Malam harei kabroi 10/11, Bi thu Ban uy Ban raya Ho Chi Minh Trần Lưu Quang hu mbaok di Harei jum pataom gauk taong abih bangsa adei sa-ai thun 2025 gam haong mikva khu pho 5, phuong Binh Thanh. Ndom meyai di Harei raya, ong Trần Lưu Quang ndom lac: “Meng hu guk pataom, bangsa drei hu truh tapa dom kan kandah, jayak abih kol khamang saong daok kajap takai di angaok jalan padang taneh ia ginup meda, siam mekre, anit ranam. Di angaok bruk nan, Ban raya Ho Chi Minh tuk halei jeng lac labik pataom di hatai kham merat, hadah krah saong hatai anit ranam di menuac urang”. Ong ndom lac Khu pho 5, phuong Bình Thạnh lac sa bruk brei mboh gheih ghang ka bruk nan – labik yaok sa urang rahra daong vak jeng kadha ka bruk pambuak pagam daong gauk, klah rabha saong thau ka bruk di drei haong bol bhap rahra.

Akaok UB Bhap bini Ban Can Tho ong Trương Cảnh Tuyên bahrau pasang iek tukvak ngak Danak dak paglaong pakat, peih praong Jalan raya 91, hu atah taong abih labaih 7km, jalan praong 37m. Ong Trương Cảnh Tuyên taong yaom ini lac danak dak biak hu makna ngan haong Ban Can Tho, daong patagok kinh te – xa hoi saong khik kajap bruk daok dang mbang ngui di rahra dalam tinh. Kayua nan hadei mbang pasang iek ini, urang pan akaok UB Bhap bini ban brei pato tacei ka dom gah pataom tame langyah dom asal kadha srau kadau di rahra gaok kan kandah piah ka rahra njauk hatai, meng nan peih bruk ngak danak dak hu lagaih…

Tinh Dong Nai saong Ban raya Ho Chi Minh brei pambuak peih dom danak dak Cát Lái, tatua Long Hưng, tatua Phú Mỹ 2. UB Bhap bini Ban raya Ho Chi Minh ngak jabat pan bruk ngak danak dak buh jien tame padang tatua Phú Mỹ 2 tui jalan pambuak bruk di pakat karja saong menuac urang (PPP). Daok UB Bhap bini tinh Dong Nai ngak jabat pan bruk ngak dom danak dak buh jien tame padang tatua Cát Lái saong danak dak buh jien tame tatua Long Hưng (tatua Dong Nai 2) tui jalan PPP…

Rilo sang bein pala durian di tinh Dong Thap hu paik baoh haong hatai bui sambai kayua njauk bilan, pablei hu yaom. Durian pajaih Ri6 pablei di bein hu yaom meng 60.000 dong/kg, tagok rah rah 10.000 dong/kg dut haong adit dahlau. Durian pajaih Monthong hu yaom labaih 70.000 dong/kg. Ngan haong tanut yaom ini, yaok kg durian, sang bein mek hu laba meng 15.000 – 20.000 dong. Sang bein tinh Dong Thap daok kham merat sangka bein phun, sangka iek praong bruk ngak kajap ar kraong piah pacang ia sua, ia ndik; kak, kataok dhan saong kak baoh piah patakik khat lahik kayua hajan ribuk.

Ribuk tathro yuk tapa rilo xa di Ban raya Ho Chi Minh bahrau ini ngak khat lahik saong papeih pabung rilo baoh sang, jaleih phun hijao gam haong rilo bruk kan kandah karei. Anak meta, hu 7 baoh sang saong sa labik sang tro 10 aduk bilik njauk khat lahik meng papeih pabung, jaleih; 2 sang halan nyuel pala tamun ia njauk papeih pabung, labaih 250 phun kaosu saong 58 phun hijao di bruk jaleih…Taong abih yaom kaom khat lahik kuhria jaik 400 trieu dong. Hadei ribuk tathro, UB Bhap bini dom phuong, xa hu samar chip jak ba kapul bol lin daong rahra ramik phun jaleih, panduan drap ar saong tak gilac pabung sang.

Nyaom biai Pakat glaong ka alam langik (COP30) hu rah tabiak di ban Belém di Brazil. Di nyaom biai ini, dom negar Thai Binh Duong patui veik ieu da-a bhap bini dunya kham merat ngak bruk piah khik ka pandiak la-an di baoh taneh oh tagok labaih 1,5 do C dut haong tukvak dahlau ngak kong. Pathau khan bahrau ba tabiak di Kapul Alam langik dunya brei thau, thun 2025 daok jeng thun ka 2 atau ka 3 hu pandiak pandao abih meng dahlau mai.

Gah ahaok par My patui veik laik tame srau kadau tuk harei kabroi hu labaih 1.500 mbang ahaok par njauk brei tayah klak, brei mboh ka harei ka 4 danak gauk dom mbang ahaok par njauk tayah klak truh tapa tanut 1 ribau. Makna hu brei thau lac kayua kan kandah di bruk brei cakak patakik mbang ahaok par meng rajaei lien bang saong bruk kurang urang ngak dalam kapul pasang iek jalan ahaok par. Mbang kareik bambang rajaei dui atah abih 40 harei tapa ngak ka rilo urang oh hu bayar jien bilan, ngak dang rilo bruk.

Urang jakar Philippines brei thau, ribuk khang Phượng Hoàng hu ngak takik abih 4 urang metai. Dahlau tuk ribuk tuh mai, labaih 1 trieu urang hu panduan, daong patakik urang gaok bala yaom lac angin khang, hajan praong saong riyak tathik glaong. Jabat pacang khik urang menuac kakei caga glut jaleih taneh saong dauk dalam ia jeng daok ngak kan kandah di rilo labik gah Barak negar. Ribuk khang Phượng Hoàng lac mbang ribuk ka 21 tuh tame Philippines dalam thun ini.