Tui kuhria bahrau abih meng Mentri Bangsa saong Agama, urak ini hu 23/34 bhum palei hu khan brei thau salah blaoh bruk brei abih baoh sang oh daok taik tahak, kuhria labaih 283 ribau baoh sang daong urang kathaot, jaik kathaot daok dalam huyen kathaot di Danak dak pakat negar ka bruk patun kathaot khang kajap; urang buh rilo pren yava ka katmang saong gauk gar dalam sang bol lin plang lahik meng kal. Urak ini daok 11 bhum palei oh ka salah blaoh ye hu peih ngak taong abih dom baoh sang brei daong padang pasiam. Kuhria dahlau harei 20/8 brei salah blaoh jalan ngak di danak dak.

UB bhap bani tinh Cà Mau daok ngak salah blaoh dom bruk ngak puac di abih piah patabiak sarak, daong ba bruk ngak mbang ngak huak ka dom baoh sang urang kathaot, urang jaik kathaot, baoh sang hu rai diuk kan kandah saong bhap bani urang bangsa takik, ngan haong taong abih phun jien labaih 623 tỷ đồng. Jalan ngak ba tabiak, tal abih thun 2027, dalam tinh meda oh daok baoh sang sarak karja hu rai diuk kan kandah; kham merat daong takik abih 70% dom baoh sang kathaot, jaik kathaot saong bhap bani urang bangsa takik hu daong ba piah palaghaih yam tapa truh kan kathaot khang kajap. 

Harei ini, 1/8, Kong an Ban raya Ho Chi Minh peih tabung glaong bruk duah mek kol duis dui atah 2 bilan. Mbang tabiak ngak ini khik kajap an ninh siam mekre, salam raok Nyaom roya Ndang bo dom pakat saong pakacah ngak dom baoh jak jeng pamaong tal dom danak dak pahadar, dom bruk chinh tri hu makna di taneh ia. Gam haong nan, pataom tame meraik dom kapul kol duis mbuan si padang tabiak, kol duis jru phil, ikak pablei dauk, bleik saleik dalam pablei salih saong kol duis angaok jalan dalam ban.

Hadei di labaih 1 bilan peih ngak, jamriak karja dua pakat di dom xã, phường di tỉnh Vĩnh Long hu daok nao tame peih nduac tani tanat ngan haong rilo baoh jeng siam mekre. Bruk langyah ngak harak gar hu peih ngak samar drah, cambaih laih, palaghaih ka bhap bani saong urang pablei salih, ngak brei paglaong baoh jeng siam mekre ka bruk khik iek Karja di puk palei. 

Ban raya Ho Chi Minh ba tabiak jalan ngak tal thun 2030 anak mata hu panduan, ramik brei daok labik karei ka taong abih rahra daok di angaok saong tapen kraong, ribaong; peih lagaih ka ia nduac, pasiam hacih sa-at kraong ia; ngak bruk pasiam ban, pandar taneh tapen kraong, ribaong piah patagok kinh te. Anak mata, dalam thun ini, Ban raya Ho Chi Minh patui veik peih bruk bayar jien, daong ramik nao daok di labik karei saong peih paha mbaok taneh ngan haong dom danak dak kuac kuah, pasiam, pahacih sa-at ribaong daok peih ngak yau ribaong Xuyên Tâm, ar Bắc robaong Đôi, gang taoh tathuak ia Rạch Xóm Củi…

Bol lin Thái Lan saong Campuchia daok peih ngak biak catang bruk padeih patuh phao di labik tapen negar di dua taneh aia. Taphia di nan, Thái Lan meda pambuak bruk haong Campuchia taduan raok gilac dom bol lin Campuchia daok njauk cap khik di negar ini. Rajaei Thái Lan jeng patabiak adat hukum pakuak oh brei pandar janih kapar haok oh hu manuac urang peih di grauk labik dalam negar kayua lac piah khik grap tanat an ninh. 

Hoi dong Quoc phong saong An ninh Negar Myanmar hu ba tabiak thiet quan luat di 63 ban sit. Sarak thiet quan luat hu ba tabiak piah brei kein lagaih ka dom bruk karja, sron mbon salamat saong hukum di dom labik nan saong hu brei ngak dalam 90 harei. Dahlau nan, karja bol lin Myanmar hu brei thau brei patruh bruk samar chip dalam negar piah jhul khang bruk srap gap ka mbang pilih ruah taong abih dalam bilan 12 anak tal.

Rajaei Ấn Độ meda peih ngak taong abih jalan ngak caong khin piah pacang khik kien laba di taneh aia. Panuac ndom ini hu ba tabiak tok sa harei hadei di tuk Tổng thống Mỹ Donald Trump brei thau ka bruk mek jien je 25% ngan haong pandap panda blei tame meng Ấn Độ. Ấn Độ jeng khang panuac ndom lac rajaei meda patui veik kham merat kayua kein laba di urang nong saong bruk ngak nong di Ấn Độ, jeng yau bruk jhul pakhang bruk kaya meda saong grap tanat pandap panda kaya mbang.