Harei kabroi, di Mblang bein Negar Ba Đình rah tabiak Danak dak dieu binh, dieu hanh pahadar 80 thun Katmang bilan Dalipan saong Harei Bangsa Negar 2/9 hu mbaok di labaih 30.000 urang. Banah dieu binh, dieu hanh lac bruk parang iek seni nghe thuat salam uan hu mbaok di 80 urang nghe si naih gheih di grauk labik dalam Negar. Harei pahadar sa mbang tra brei mboh bruk siam gheih di Katmang bilan Dalipan saong Harei Bangsa Negar 2/9; bruk nan pachreih hatai, glo akaok, salih bahrau khang kajap, oh padeih hadah krah, kham merat padang sa Viet Nam patagok taong abih gah, karo kajap dalam jaman uak drei patagok.

Dalam bruk bui sambai di harei Raya Tet Bebat, harei kabroi, mikva dom bangsa di tinh Dak Lak daok di mbon palei Bông, phuong Buon Ma Thuot hu pataom gilac di sang akaok mbon palei piah tui iek papar binguk tapak harei dieu binh, dieu hanh meng Mblang bein Negar Ba Đình, Ha Noi. Meng mbon palei Bông, mikva dom bangsa di Dak Lak payua hatai anit ranam Taneh ia, jie tame Ndang, Karja saong kham merat gul pataom padang mbon palei dak harei dak trei sir, sron mbon, gam haong bruk bui sambai dalam harei raya praong di bangsa negar.

Tinh Vinh Long peih bruk alin pandap di bingun Harei Bangsa Negar 2/9 ka rahra, ba mai bruk bui sambai, chreih chrai di bhum palei, abih di nyu nan lac di dom labik hu rilo mikva urang bangsa Khmer diukrai. Pandap alin hu makna ini brei mboh bruk sangka di Ndang saong Karja piah daong prein veik ka rahra. Di dom sang ilamo di puk palei, mikva pataom ginup, thei thei jeng bui sambai, chreih chrai. Dom urang dalam Kapul alin pandap ngak bruk gam gam dalam rilo tukvak, abih tung tian piah daong ka mikva.

Malam kabroi, yaok pluh ribau urang di Ban raya Ho Chi Minh hu kham merat tram di hajan piah maong iek phao bangu saong seni nghe thuat di 3 labik dalam ban. Bruk ini oh lac pahadar 80 thun Harei Bangsa Negar bo daok brei mboh sa raya praong akaok meti hadei pagam Ban raya Ho Chi Minh, Binh Duong saong Ba Ria – Vung Tau. Danak dak seni nghe thuat siam gheih “Patuk bebat” hu padang peih ngak praong prang di klau labik dalam ban, pambuak dom labik Ban raya Ho Chi Minh, Binh Duong saong Ba Ria – Vung Tau (dahlau diah).

Tinh Dong Nai jeng padang danak dak seni nghe thuat saong cuh phao bangu salam uan pahadar 80 thun Katmang bilan 8 jak jeng saong harei Bangsa Negar 2/9. Danak dak seni nghe thuat hu 3 danak dak brei mboh veik sajarah bangsa negar, ka bruk patagok di bhum taneh Dong Nai saong Binh Phuoc klak saong tinh Dong Nai dalam jalan bahrau.

Biar harei kabroi, harei puac abih di mbang padeih padei harei Bangsa Negar, dom mblang tapen dalam Ban raya Ho Chi Minh yau ye tapen gilai bha Cát Lái, mblang radaih Miền Đông, kapal  ahaok par Tân Sơn Nhất biak laneing lanoi. Dom urang gilac mai ban raya hadei mbang padeih padei harei raya hu nao mai mbuan lagaih. Yaom lac tatua Bình Triệu 2 njauk dui ganik veik sa jalan piah ka radaih oto meng dalam pasak tabiak, dom radaih tapa tatua jeng hu nao mai tani tanat. Dom radaih meng gah Kreh Negar saong Tay Nguyen pajeng tuai tame mblang radaih palao tuai samar drah.

Ngoai truong My Marco Rubio hu panuac tadhau ayuh rajaei saong rahra Viet Nam di Harei Bangsa Negar 2/9. Ngoai truong My brei mboh hatai chreih takre ka bruk karo kajap, hatai kham merat saong dom jak jeng mek hu di rahra Viet Nam. Di bingun sajarah ini, Ngoai truong Marco Rubio brei mboh veik bruk pagun sanya di My piah patagok bruk pambuak gauk di dua negar saong ba gauk jhul tagok bruk sron mbon, ginup meda saong an ninh ka rahra My saong Viet Nam jeng yau ka labik An Do Duong – Thai Binh Duong.

Nyaom biai pakat glaong Peih bruk Pambuak Thuong Hai (SCO) bahrau rah tabiak di Thiên Tân, Trung Quoc. Dom urang pan akaok hu pataom gauk nyaom biai dom asal kadha samar chip di labik saong dunya, gam haong nan yasa dom jalan ngak jhul tagok pambuak bruk rilo gah dalam dom banah hu makna. Dom negar dalam kapul pamaong tal padang labik ngak kinh te haong gauk, yasa adat di hai quan, jhul tagok ky thuat so pablei salih saong patagok saong “hanh lang hijao” pambuak bhum.

Japon brei ba tabiak bruk panduan samar chip ngan haong labaih 23.000 baoh sang rahra, dalam nan hu labaih 46.000 urang, piah pacang caga bruk mbuan glut jaleih taneh saong ia sua gluh baok. Dalam nan, ia sua ngak ka 6 urang metai, 1 urang lahik, daok pandiak bhang ngak metai 110 urang. Bala jeng ngak jaik 10.000 danak dak khut tayah, yaok rituh ribau hecta phun pala njauk khut tayah, khat lahik truh tapa atah 2 ty USD.