Harei ini 28/10, Quoc hoi caik sa harei piah ginum biai ka harak di Kapol Pasang iek saong hukum Sarak di Quoc hoi ngan haong kadha “ bruk ngak tui sarak, hukum khik ramik alam moi truong meng tuk Hukum khik ramik alam moi truong thun 2020 hu ba tame pandar”. Dom urang dalam Quoc hoi mboh lac, negar drei daok dang anak rilo bruk trak damak ka alam moi truong, ngak jhak tal prein yawa di bhap bini saong bruk cak rok patagok khang kajap. Yau nan min,  Hukum khik ramik alam moi truong daok gaok rilo kan kandah, pasiam veik lagaih haong raidiuk harei ini.

Dalam quý III thun ini, Mentri Harak hukum ngak salah 100% bruk peih ngak harak gal, ba-ar bhap bini pambuak tal bruk khik iek rahra saong parabha bruk langyah tui hukum karja. Njauk ndem tal, dalam bruk peih ngak harak gal bhap bini, meng harei 01/10/2024 tal harei 30/9/2025, peih ngak hu jaik 578.000 bruk. Kuhria tui jien abih labaih 150 ribau ti dong, tagok jaik 5%  dut saong thun 2024.

Kapol urang Ngak nong TPHCM birau tabiak mbaok Chi hoi Urang ngak nong kaya meda. Ini lac bruk ngak birau piah pataom tame, pambuak saong patagok prein khang di kapol urang ngak ngak mbang, pablei salih naih joi, pamong tal bruk ngak nong tui jalan birau, siam lagaih saong khang kajap. Piah daong ka urang hoi patagok khang kajap, Kapol urang ngak nong TPHCM daok padang kapol gru iek ruak pala phun, kayua dom urang hoi hu ilamo, piah tacei pato ilamo ky thuat, jao brei ilamo, kong nghe ka dom bruk ngak nong.

HĐND tinh Gia Lai mbang XII khan tapa Sarak ka bruk karja daong jien kuhria raidiuk ka urang nao ngak mbang di tathik oh ginup jien blei mac jamraih nao taong mek kaya ia tathik. Dalam nan hu daong ka klau po gilai 3 trieu dong sa bilan saong 30 kilo brah sa urang sa bilan ngan haong urang gaok kan kandah. Bruk daong nan lac jalan langyah  piah daong ka urang nao ngak mbang di tathik  duah hu jien  tani tanat raidiuk dalam tuk salih bruk ngak, tui nan rik tame lang talaih pakat “the kanjik” di UB chau Au.

Mbang ia ndik puac bilan 10 ba tal rilo labik di TP.HCM dauk dalam ia. Dalam nan hu phuong Bình Quới, Thủ Dầu Một lac sa dalam dom labik gaok kan kandah trak, rilo labik ia sre tame dauk dalam meng meteh met tal 1 met. Urak ini, dom bhum palei daok samar ramik caga beik ar pacang, pakajap ar kraong ribong. So Ngak nong saong Moi truong gam haong karja dom bhum palei, don vi jak ba dom gah, ndap nda, mac jamraih  piah ngak brei pakhang ar kraong ribaong, njuk tathuak ia tabiak, brei urang ngak bruk di dom labik mbuan glut jaleih. 

Labaih 8.000 mbang ahaok par di grauk negar Mỹ brei padeih kayua kurang manuac ngak bruk pasang iek jalan par angaok langik dak harei dak rilo, dalam tuk nan rajaei  lien bang daok kareik pabah mbang ka 26. Bruk labaih 13.000 urang ngak bruk saong 50.000 urang khik iek brei ka mblang kapal ahaok hu salamat oh hu bayar jien bilan kayua rajaei kareik pabah mbang, ba tal dom urang likau padeih piah iek ruak blaoh nao duah bruk karei ngak dak harei dak rilo.

Cảnh sát Thái Lan daok samar peih bruk pasang iek saong tui iek labaih 1.000 urang negar langiu tame mai meng jalan negar Myanmar. Dahlau di nan, bol lin Myanmar patuh phao tame dom baoh sang pambuak tal dom bruk pachot pagat di Myawaddy, yau nan ye yaok ribau urang nan tapa kraong Moei tame Thái Lan piah dauk. Urak ini, gah chuc nang  daok duah thau harak gal di yaok urang, piah hu jalan ba mai veik palei negar atau ba tabiak kaoh tui hukum dom urang pambuak tal bruk tapa negar suan hukum.

Pakistan meda brei kareik pabah mbang meneing bruk brei ahaok par dalam dua harei 28 saong 29 bilan 10, kayua huac oh hu salamat. Bruk pasram bol lin di An Do rah tabiak di dua negar Ấn Độ - Pakistan daok rilo kan kandah hadei mbang taong tame harei 22/4 meng blaoh ngak 26 urang tuai metai./.