Uy mban Bhap bini tinh Dong Nai bahrau ngak bruk haong dom gah hu pambuak tal jalan padang tatua atau jalan labang Cát Lái tapa kraong pambuak haong TPHCM. Ini lac danak dak pdang tatua piah nao tapa kraong salih ka gilai bha Cát Lái dalam dom thun tapa. Di mbang nyaom biai, kapul hu ndom biai ba tabiak 3 jalan ngak salih ka gilai bha Cát Lái piah ruah, dalam nan hu: padang tatua, padang jalan labang saong labang paghueh tapa kraong. Danak dak ini biak hu yaom glaong dalam bruk pambuak jalan mbak di ban Thủ Đức - TPHCM haong huyen Nhơn Trạch, tinh Dong Nai. Abih di nyu nan lac, tuk mblang kapal ahaok par Long Thành hu ba tame pandar, danak dak ini klah rabha radaih nduac meng TPHCM tal mblang kapal ahaok par Long Thành saong gilac veik.

Sang bac du bi Ndai hoc Bangsa Trung uong lac sang bac pato pabak ilamo dahlau tuk pakacah tame ndai hoc bangsa praong abih di nagar. Thun 2023 - 2024, bruk pato magru du bi ndai hoc hu patagok sumu 99% dom anek saih ginup tui bruk ba tabiak piah palih ruah tame dom sang bac ndai hoc; dalam nan hu 50% anek saih palih tame tapak dom sang bac Ndai hoc tui hatai caong, ralo anek saih hu palih tame dom sang bac gah An ninh, Bol lin, Ye te meng di tanut pakacah tamat THPT…

UB Bhap bini TPHCM bahrau peih ngak Harei ba tabiak saong jao yai thuong ka labaih 80 kadha krah hadah hu mbaok tame Mbang jak ba paneh saong dak padang, yaih khan dom kadha akayat, nghe thuat kuhria tal harei pahadar 50 thun Harei Peih paha gah Meraong, yasa taneh ia (30/04/1975 - 30/04/2025) haong angan “TP.HCM - 50 thun hadah mbaok hadah medah”. Mban peih ngak hu ruah saong jao yai thuong ka 83 kadha daok dalam 8 gah hu brei pakacah. Rilo kadha mek hu yai lac hu yaom kaom ka sahaneng, nghe thuat glaong; brei mboh caong takre khang kadang ka TPHCM patagok glaong bahrau dalam harei hadei.

“Harei pataom yulit – Malam palao gom hadah Ninh Kieu, Ban Can Tho mbang ka VII thun 2024” hu peih pakak meng malam kabruai 30/12. Ni sa guan piah dom doanh nghiep, labik ngak saong pablei salih pandap pandar, yitvu dalam saong langiu Ban Can Thơ yaih khan pambak praong bruk jitvu, yulit piah pachreih tuai damuai mai jirah rivang bhum palei. Tapa di nan, paglaong jalan sahaneng di bhap bini thau ka dom kein laba patagok kinh te, ilimo, xa hoi, jirah rivang, dak harei dak hu padang thaok binguk, hu angan je yulit Ninh Kieu – Ban Can Tho ngak ka tuai damuai dalam saong langiu nagar thau tal.

Urak ini, ia mbak daok njom samar tame dom kraong praong di tinh Ben Tre. Bruk ini rah tabiak biak srau kadau tui tanut ia tagok saong pakat angin, abih di nyu nan lac ngan haong dom bhum taneh atah di pabah kraong meng 46 - 53km ba trun daok gaok kan kandah. Dom balai pabak ia pandar gaok njom mbak ngak kan kandah tak raidiuk di rahra. Bruk njauk duh hatai abih di tinh Ben Tre lac tuk ia mbak njom tame dalam lac dom jalan kraong, ribaong oh ka hu bineik, ia mbak tagok biak samar saong pambak praong tabiak.

Tong thong Philippines hu mbaoh harak gilang pariak nagar buh tabiak 6 ribau 330 ty peso, kuhria tui sumu 109 ty ndo la My ka thun 2025, glaong jang 9,7% dut haong gilang pariak thun 2024. Dalam harak pathau khan, Tong thong Philippines mayai lac gilang pariak ni sanya buh tame ngak ka dom yitvu xa hoi, pato magru saong y te, ngan haong nan hu daong ka dom caong hatai patagok co so ha tang makna praong glaong saong daong ka gah ngak nong.

Trieu Tien ndom lac brei peih ngak jalan “khang kajap abih” piah mariak pacang caga haong Mỹ, pacang khik kein laba di negar dalam bruk cuang kandah glaong tagok. Akaok negar ong Kim Jong Un mboh lac Mỹ - Japon - Han Quoc hu patagok jeng sa “bol lin hat nhan”. Ong puac ka Han Quoc tuk negar ini lac sa labik sa taneh ia piah meraik haong Trieu Tien dalam jalan ngak di Mỹ. Trieu Tien brei pandar dom jalan ngak “khang kajap abih” piah pacang khik kein laba an ninh saong negar anak di Mỹ./.

Hu takik abih 71 urang matai di Ethiopia dalam kayua bala rah tabiak di harei kabruai tuk sa sruh radaih pajeng bak tuai damuai nao tapa tatua blaoh laik trun kraong. Bala jalan ngaok thu bhian mboh di Ethiopia kayua nagar ni hu tieu chuan peih radaih biar, radaih saong jalan mbak oh hu sangka tani tanat. Thun 2018, takik abih 38 urang matai tuk sa radaih buyt laik trun di ceik gah Barak.