Baoh sang halei caong khin ngak dien ia harei meda hu daong ngak. Dalam 5 harei ngak bruk kuhria meng tuk taduan hu harak, dien luc bhum palei  brei tacei pato pambuak, piah khik hu salamat gom ndien. UBND pakat xa meda tacei pato dom bruk njauk brei ngak, piah pagam dien hu lagaih saong pacang  caga apui khuah lagaih haong sang daok di rahra. Viet Nam labaih 28 trieu baoh sang. Bruk ba tabiak tal thun 2032 hu labaih 50% dom baoh sang hu pagam dien ia harei di tabung sang.

Mentri Pato megru birau ba tabiak Bruk palih ruah anek saih bac dai hoc, cao đẳng thun 2026 hu rilo asar kadha makna praong dalam. Tui nan anek saih tut angan, brei pasiam bruk palih ruah angaok mac meng harei 17/6 tal harei 21/6. Meng harei 2/7 tal harei 14/7/2026, anek saih tut angan, pasiam veik bruk palih ruah tui hatai caong khin. Harei 10/7/2026, sang bac ngak brei lagaih, ba tabiak tanut diem tui harak ho so palih ruah saong diem mek tame di angaok online saong blah website dien tu. Meng harei 13/8/2026, anek saih hu khan brei thau palih tame mbang ka sa.

UBND tinh An Giang caong khin buh jien tame 3.700 ti dong ngak rilo danak dak, ar kraong ribaong pacang glut jaleih, ar tathik saong anek ribaong di dom labik mbuan glut jaleih. Ini lac jalan piah caga dahlau, pasiam bruk glut jaleih, takik rah tabiak bala ka manuac urang saong drap ar, rik tame khik danak dak ribaong kraong saong tani tanat raidiuk bhap bini. Meng thun 2024, hu 56 labik kraong ribaong kuhria abih atah labaih 181.400m. Dom mbang glut jaleih  ngak jhak tal yaok rituh baoh sang bhap bini brei panduan ba samar chip.

Page ini, di Sang Pakacah padhih di Sang bac Dai hoc Nong Lam TPHCM peih pakak dom mbang pakacah yai Futsal HDBank Sinh vien daok bac dalam Ban raya HCM thun 2025. Dalam 9 harei pakacah, urang mai mong iek 20 mbang pakacah biak catang di Sang Pakacah padhih the thao di Sang bac Dai hoc Nong Lam TPHCM. 12 kapol sinh vien naih joi di TPHCM tame pakacah piah duah thau thei naih joi. Dom mbang pakacah hu rayo papar sap peih tapak di online VOV Live, VOV Futsal saong rilo ha tang so di Rayo sap ndem Viet Nam, brei ka urang tui iek.

Harei roya Oóc Om Bóc - Pakacah ghe Ngo Cần Thơ thun 2025 daok peih ngak di ban Can Tho. Ini lac bruk ilamo daok mong akaok saong caik hatai di Bhap bini, njauk ndem tal lac bhap bini Khmer dom tinh, ban di Bhum taneran kraong Cuu Long.  Hu mbaok tame harei roya ini tauai damuai hu ba drei tame dalam chreih chrai Pakacah yai vak ghe Ngo, mbang kamang ngak meng padai meda bingi abih, tapa nan hu thau  dom ilamo siam gheih di Bruk pakacah ghe Ngo - Sa ilamo oh mboh di meta pakat dunya.

Rajaei Thai Lan brei tapa danak dak kuhria jien sre 122 ti Baht, sumu labaih 3,7 to dola piah daong 3,4 trieu bhap bini ngak mbang duah jien tame saong hu mesre veik phun jien piah ngak mbang. Danak dak nan pamong tal ngak hu siam dom bruk yau: trun ndua nong sre saong pacang caga bruk tavak sre oh bayar hu; pasiam veik saong peih praong jitvu jien padai di karja; meng nan rik tame pamedeih veik, jhul pakhang bruk cakrok patagok kinh te - xa hoi.

Dom manuac daok negar karei mai ralo ba tal raidiuk di rilo bhap bini Australia kan kandah ralo dalam bruk jien blei sang glong saong sang papah chiat tagok rilo mbang. Yau nan ye, rilo bhap bini taneh ia ini caong khin pacang takik brei urang negar langiu tame mai. Yau nan min, bruk patagok di kinh te Australia pambak tame urang negar langiu. Urang tame mai ba tui urang ngak bruk ka dom gah yau gah raong glang pala drak, jitvu sang daok, duk iek prein yawa. Yau nan ye, karja Công đảng Australia daok kham merat ngak brei sumu bruk ngak mbang kinh te saong njauk hatai bhap bini.

Bhap bini rahra di Dải Gaza daok dang anak huac rilo hadei bruk mesruh metak biak khang dui atah di Israel. Dalam nan, uranaih Gaza lac manuac gaok rilo kan kandah pandik pandua biak trak. Rilo adei ndik lipei mboh huac, me-ik tabiak, sahaneng ban glai ban glo atau oh thau gait gah. Dom urang ilamo gah tam than di Kapol Trăng lưỡi liềm đỏ Palestine khan lac, uranaih Gaza urak ini daok kurang rilo yau ye: pandap mbang, ia menyum, labik daok saong khan ao ngui cuk. Khol uranaih oh lac iek lapa bo daok diuk rai huac duh hatai.