia dalam thun ini kuhria hu labaih 1 trieu tan, dalam nan ikan hadang raong kuhria hu labaih 934.000 tan. Ikan pra mek ralaow lac gah ndap nda hu makna hu labaih 500 ribau tan, bruk pablei tabiak mek hu labaih 1 ty USD.

Tui urang jakar Hong Kong, Trung Quoc, manuac metai kayau bala apui khauh mbang sang chung cu pak ini tagok tak jaik 100 saong daok labaih 270 urang lahik. Bol lin daong padam apui hu daong diuk 55 urang. Urang jakar dac khu brei 10.000 HKD (labaih 37 trieu dong) jien mbaok daong ka yaok baoh sang gaok kan kandah. Truyen thong Hong Kong khan lac apui khuah mbang ini biak trak di ban kuhria meng dom pluh thun ini.

Dalam kadha ndom meyai payua tal dom bol lin rahra di bingun Dhar phuel, bingun raya hu makna abih ngan haong urang My, Tong thong Donald Trump brei thau, brei samar drah hu bruk pacang cakak dom urang pablei jru phil lac urang Venezuela dalam taneh riya. Dalam rilo bilan tapa, bol lin My hu ngak labaih 20 mbang taong tame dom gilai hu medil lac pajeng jru phil, ngak takik abih 82 urang metai.

Kuhria anak tal meng bilan 6 thun 2027 Australia khik iek catang bruk pablei dom kaya kan pabak vitamin B6 asar glong, hadei mboh dak harei dak hu rilo urang ruka trak saong dui atah kayua pandar rilo jru. Dalam mbang taong yaom jaik abih, Jabat Khik iek Kaya jru Australia hu 103 urang ruak kayua menyum rilo vitamin B6. Dom gru pato di Dai hoc RMIT kakei lac vitamin B6  hu mboh dalam rilo janih kaya, meng dom kaya menyum pabak prein tal kaya karei siam ka rup pabhap./.