Tui sarak dak angan Angka so ban raya di dunya 2026 di Oxford Economics, TPHCM dang ka 205  dalam 1.000 do thi prang abih di dunya, tagok 81 pakat dut saong thun 2025 saong dang kaok ban do thi Viet  Nam. TPHCM jeng hu ba tame nyaom 5 ban do thi njauk caik hatai  di chau A - Thái Bình Duong, gam Kuala Lumpur, Bengaluru, Thâm Quyến saong Tashkent. Angka so hu padang meng 27 tanut di 5 nyaom: kinh te, urang ngak bruk, raidiuk, alam moi truong saong quan tri khik iek. Klau gah hu lagaih rilo hu Oxford Economics tacei ba patagok GDP samar, sumu jien mek tame glong saong tani tanat. TPHCM kuhria mboh dahlau hu angan dalam nyaom 50 do thi cakrok samar abih di dunya dalam 5 thun anak tal.

Tui Mentri Ngak nong saong Alam moi truong, tal puac thun 2025, taneh ngak padai tui Danak dak sa trieu hecta padai asar siam takik tathuak nerak hu labaih 379 ribau hecta, labaih 180 ribau hecta dut haong bruk kuhria camereip. Meng bruk ngak hu nan takik jien buh tame ngak, paglong jien mek tame saong takik tathuak nerak, bruk ngak ini pachreih hu ralo urang ngak nong di Bhum taneran kraong Cuu Long. An Giang lac bhum taneh praong abih, hu jaik 160 ribau hecta. 

Tinh Vĩnh Long kham merat tal thun 2030 patagok labaih 500 hecta chanh- kruac aih oh hu asar, kuhria labik pala, pabak tui caong takre blei di dom darak pasar dunya. Tui bruk ginum biai, urang ngak nong birau pala hu pasram ilamo ky thuat, daong duah jien tame njauk tui sarak pambuak bruk. Doanh nghiep daong phun jien 5 trieu dong sa baoh sang tui jalan njim phun jien oh mek laba, bayar hadei yaok mbang paik baoh; tui nan blei kruac aih pataom piah duh ka bruk pablei tabiak negar langiu.

Tui dut iek dahlau, El Nino tagok glong dalam dom bilan puac thun ini, langik pandiak mbuan rah tabiak aval dahlau dalam thun 2027 di dunya. Tui Pasak Kuhria ia Langik tathik pakat negar, mbaok ia tathik pandiak tagok meng 1,5 tal ala 2 độ C, El Nino hu taong yaom khang catang. Tuk tagok tal labaih 2 độ C, langik pandiak biak catang. El Nino meda ngak pandiak tagok glong, thu lagu saong kurang halau ia, abih di nyu lac bilan pandiak bhang.

Dom harei tapa, rilo bhap bini di labik akaok kaoh pulao palei Mỹ Khánh 1, xã Mỹ Hòa Hưng, tỉnh An Giang khan brei thau ka bruk glut jaleih ar kraong Hậu rah tabiak sraw kadau. Hu dom labik taneh lac jalan nao, mblang sang, harei ini jeng kraong ia. Dom baoh sang brei yak sang danaok, panduan ba nao labik karei. Yau nan min, daok dom urang oh ka nao hu, yaom lac daok biak jaik labik talah. Ong Nguyen Trung Nam, Pho Akaok UBND xã Mỹ Hòa Hưng khan lac: “ Bhum palei khan brei thau UBND tinh hu jalan daong suai lavik, khik brei salamat jalan mbak, manuac urang,  snag danaok, ndien, ia”.

Tong cuc Papar sap saong Papar binguk Negar Trung Quoc khan lac, mbiah tal bilan 3 thun 2026, yaih khan jru tavao asar kadha suan di dom rayo papar binguk pakat negar hu padam klak. Jabat ini pakhang bruk tui iek, peih praong dom rayo yak bak, pacang  caga bruk rah tabiak gilac. Tong cuc Papar sap saong Papar binguk Negar Trung Quoc brei pakhang njauk tui hukum, khik caga siam lagaih bruk ka urang iek urang pang.

Ai Cập birau ini ba tabiak bruk ngak, caong khin dom mang XH khik iek catang uranaih saong dam dara umo ala 15 thun. Tui nan dom nen tang mang XH oh brei tame atau peih tai khoan di uranaih ala 13 thun. Uranaih oh padam tinh nang nan tal praong umo 15 thun. Dom nen tang mang xa hoi  brei ngak tui dom jalan lagaih saong labaih haong umo urang pandar, pacang dom bruk bleik saleih  umo saong khik iek du lieu di urang.

Sa janih meyao glai sit daok diuk dalam glai hawei di Bolivia hu thau lac sa janih oh ka bhian thau tal meng lavik mai. Meyao atah 46 cm  saong trak labaih 1,4 kilo, sit jang dut saong meyao sang. Bruk ini ngak salih taong abih but pajaih meyao, tuk parabha taphon meyao rimong jeng 5 janih karei di gauk./.