“Danak dak pachreih urang blei praong mbang ka 2 thun 2026 kayua Mentri Kong thuong peih ngak meng harei 1/12/2026 tal harei 5/1/2027 di negar. Danak dak pamong tal bruk jhul pakhang blei pandar dalam negar, daong ka bruk ngak tabiak, pablei salih, gam paglong jalan sahaneng di urang blei pandar kaya kan, jitvu Viet Nam. Njauk caik hatai, yaom kaom ndap nda, jit vu kaya pachreih urang blei saong trun lap lac 100%. 

Tinh Ca Mau pataom tame lang talaih dom labik gar tavak ka sarak saong harak gal  karja. Ca Mau jhul pakhang bruk ngak harak ho so tai khian VneID pakat 2,  hu pagam dom jitvu pandar yaok harei saong daong ka bhap bini peih tai khoan gilang pariak, brei bayar jien mbaok. Tui nan, Ndoan dam dara saong Kapol urang kumei “ nao tame yaok jalan, tame tal yaok baoh sang” piah tacei pato pagam VneID, pagam harak ba-ar di urang dalam nan.

UBND thành phố Đồng Nai mbaoh harak Danak dak buh jien tame, ngak brei patagok taong abih gah pato saong bac di 8 xã bhum taphia negar  tal thun 2030, pamong tal thun 2045. Kuhria abih tih  jien peih ngak danak dak jaik 1,2 ti dong piah ngak 53 sang bac. Thun ini, dom xã bhum taphia negar hu brei phun jien ngak 25 danak dak sang bac. Mbiah tal ini, hu 11 danak dak padang ngak saong 14 danak dak daok jaik ngak.

Tui Rayo Khí tượng Thủy văn TP. Cần Thơ, ia ndik di Can Tho dalam dom harei jaik ini tagok samar, pakat 3, ngak ia dauk dom jalan kan kandah ka raidiuk, bruk nao mai di bhap bini.  Tui ong Phạm Đức Đoàn, Yam ndoc Rayo Khí tượng Thủy văn Ban raya Cần Thơ, meng ini tal pauac thun, meda hu meng 4 tal 5 mbang ia ndik, ngak dauk ralo labik. Ia tagok di dom balai dalam ban raya tagok tal pakat III, meng 0,15 tal 0,30m.

Daok di tinh Vĩnh Long, ia tagok di dom kraong, ribaong di tinh pakat 1 tal pakat 3. Rayo Khí tượng Thủy văn Vĩnh Long kakei dahlau, ia ndik meda  ngak dauk ralo labik dhong, labik kan tathuak ia dalam tinh, abih di nyu lac dom labik tapen kraong, kaoh pulao, labik ar pacang. 

Trieu Tien lac hu peih bruk pasram lin di puac adit blaoh piah ngak iek phao karaong, bol lin, tên lửa cuh meng atah di bol lin negar ini. Hadei bruk nan Jabat an ninh pakat negar  Han Quoc peih bruk ginum biai  samar chip  piah taong yaom ka bruk nan. Bruk pasram lin cuh ten lua di Trieu Tien rah tabiak hadei Han Quoc, Nhat Ban saong Mỹ  pasram haong gauk.

Tui hrak mbao Anh The Guardian, dom kapol nyaom ngak po, yaok rituh urang du cu, dalam nan hu labaih 40 uranaih oh ka thau umo thun hadom, oh thau nao labik halei hadei tuk Anh ba gilac mai Pháp tui ginum biai “ sa urang salih ka sa urang”. Danak dak salih urang di cu nan hu Paris saong London padang di bilan hè thun dahlau saong bhian taong yaom bruk ngak di dua negar. Yau nan min, danak dak daok rilo kurang, kan kandah.

Bol lin urang jakar Philippines duah mboh rilo rup atau urang di kapal gilai pajeg tuai apui khuah mbang di tathik tinh Palawan di harei 9/9, kuhria abih tih urang metai tagok tal 76 urang, dalam nan daok 13 urang lahik. Urak ini, apui mbang oh ka thau kayua hagait. Dom jabat  chuc nang  daok duah mek urang peih kapal gilai nan./.