Caong khin brei hu labaih 544.000 ti dong buh tame ngak 8 jalan pasei saong 4 sang ga di Ban raya HCM, tui bruk ba tabiak di Cục Jalan pasei Viet Nam pok tagok Mentri Padang ngak. Dom jalan pasei hu quy hoach  atah labaih 500km, pambuak Ban raya HCM haong dom labik nan lac Vũng Tàu, Cần Thơ - Cà Mau, Lộc Ninh, Mộc Bài, gam haong dom labik pabah tathik. Dalam nan, tal thun 2030 kuhria brei hu labaih 92.600 ti dong, brei padang 3 danak dak praong nan lac jalan pasei peih drah samar meng gah Barak – Meraong negar, Biên Hòa - Vũng Tàu saong TP. Hồ Chí Minh - Cần Thơ.

Di Ban raya HCM urak ini hu labaih 4,44 trieu urang hu dut iek prein yawa camereip, kuhria hu jaik 35% bhap bini. Dalam 168 phuong, xa, dac khu, hu 112 bhum palei ngak hu 30% tagok. Bhum palei dut iek ruak hu ralo abih lac xã Thạnh An hu labaih 98%. Langiu di nan, Sở Y te peih ngak tui khaw tin dut iek prein yawa camereip di Ung dung Cong dan so. Jalan ngak ini daong ka bhap bini oh ngak harak gal, gam takik brei ba-ar, cih vak saong mek du lieu meng tangin ka Blai Y te.

Ia ndik tagok glong dom harei tapa ngak glut jaleih ar pacang binek, ba tal 15 hecta  bein phun mbang baoh di xã Tân Phú, tỉnh Vĩnh Long, khat lahik. Yau sang ong Ngô Văn Ba, xã Tân Phú khat lahik 1,7 ha durian daok tabiak bingu. Hadei tuk rah tabiak, karja pak ini brei pasang iek, taong yaom. Anak meta, UBND xã jak ba bhap bini langyah tui jalan “ 4 bruk di labik”. UBND xã caong khin dom don vi chuc nang brei ngak dahlau, brei kareik pabah brong ia Tân Phú saong pabah ribaong Bến Rớ piah pacang ia ndik, piah lagaih ramik pasiam veik labik glut jaleih. 

Dom harei tapa, kayua langik rilo hajan praong gam ia kraong gah angaok  tuh mai ba tal ia dom labik di bhum Dong Thap Muoi  di tinh Tay Ninh tagok samar, kuhria rah tapa hu meng 3-5 cm sa harei. Njauk ndem tal dom ar binek talah, ia duak yaok pluh hecta padai thu đông daok jiak yuak. Piah daong bhap bini yuak padai samu, Bo chi huy Bol lin tinh Tay Ninh samar daong mikva yuak padai, pataom tame saong pajeng padai tagok labik glong.

Peih ngak Danak dak “ 500 harei melam duah, pataom saong duah angan talang liet si”, Mban tacei ba 515 ban ray Can Tho mek mau 214 atau talang liet si oh ka thau angan di Kubo liet si xã Long Phú piah dut iek AND. Bruk mek mau  AND ngak tal harei 17/9. Bruk mek mau AND lac bruk hu makna praong, duah thau angan dom liet si oh ka thau angan je, rik tame ngak siam bruk duah, pataom saong duah njauk angan di liet si; njauk hatai caong mong akaok di  gauk gar saong baoh sang liet si.

Gah sirah yulit Thai Lan daok kuhria caga raok tuai Trung Quoc padeih padei dui atah 13 harei Tet Trung thu saong Harei negar Trung Quoc. Tong cuc Yulit Thai Lan kuhria dahlau hu labaih 250.000 mbang tuai damuai Trung Quoc mai sirah masa dom harei nan. Mbang ini bruk yulit Thai Lan daok patagok siam meng akok thun hu labaih 21 trieu mbang tuai damuai dunya, mek jien tame labaih 1.000 ti baht (labaih 30 ti USD). 

Rilo kong ty jien padai saong gilang pariak dunya kuhria mboh dahlau Cục Dữ trữ Lien bang Mỹ brei patagok jien laba dalam adit ini hadei du lieu brei mboh dom taka so lam phat bilan 8 tagok glong jang bruk kuhria dahlau di nan, Bruk salih nan rah tabiak hadei dữ liệu  kuhria mboh yaom blei pandar saong yaom ngak tabiak di Mỹ tagok glong labaih 100 USD sa thung dalam tuk bruk cuang kandah di Trung Dong dak harei dak sraw, huac kanda bruk lam phat daok tagok glong veik.

Bruk pandar mac tinh daok pambak ralo di dom sang bac di Australia. Rilo sang bac, anek saih tieu hoc bhian pandar mac tinh. Yau nan min, huac kanda bruk ngak kan kandah tal uranaih nan ye karja bang New South Wales brei takik pandar mac tinh dalam sang bac. Yau ye, oh brei ka uranaih mam non pandar mac tinh dalam sang bac. Dom pakat bac karei jeng ba tabiak dom asar kadha bac cambaic laic. Langiu di nan, gru pato oh brei mbai ka anek saih pakat 1 ba nao sang ngak bo dom adei ngak mbai tui ilimo taka so.