Tui sarak angan ndo thi Ban raya Ho Chi Minh bahrau hu Thu tuong brei tapa, Ban raya Ho Chi Minh pabak 2 jalan pasei radaih apui, salih ka 10 jalan yau danak dak patagok he thong jalan radaih apui ndo thi tui Sarak 49 di Mentri Chinh tri. Nan lac jalan radaih apui ka 11, jalan tapen kraong, atah 48km nao meng labik akaok Quan Bình Tân saong abih di huyen Củ Chi. Jalan ka 12 nao meng Quan 7 tal Cần Giờ, jeng atah labaih 48 km. Tui danak dak Ban raya Ho Chi Minh brei hu 355 km metro dalam thun 2035. Ban raya Ho Chi Minh jeng kuhria ka jalan ngak salah blaoh 510 km dom jalan radiah ndien metro dalam thun 2045, salih ka dalam thun 2060.

Danak dak “ Xuan Bien phong hatai ranam bhap bini”  Tet thun birau Ula Naih 2025 birau hu peih ngak di 2 xã Vĩnh Hải saong Lạc Hòa, ba sit Vĩnh Châu, tỉnh Sóc Trăng ngan haong rilo bruk ngak ndung bak makna siam lagaih, yau ye: Iek ruak, brei jru oh mek jien ka bhap bini; alin pandap ka baoh sang sarak karja, baoh sang kathaot; alin baoh sang jum pataom ka urang kan kathaot; paok jien bac, sruh radaih juah, tapuk siphau ka dom adei anek saih raidiuk kan kandah. Tapa nan, brei mboh bruk sangka  tal bol bhap urang dom bangsa takik hu pambuak haong Bol lin Bien phong khik caga bruk ngak po doi taneh riya, salamad labik tapen negar.  

Bol lin bien phong tinh Kien Giang pambuak haong UB Bhap bini Ban Hà Tiên jeng peih ngak ralo danak dak “Ban pataih bien phong ngak pandiak tung hatian rahra bhum tapen negar” thun 2025. Dom danak dak hu: bol lin ngak hacih sa-at alam langik tasik saong daong sa baoh sang bhum tapen negar raok Tet, papaok tapei nung, peih harei pasang iek ruak, brei jru oh mek jien saong peih ngak dom kadha me-in bhap bini meng kal ka rahra di phuong Mỹ Đức. Đại tá Huỳnh Văn Đông, Chính ủy Bol lin bien phong Kien Giang brei thau, danak dak ini hu pambak tabiak saong hu makna lagaih tuk ba mai sa harei Tet ginup, trei sir ka rahra bhum tapen negar.

Dalam sa bilan ini, dom bruk uan raok tet di dom bangsa Viet Nam hu padang ngak veik dalam danak dak “Xuan mai haong puk palei” di Palei Ilamo – Yulit dom bangsa Viet Nam. Dom bruk praong di Danak dak “ Darak  bhum ceik glong – Uan raok thun birau 2025”, danak dak daoh tamia bhap bini “Raok ban pataih di palei adei”; padang ngak veik adat  “ Bayar dhar phol” di bhap bini Dao Quần chẹt …Dom harei nan,  Đại đức Kim Tuệ trụ tri baha Khmer saong dom acar, bhik hu mbaok mai baha Khmer bac da-a likau brei akaok thun birau hu rilo siam mekre, khat kadung sara patuah jamo akaok thun ka tuai damuai saong urang bhik, cuh gilau  di baha phap Ấn, Bimon Cam piah likau brei  hangin siam hajan lagaih, kajap karo, haniem siam.

Bruk padang sang daok suan hukum dak harei dak rilo dalam tukvak jaik ini di huyen Cái Bè, tinh Tien Giang. Dom bilan jaik ini jabat chuc nang hu ngak tabiak harak gar piah taong bhat 74 bruk padang suan hukum. Jaik abih lac dom danak dak khang kajap hu padang bahrau hu yaom kaom jien ty. Ribaong 28 atah 25 km, jalan kraong ribaong hu makna pajeng pandap kaya nong di tinh Dong Thap saong Tieng Giang, ribaong ini daok dalam bruk glut jaleih trak. Jabat chuc nang pachreih mikva padang sang daok njauk adat hukum, gam haong nan taong bhat dom danak dak ngak suan hukum.

Urang jakar ngak praong di Trung Quốc brei panuac ghak kakei bhap bini anak bruk sahaneng ka dom ruak sraw kadau  bruk iek ruak hadei COVID-19, tuk rilo urang pandar mang xa hoi ba dom thaot binguk saong video brei mboh dom sang iek ruak  di taneh ia ini ngak bruk tapa prein kayua urang njom virus HMPV ngak ruak jalan suan yawa. Urang brei panuac di Mentri Ngoai giao Trung Quoc  Mao Ninh  khan lac, dom ruak njom mbak di  jalan suan yawa rah biak tabung glong di tuk ini dalam thun. Muk lac Rajaei Trung Quoc  sangka  tal prein yawa di taong abih  bhap bini saong tuai damuai , tui nan kakei lac bruk jirah rivang ma-in di taneh ia ini daok khik hu salamad.

Yaom lac rabuk bilan la-an praong daok rah tabiak di negar Mỹ, Quoc hoi jeng nyaom pataom dalam harei 6/1 piah ba tabiak brei thau dom blah harak phieu urang lambaok cử tri, tapa nan brei mboh bruk jayah ka ong Donald Trump dalam mbang pilih ruah tong thong bilan 11/2024. Quoc hoi Mỹ hu kak kajap dom adat ka bruk taduan bruk pilih ruah hadei mbang srau kadau thun 2021 saong dom kham merat piah bleik cagar bruk pilih ruah tuk nan. Abih di nyu nan lac, adat hukum Pasang iek harak phieu pilih ruah hu salih hu brei tapa thun 2022 piah brei mboh cambaic jang bruk di Phaok Tong thong.

Bhum taneh ndong nam Australia daok gaok pandiak catang, mbuan ba tal apui mbang glai saong karja bang Victoria ba tabiak hukum pakauk apui di ralo labik. Australia daok dalam tuk apui khuah glai biak praong di Bein pakat negar Grampians, bang Victoria, ngak khat lahik trak ka sang danaok saong taneh pala drak. Cuc Kuhria mboh dahlau pandiak di dom bhum taneh meda tagok 45 ndo C./.