Nyaom biai ka bruk ngak hu siam di jalan patagok kinh te – xa hoi thun 2025 dalam page ini, dom urang lambaok vakil ndom meyai lac: Ilamo urang menuac hu brei mboh dalam luac jalan bac megru saong ngak jeng bruk gheih ghang siam mekre di urang menuac. Urang lambaok vakil Nguyễn Thanh Cầm, kapul Dong Thap hu ndom tal asal kadha ka bruk taong paoh dalam sang bac. Bruk taong paoh dalam sang bac daok ngak kan kadnah tal bruk mek hu jak jeng di Viet Nam dalam gah pato megru saong patagok bruk gheih ghang siam mekre di menuac urang. Javap calei ka asal kadha ini Phaok Thu tuong Lê Thành Long breib thau: Mentri Pato megru taduan panuac ndom meyai, brei patui veik pasang iek, pasiam ka njauk haong bruk daok rah tabiak.

Tong Lien doan lao dong Viet Nam parabha 500 harak ve kapal ahaok nao palei saong 500 paok pandap kuhria tui jien 300.000 đồng ka TPHCM, Đồng Nai, Tây Ninh piah mbang Tet. Yaok urang ngak hu daong brei ba tui sa urang dalam baoh sang di drei. Langiu di 3 tinh, ban nan daok hu brei 2.000 harak ve radaih pui nao saong mai gam 2.000 paok pandap  yaom 300.000 dong sa paok piah daong ka urang ngak mai palei mbang Tet. Yaok urang ngak  brei ba tui 3 urang dalam baoh sang di drei.

Ban Can Tho hu rilo danak dak ilamo khoa hoc kong nghe, salih bahrau dalam hadah krah saong salih lek taka so hu jhul khang, pagam haong patagok kinh te - xa hoi; rilo asal kadha, danak dak hu ngak njauk, ba mai siam lagaih. Dalam tukvak anak tal, Can Tho kham merat jeng sa dalam dom bhum palei nao dahlau ka bruk karja lek taka so. Jhul khang salih lek taka so, pandar tri tue nhan tao dalam bruk pasang iek karja saong duh rahra, pamaong tal salih bahrau khang ka harak gar karja, daong ba Can Tho jeng pasak salih bahrau di bhum taneran kraong Cuu Long.

Dalam tinh Gia Lai daok yaok ribau bhap bini rahra oh ka hu harak ba-ar peih radaih hang A1, pataom rilo di dom xa bhum atah bayah, bhum urang bangsa takik. Piah pasiam bruk ini, meng akaok thun tal ini, Kong an tinh Gia Lai peih bruk iek ruak, pato pasram peih radaih piah mek harak oh abih jien, brei harak peih radaih hang A1 ka bhap bini di taong abih dom bhum palei. Bruk piah paglong jalan sahaneng ka mikva rik tame ngak brei patrun, ngak brei patrun bruk bala rah tabiak di jalan mbak dalam bhum urang bangsa takik.

Darak pasar kaya ngak gheih Halloween di Ban raya Ho Chi Minh thun ini biak jua yaom lac jaik tal harei raya. Bruk blei kaya trun khang yaom lac yaom kaya oh tagok, gaok mai hu trun yaom. Rilo kadai kuan patrun yaom 10-20% piah pachreih, min tuai damuai blei kaya jeng oh tagok. Dom urang pablei sit brei thau dom kaya pablei hu tok labaih 30% dut haong thun dahlau.

Bruk kagau glai tame dom labik daok di bhap bini, dom do thi praong di Nhat Ban dak harei dak rilo. Langiu bruk palai pajua njam patam, baoh kayau, phun pala, tame tal dom mblang kapal  haok…, kagau daok pagui kaik manuac. Dalam bilan 10 ini, hu 84 urang njauk kagauk pagui saong 11 urang metai. Rajaei taneh ia ini hu padang Hoi dong pambuak dom bruk kagauk piah biai dom jalan pacang caga.

 Trung Quoc hu ba tabiak 3 phi hanh gia ka bruk par tame alam hu urang peih par hu angan Thần Châu-21 saong brei thau lac ahaok ini brei par tagok balai alam Thiên Cung dalam malam paguh (31/10). Ini lac mbang par hu urang peih par mbang ka 6 dalam tukvak pandar saong patagok blai alam, jeng lac bruk par hu urang peih par mbang ka 37 di negar ini.

Tong thong My Donald Trump birau khan brei peih ngak veik dom bruk ngak iek vu khi hat nhan. Urang dang akaok Nha Trang khan lac, Mỹ urak hu gilang vu khi hat nhan praong abih di dunya saong ini lac bruk salih birau hu peih ngak dalam tukvak ngak bruk di ong. Tong thong Mỹ mboh lac, Nga dang dhi ka 2 saong Trung Quoc  meda dui katut tukvak dalam dua klau thun anak tal, yau nan ye Mỹ brei samar ngak piah pabak sumu./.