So ilamo saong Pahat Padhih ban raya Ho Chi Minh pambuak haong Mban Pathau khan saong Jak ba Ban uy, Kapul Thaot binguk Ban raya Ho Chi Minh bahrau peih pakak Labik Parang dom thaik thaot mek hu yai thuong – Yaih khan thaik thaot Van hoc, Seni Nghe thuat, Bao chi hu kadha “Bac megru saong ngak tui ilamo, jalan daok dang di Ho Chi Minh”. Labik parang iek yaih khan 5 paok thaik thaot dalam nan hu: “Truong Sa saong sang giàn tapa thaot binguk” di Đoàn Hoài Trung – Yai A; “Can Gio – The tran hatai rahra” di Nguyễn Trung Trực saong “Mbaok meta ban raya bahrau” di Giang Sơn Đông – Yai B; “Jaoh jo min oh klak thaoh” di Thúy Hằng saong “Kapul lin sit Ten lua 68 – Srap gap pacang khik Negar” di Kiều Anh Dũng – Yai C.

Yaok thun, dom labik pato megru dai hoc Ban Can Tho palih ruah jaik 30.000 urang tame bac dai hoc, thac si, tien si saong peih ngak rilo danak dak hu makna glong tanut chuan di labik, dunya. Tui So Pato megru Can Tho, ban ini hu 8 sang bac saong phan hieu dai hoc, dalam nan hu 4 sang bac di karja saong 4 sang bac gah langiu; 5 sang bac di Mentri Pato megru; sa sang bac di Mentri Y te; sa sang bac di Mentri Padang ngak saong sa sang bac di UBND ban Can Tho.

Ngan haong kadha “Kadha adaoh pok yam takai bol lin”, Bo Tu lenh Quan khu 9 bahrau peih pakak Lien hoan nghe thuat bhap bini kapul lin pan phao karaong. Hu mbaok di Lien hoan hu 20 kapul nghe thuat, jaik 700 urang jakar, urang pato tamia, urang adaoh, dien vien, urang me-in ragam. Dom danak, kadha gam bahrau gam ndung bak ilamo, pok meyaom Ndang naih gheih, Wa Ho naih gheih, bangsa negar khang karo, taneh ia patagok; pok meyaom 80 thun “Bol lin rahra jum pataom, kham merat daok di labik, ta-eng duah mbang ngui, kham marat taong mesuh khamang” di kapul lin pan phao karaong Quan khu 9, jeng yau dom bruk jak jeng dalam bruk padang saong pacang khik Negar harei ini.

Harei Roya Caiy Dunya thun 2025 daok peih ngak di tinh Lam Dong meng harei 11/11 tal 07/12, kuhria tal bruk pachreih 20.000 mbang tuai damuai saong langiu negar.  Dalam dom bruk peih ngak roya, rilo bruk peih ngak pakat dunya hu peih tabiak yau: Parang iek, yaih khan kaya caiy (te) saong kong nghe ngak caiy salih birau; Nyaom ginum biai paglong angan caiy Viet; Bac megru bruk ngak caiy  pambuak pagam haong urang lambaok saong tuai dunya; Harei roya jalan pho saong ilamo caiy; Bruk ngak yulit sinh thai bhum taneh pala caiy; gam haong dom danak dak nghe thuat, parang iek saong ba drei tame ngak iek…

Sang baha Tum Núp, xa An Ninh, ban Can Tho bahrau peih Harei uan “2 yai glaong abih” di Yai Kacah gaiy Ngo dalam harei raya Óoc Om Bóc – Kacah gaiy Ngo thun ini. Dahlau nan, dalam duah harei rah tabiak mbang kacah gaiy Ngo di angaok kraong Maspero di phuong Soc Trang saong phuong Phú Lợi, di dua asal kadha likei saong kamei, kapul gaiy Ngo di sang baha Tum Núp hu naih gheih truh tapa taong abih di kapul gaiy Ngo piah mek hu yai glaong abih. Ini lac bruk bui sambai praong oh lac sang baha bo daok di taong abih mikva Khmer dalam xa An Ninh.  

Asar kadha seni nghe thuat “Tanjak hadah bilan la-ar dalam glai” daok ngak jeng yawa langik bilan Noel, tui bruk rah tabiak tok di Berlin, Đức meng ngak hu. Nan lac oh labik nghe thuat di nghe si Christoph Bauder, labik ini pambuak lavang meng kan dahlau saong harei ini, pachreih hu rilo bhap bini oh kuhria tui thun umo. Angaok tabung sang tual dom baoh cầu disco saong 600 phun thong Noel cagar tagok, 250.000 baoh gom, sa mblang pachrah praong 400 met vuong saong sa danak dak parang iek gom hadah tui atah jaik sa mon…

Yaok ribau rahra saong tuai damuai hu tuh mai ban ine meng kal Nara, Japon piah hu mbok di harei cakak take rasa bilan bhang, adat bhap bini ini hu meng yaok rituh thun ini. Gah padang peih ngak brei thau, rasa tano tamuh take bahrau yaok thun saong dalam tukvak ini, take lahik talei arak saong jalan darah nduac, nan bruk cakak take oh ngak pandik pandua. Adat cakak take rasa oh lac sa bruk karo salamat bo daok lac sa lambaok ka ilamo di ban medin, hu rahra khik tani tanat yau sa banah ilamo bhum palei dalam raidiuk jaman urak ini.

Rajaei An Do tui kuhria mboh dahlau meda ba mon bac ka tri tue nhan tao (AI) tame danak dak pato megru di anek saih  meng tal 3, meng thun 2026 anak tal, avar jang 3 thun dut saong urak ini. Tui Mentri Pato megru An Do, asar kadha AI hu pagam tame danak dak hu so lieu, tapuk sit saong so lieu online ka gru pato. Kuhria taong abih anek saih Ấn Độ hu mbaok tame dom danak dak pato meng AI di thun 2026 tui kuhria mboh dahlau meda hu tal jaik 200 trieu./.