9 bilan akaok thun ini, bruk cakrok patagok kinh te (GRDP) di tinh Tay Ninh kuhria hu 9,52%, patui veik khik labik dang akaok bhum Pur Meraong Negar (Ban raya Ho Chi Minh hu 7,07%; Dong Nai 8,86%) saong dang di 8/34 tinh, ban dalam negar. Tukvak tapa, dom danak dak pasiam labik buh jien tame, taoh talaih kan kandah ka gah ngak mbang pablei salih hu peih ngak samu, daong Tay Ninh patui veik brei mboh labik ini lac labik dui pachreih dom gah buh jien tame dalam saong langiu negar, brei bruk karo kajap ka jalan cakrok patagok.

Piah mek hu jalan cakrok patagok dalam thun hu 8%, UB Bhap bini tinh Dak Lak brei mboh GRDP klau bilan puac thun brei hu tagok labaih 10%. Ong Tạ Anh Tuấn, Akaok UB Bhap bini tinh Dak Lak pandar dom so, dom gah saong bhum palei brei pataom tame glaong, jhul khang tukvak pandar phun jien karja, abih di nyu nan lac dom danak dak hu makna; jhul khang bruk meraik yaom taneh piah salah blaoh jien mek tame di kadung jien; gam haong nan taoh talaih kan kandah ka dom danak dak langiu di kadung jien karja; jhul khang bruk pasiam bruk kraja saong khik kajap an ninh siam mekre.

Hadei bruk peih ngak di Uy mban Mat tran Negar Viet Nam Ban raya Ho Chi Minh, So Y te Ban raya ieu da-a taong abih gah rik daong 10.000 “Kadung jru baoh sang” piah daong rahra dom tinh gah Barak pasiam kanjah jhak di ribuk ia sua. Ban raya Ho Chi Minh hu salih 5.000 kadung jru tal So Y te dom tinh Sơn La, Ninh Binh, Cao Bang, Tuyen Quang saong Ha Tinh. Dom sang iek ruak pakat karja dalam Ban raya Ho Chi Minh patui veik rik daong 5.000 kadung jru piah daong rahra dom tinh gah Barak.

So Pato Megru tinh Ca Mau, bahrau ba tabiak tacei ba dom sang bac pakat karja dalam bhum, patui veik ngak dom paok jien mek tame daong bruk pato megru langiu di jien bac. Tui nan, dom paok jien mek tame langiu di jien bac di sang bac pakat karja brei ngak asal kadha “mbaoh tangin tantu cambaih laih di sang bac saong amaik ame”, oh glaong jang yaom jien ba tabiak. Dom sang bac brei padang jalan ngak, kuhria cambaih laih, saong bruk mek jien tame brei ka njauk bruk, kali kalih, siam lagaih, khik kajap bruk mek tame njauk – buh tabiak ginup.

Ia ndik di Ban Can Tho daok tagok saong kuhria tapa tanut njauk kakei caga ka III dalam dom harei anak tal. Tuk ia ndik tagok glaong dom labik dhaong biar, tapen kraong di Can Tho hu mbuan njauk ia dauk, ngak kan kandah tal bruk daok dang, nao mai saong bruk ngak mbang, pablei salih di rahra. Piah pacang caga haong ia ndik, gah chuc nang Ban Can Tho hu brei ngak majam braong, ar pacang ia ndik ka njauk lagaih; bhian pasang iek, khan brei thau bruk daok rah tabiak piah pacang caga; pakajap ar pacang di labik mbuan gaok kanjah jhak.

Yai Nobel Vat ly thun ini ieu angan klau urang ilamo khoa hoc di My dalam nan hu John Clarke, Michel H. Devoret và John M. Martinis ngan haong danak dak roh duah ka luong tu. Yai thuong hu angan ini hu peih tabiak dom kein lagaih bharau piah patagok rairah ilamo kong nghe luong tu patui veik, dalam nan hu mat ma luong tu, mac tinh luong tu saong cam bien luong tu. Dom asar pataom ndien gam haong gauk nao tapa janih sieu dan, ngak jeng majam yau dom asar nan lac sa asar lam taong abih mach.

Gilang pariaj Dunya (WB) hu paglaong kuhria cakrok patagok kinh te di Trung Quoc thun 2025 tagok 4,8%, glaong jang dut haong tanut 4% hu ba tabiak di bilan 4. Ngan haong kuhria lagaih nan, gah langyah kuhria Trung Quoc meda brei ba tabiak veik dom paok pachreih piah mek hu jalan cakrok patagok labaih 5% dalam thun ini. Min, WB jeng kakei dahlau bruk cakrok patagok di nen kinh te praong abih di Dong A brei suai gilac, tok daok 4,2% di thun 2026 kayua bruk pablei tabiak suai gilac.

Harei 11/10 anak tal, di Moscow, Lien bang Nga brei rah tabiak mbang chung ket Pakacah papar binguk Dunya Kadha adaoh Uranaih ta-eng Paneh cuak hu angan “Rairah di khol drei”. Ini lac danak dak ragu ragam praong ka thun umo meng 9 tal 16. Mbang pakacah thun ini dui pachreih uranaih mai meng 16 negar, dalam nan hu Nga, Trung Quoc, Brazil, Nam Phi, Hoa Ky, An Do, Uzbekistan, Ai Cap saong rilo negar karei. Dom adei adaoh dom kadha kayua drei paneh cuak, brei mbaoh bruk naih gheih di drei saong bruk hadah krah dalam ragu ragam di rairah uranaih.