Uy mban Mat tran Negar Viet Nam Ban raya Ho Chi Minh hu labaih 15.000 mbang rik daong ka bhum ribuk, ia sua kuhria taong abih jien jaik 225 ty dong, gam haong rilo ndap nda kaya njauk hu hu taong abih labaih 7 ty dong. Meng bruk rik daong hu makna ini, Uy mban Mat tran Negar Viet Nam ban raya Ho Chi Minh hu rabha jeng 9 mbang payua jien saong 8 mbang pajeng ba ndap nda kaya tal dom bhum palei njauk khat lahik trak kayua bala, ngan haong taong abih jien daong hu labaih 167 ty dong, daong rahra samar drah truh tapa kan kandah, tani tanat raidiuk saong pasiam bruk ngak mbang. Daok di var taduan meng biar harei kabroi 12/11, hu 17 labik, gah ngak mbang pablei salih daong jien saong ndap nda kaya hu labaih 4 ty dong.

Tinh uy Dak Lak daok pataom tame pasang iek, langyah dom danak dak suai ngak, dui atah tukvak, mbuan ngak khat lahik, palai pajua. Ta-eng drap ar karja hadei pagam tinh, ban, dalam tinh hu labaih 4.000 jabat, dalam nan daok labaih jaik 400 jabatnjuak brei samar kuhria brei pandar. Bi thu Tinh uy Dak Lak Lương Nguyễn Minh Triết caong khin dom pakat brei ngak catang tui jalan sahaneng “ oh hu, oh khin, oh takre, oh cang mbang jien padai”; jhul pakhang bruk pato pakai jalan diuk rai ka urang jakar, brei sahaneng patak pataom, ngak bruk tapak hatai brei kuhria ngak salah blaoh dom drap ar di karka daok labaih.

Thun ini, taong abih gah jien rik daong pakat karja di tinh Dong Thap lac labaih 17.000 ty dong. Tal tukvak ini, taong abih yaom kaom bayar phun jien pakat karja di tinh mek hu jaik 8.500 ribau ty dong, mek hu 62% jalan ngak di Thu tuong Rajaei, daok dalam dom bhum palei hu bruk bayar jien kuhria rah tapa grauk dalam negar. Tukvak anak tal, tinh Dong Thap patui veik tui iek dom danak dak daok peih ngak; srap gap ka bruk buh jien tame, kham merat bayar jien 100% phun jien hu jao brei.

Ruak pandiak tabiak darah di dom tinh, ban di bhum Taneran kraong Cuu Long daok peih ngak sraw kadau. Kuhria meng kaok bilan 11 mbiah tal ini, dom urang ruak pandiak tabiak darah tagok glong dua mbang dut saong bilan dahlau, urang ruak trak tagok samar, rilo uranaih ruak tame iek ruak oh hu laneng gaiy piah ndik. Bac si Chuyen khoa II Nguyễn Huỳnh Nhật Trường, Akok khoa  Ruak Pandiak tabiak darah di Sang iek ruak Nhi đồng Ban Cần Thơ kakei dom maik ame mboh anek bik pandiak juai iek lap. Meyah tal harei ka dua  bo oh mboh trun pandiak ye brei ba uranaih  tame labik iek ruak piah hu dut iek ruak, dil sumu.

Di tinh An Giang, hajan angin gam haong ia ndik tagok glaong dom harei tapa ngak khat lahik rilo sang rahra saong njam patam, phun mbang baoh. Hajan angin ngak jaleih, papeih pabung 9 baoh sang di dom xa Bình Mỹ, Đông Thái, Phú Tân saong jaoh jaleih gang ndien trung the. Ia ndik tagok glaong ngak ia dauk labaih 1.700 baoh sang di dom xa Vĩnh Hòa Hưng, Long Thạnh… Kuhria taong abih khat lahik labaih 2,3 ty dong. Tinh An Giang hu peih dom bruk piah samar chip pasiam kanjah jhak di bala, samar drah tani tanat raidiuk rahra.

Rajaei Thái Lan harei kabroi brei thau bruk sanya pagol pambuak abih gah piah pacang caga kol pachot pagat, tui nan brei thau dom bruk cap mek dom kol dius. Thai Lan  jeng tut ngan dang peih Nyaom biai Tu lenh Cảnh sát dom taneh ia ASEAN mbang ka 43 di ban Bangkok, ngan haong kadha “Pambuak bruk: Cap mek kol pagat, pacang caga pablei salih ja saong khik iek bhap bini salamat”. Nyaom roya brei tapa Panuac Tuyên bố chung pacang caga urang pagat pablei manuac, khik ka bhap bini hu salamat.

My brei mboh kapul ngak gilai mblang kapal ahaok par Gerald Ford hu par tal labik My Latinh, brei mboh ka bruk leo thang di bol lin My dalam tuk bruk pambuak di dua negar ini dak harei dak srau kadau. Tal ini, My hu peih ngak 19 mbang taong tame dom gilai di Venezuela medil lac pajeng jru phil di bhum tasik caribe saong My Latinh, ngak ka takik abih 76 urang metai. Gaok mai, My daok tuel jien alin tagok tal 50 trieu dolla ka khau tin ba tal bruk mek kareik Tong thong Venezuela Maduro pambak tame dom bruk ikak pablei jru phil.

Mentri Pablei salih Trung Quoc birau ba tabiak bruk ramik pasiam “ Sarak angan jru hoa chat mbuan ba tame ngak matuy pablei tabiak negar ka dom taneh ia, bhum taneh jiak taphia”. Tui nan, Mỹ,  Mexico saong Canada hu ba tame sarak dom taneh ia khik iek ka bruk pablei tabiak negar langiu 13 janih jru. Bruk ba tabiak nan dalam tuk Trung Quốc saong Mỹ birau ginum biai njauk gauk ka bruk pacang matuy, njauk ndem tal lac bruk pasang iek jru fentanyl./.