Page ini, di mblang kapal ahaok Long Thành, tinh Dong Nai, mbang meti dalam mbang ahaok par pasang iek dahlau dui atah 1 bilan hu brei peih par. Tui kuhria, bruk peih par pasang iek dahlau brei rah tabiak tal abih harei 24/10. Par pasang iek dahlau lac gah ilamo ky thuat brei njauk ngak piah pasang iek, taong yaom saong salah blaoh dom he thong thiet bi ahaok par, khik kajap karo salamat abih dahlau tuk mblang kapal ahaok par Long Thành hu ba tame peih par. Tui pandar di Thu tuong Rajaei, mblang kapal ahaok par Long Thành brei salah blaoh padang di puac thun 2025, ba tame pajeng tuai dalam meteh akaok thun 2026.

Urak ini hu 153 dalam 164 sang iek ruak di TPHCM peih ngak harak iek ruak dien tu, ta-eng sang iek ruak di karja ngak hu sumu taong abih. Sang iek ruak gah langiu karja, sarak iek ruak dien tu hu peih ngak di 80 dalam 90 sang iek ruak. Sarak iek ruak dien tu hu ba mai rilo kein lagaih yau abih takik tukvak iek ruak,takik abih jien saong harak gal hanh chinh. Yau nan min, dom sang iek ruak daok gaok rilo kan kandah, tavak taviay ka ha tang kong nghe, urang ngak bruk gah thong tin. Gam haong, jien peih ngak sarak iek ruak dien tu samar kuhria njauk, ginup, yaom jien iek ruak.

Gilang pariak karja bahrau paglaong danak dak brei masraiy ngan haong gah ngak nong, ngak glai, ikan hadang tagok tanut 185.000 ty dong. Jalan ngak lac pabak veik phun jien laba lap ka tuai damuai hu danak dak, jalan ngak pablei salih dalam gah ngak nong, ngak glai saong ikan hadang. Daok jien laba mesraiy, Gilang pariak Karja brei tanut yaom jien mesraiy mang dong jien Viet Nam biar jang abih meng 1 tal 2% sa thun dut haong jien laba mesraiy kuhria rah tapa tukvak bo gilang pariak nan brei mesraiy.

Glut jaleih di rilo bhum palei pak Bhum taneran kraong Cuu Long daok rah tabiak kan thau dahlau. Ar kraong Tien labik tinh Dong Thap daok glut jaleih khang, ngak kan kandah tal 20 baoh sang di palei Tân Tịch. Glut jaleih atah labaih 150 m, mbang tame dalam taneh 15m. Daok tinh Vinh Long jeng khan brei thau samar bruk glut jaleih ar kraong Giao Hòa. Bhum taneh glut jaleih atah 30 m saong daok jaleih veik tuk mboh hu rilo labik ra-ai birau. Dalam 8 bilan tapa, Dong Thap saong Vinh Long hu labaih 210 labik glut jaleih, laman lamuac, ngak khat lahik trak ralo ti dong.

Dom bilan puac thun, dom baoh sang urang ngak nong ngak bruk pabam phun pajaih di phuong Thuận Hưng, Ban Can Tho daok jal val ngak mbang, duh ka darak pasar Tet Nguyen dan. Taphia dom ndap nda phun pajaih hu bhian pablei, dom baoh sang urang ngak nong daok caga veik rilo janih phun pala hu angan piah duh ka darak pasar Tet Nguyen dan. Kuhria hatai caong di tuai damuai brei tagok khang dalam dom harei jaik tal, nan mikva jeng patagok phun pajaih meng 30-50% yaok janih. Abih di nyu nan lac, yaom kaom hu khik tani tanat di tanut lagaih, brei kein lagaih ka mikva ngak mbang.

Dalam tuk bruk rah tabiak di Trieu Tien mboh oh ka hu siam ralo, daok rah tabiak gam dom bruk kan thau dahlau. Tui Bộ Tong tham mua gah bol lin Han Quoc  page ini 26/9, sa sruh kapal ahaok  CHDCND Trieu Tien yam tapa jalan negar angaok tathik di dua gah Trieu Tien di Hoang Hai. Han Quoc mboh lac “ brei pakhang caga dom bruk dalam dom bruk halei jeng njauk khik kajap bruk ngak po bhum taneh gah Barak”

Kapul bao an Lien Hop Quoc kuhria brei buh harak ka sa sarak kayua Nga saong Trung Quoc ba tabiak piah ngak suai bruk taong bhat veik ngan haong Iran di 6 bilan. Min, tui dom urang pambuak ndom meyai langiu negar, lac sarak ini meda kan si hu brei tapa. Sa sarak hu brei tapa di Kapul Bao an dalam nan hu 15 urang brei hu takik abih 9 harak njauk hatai saong oh gaok bruk cagar di sa dalam lime negar thuong truc.

Tong thong My Donald Trump khan lac jaik kareik pambang rajaei di melam 30 bilan 9 anak meta, dalam tuk nan bruk ginum biai ka jien ndo di Nha Trang saong dang Dan chu oh ka njauk gauk. Tong thong Trump padeih bruk taom gaok dom urang ngak praong gah ndang Dan chu di Quoc hoi, khan lac ong oh taom gaok tal tuk halei gah nan ngak tui njauk bruk ba tabiak./.