Di var taom mbaok, alin kaya ka urang ndoan, urang ngak bruk gaok kan kandah di bingun Tet Nguyen dan nethak Asaih Waw dalam melam kabroi 27/1, Bi thu Ban uy Ban raya Ho Chi Minh ong Trần Lưu Quang tangi rivang ka raidiuk, bruk ngak di urang ngak kong saong tapa nao alin kaya, daong prein urang ngak kong, urang ngak bruk truh tapa kan kandah, pagam suai haong gah ngak mbang pablei salih. Bingun ini, 200 urang ndoan, urang ngak bruk gaok kan kandah hu Kapul Ngak bruk Ban raya Ho Chi Minh alin kaya, yaok paok kaya alin hu 1 trieu dong saong banah kaya alin hu yaom 300.000 dong.

Mban Chi huy Bol lin Bien phong tinh Gia Lai pambuak haong karja bhum palei peih ngak danak dak “Xuan Bien phong - Ghang la-ar hatai bhap bini” tuk jaik Tet Nguyen dan nethak Athaik Waw 2026. Mban peih bruk hu jao brei 800 paok pandap, yaom labaih 600 trieu dong, alin ka dom baoh sang  dalam sarak karja saong dom baoh sang kan kandah. Tui nan, “Nyaom darak Zero dong” hu rilo janiah ndap nda pablei, rik tame daong raidiuk mikva tuk Tet. Dalam danak dak hu bruk iek ruak, tacei pato langyah saong brei jru oh mek jien.

Di dua tinh An Giang saong Cà Mau, dom jabat, don vi di Bhum 5 Hải Quan peih bruk ba urang hu ngak salah blaoh bruk bol lin mai veik sang danaok. Thun 2026, Bhum 5 Hải quân hu jaik 400 bhap bini tamat blaoh bruk ngak bol lin mai veik bhum palei. Đại tá Mai Đăng Danh, Phaok Tư lệnh, Akok bol lin Bhum 5 Hải quân, caong khin dom bol lin hadei gilac veik palei patui veik jalan diuk rai “ Bol lin Wa Ho - Urang lin Hải quan”, brei ngak tui njauk hukum, kham merat bac da-a, ngak bruk, rik tame padang ngak palei pala.

UBND xã Phú Hựu, tinh Dong Thap birau peih ngak Roya Kaya nong xã Phú Hựu mbang ka I ngan kadha “Kaya nong palei drei - Mbau pahe ranam Phú Hựu”. Roya Kaya nong oh lac meyaom urang nong saong kaya nong bhum palei, bo daok pabak prein khang piah Phú Hựu patagok kaya nong tui njauk lagaih saong khang kajap jang. Tui nan, pabak hatai jia ka urang nong, tuk kaya ngak tabiak njauk jalan, hu urang blei saong doanh nghiep caik hatai takre. 

Anak bruk meda mbuan tamuh jit ruak virus Nipah di dom negar, Pasak Pasang iek ruak hakik Ban raya Ho Chi Minh pachreih kaakei ka dom mai meng bhum hu jit ruak hu mboh dom bruk di prein yava yau pandiak rup, tacing akaok dalam 3 – 14 haei, ba tui patuk, pandik tarakaong, brei pambuak chip tal jabat y te piah hu pachreih kakei saong tui iek. Urak ini ruak kayua virus Nipah oh ka hu vaccine pacang caga haong jeng oh ka hu jru taong padam ruak ini. Rahra bhian rao tangin meng jabon; plaih gaok ciim dhun, pabui njauk ruak; oh nao tal labik ciim dhun pandaok…

Dom jabat ngoai giao di Trung Quoc kakei bhap bini taneh ia ini plaik njiak nao Nhat Ban di bungun Tet Nguyen dan. Kakei bhap bini, kayua bruk salamat cong cong di Nhat Ban jaik ini jhak, dom bruk ngak suan hukum saong bruk duis mong tame bhap bini Trung Quoc dak harei dak rilo. Gah kapal ahaok jeng brei thau bayar jien veik saong salih harak ve oh mek jien ka dom mbang par mai, nao atau daok cang di mblang kapal haok Nhat Ban. 

Sa mbang pandiak bhang di grauk labik pur meraong di Australia hu ngak tagok bruk mbuan apui ghuah glai trak. Nhiet do hu kuhria di Vitoria hu tagok tanut 48,9 do, truh tapa tanut glaong abih dahlau nan di tieu bang lac 48,8 do C dalam thun 2009. Mbang pandiak bhang ngak mbuan rah tabiak apui ghuah glai di grauk Victoria, yaok ribau rahra di dom ban sit palei pala hu pandar panduan tabiak truh di sang.

Ban ine Moscow di Liên bang Nga birau hu melam la-ar biak la-ar kuhria meng akok bilan la-ar thun inij, nhiet do trun biak biar am 18,5 do C. Nhiet do di rilo labik di Moscow trun am 27,6 do C. Urang jakar di Moscow kakei bhap bini  brei caik hatai tuk nao mai, brei ramik pasiam bruk nao mai saong brei pandar dom radaih duh ka bhap bini tuk langik la-ar daok rah tabiak kan thau dahlau./.