Dom gah pambuak bruk di dunya  hu sanya daong labaih 13 trieu USD daong ka Viet Nam pasiam veik hadei ribuk ka 10, 11, 12, 13 saong ia sua hadei ribuk. Tui Cuc Khik iek ar ribaong kraong saong Pacang bala meng langik, sa lo ndap nda daong Lien minh chau Au (EU) hu pajeng ba mai mblang kapal haok Noi Bai, hadei di nan ba tal tinh Dak Lak piah daong ka bhap bini gaok ribuk ia sua. Kaya daong di EU hu: 138 ndap nda pandar dalam ging, 150 tamra, kuhria tui jien labaih 75.660 euro.

Meng harei 16 tal 19/11, di tinh Gia Lai ( Bình Định klak) hu hajan praong dui atah, labaih 19.200 baoh sang bhap bini dauk dalam ia labaih 1,5 met, rilo labik ia dauk meng 2 tal 3 met. Hajan ribuk ngak khut tayak sang danaok, drap ar, phun kayau, njam patam, ribaong, binek, labik ngak mbang pala drak; tui kuhria camreip labaih 1.000 ti dong. Piah samar tani tanat raidiuk, UBND tinh Gia Lai kham daong samar ka dom baoh sang kathaot, jaik kathaot saong dom baoh sang biak kan kandah dalam mbang ribuk ia sua ini yaok baoh sang 2 trieu dong sa bilan saong daong dalam 3 bilan.

Daok tinh Dak Lak (tinh Phu Yen dahlau diah), ribuk ia sua mbang ini hu 4 urang lahik, 11 urang metai, hu 33.630 baoh sang ia dauk. Dom bhum palei brei panduan bhap bini rahra nao labik karei hu salamat. Ia ribuk daok tagok veik meda hu rilo baoh sang ia dauk veik. Jalan mbak nao mai khut tayak hu rilo jalan glut jaleih, ra-ai.

Piah ba mbuan lagaih ralo ka urang ngak hu tame ngak bruk di danak dak mblang kapal ahaok pakat negar, Hoi dong palih ruah urang ngak di Mblang kapal ahaok dunya Long Thành taduan harak ho so palih ruah tal harei 21 bilan 11. Urang ngak hu palih ruah tame ngak bruk  hadah krah sami samar, ilamo, ndem meyai sap negar langiu, hu kuhria daong ginup kein lagaih, jien bilan glong saong hu pato pasram, bac megru lagaih haong bruk ngak. 

Meng akaok thun tal ini, tinh Dong Thap rah tabiak labaih 6.380 uranaih gaok bala; dalam nan hu 17 adei blung ia saong labaih 6.100 adei gaok bala karei. Anak bruk nan, gah chuc nang jhul pakhang bruk pathau khan, paglong jalan sahaneng ka bruk mbuan gaok bala; peih dom tal pasram caluai ia ka uranaih piah hu salamat. So Y te  jeng jhul pakhang bruk peih dom tal pato ka amaik ame, urang raong ba uranaih ka bruk mbuan gaok bala saong mblung ia; dom jalan pacang caga.

Indonesia  khan kakei dahlau ka ceik pui Semeru tagok pakat glong abih saong panduan ba bhap bini  nao labik karei, hadei dom mbang pruh bau apui panjiak pambak praong 8km saong pambuk bau glong 2.000 met meng pabah ceik pui. Jabat chuc nang brei panduan ba bhap bini di dom labik mbuan gaok bala. Karja kakei dahlau ka bau apui pruh meda praong veik tal 13km, nduac tui kraong ia saong labik biar meng tabung ceik.

Gah Y te Dunya ( WHO) daok dang anak bruk cakak trun ralo abih urang ngak bruk oh ka bhian mboh meng lavik mai. Tui bruk ba tabiak, tal kreh thun 2026, WHO cakak trun jaik 25%  urang ngak  bruk di dunya, sumu labaih 2.300 bruk ngak. Bruk ba  lac kurang jien ralo, kuhria khin hu tal labaih 1 ti USD dalam tukvak meng thun 2026 -2027. Bruk Mỹ tabiak truh sarak dom taneh ia daong ngak pahala ngak kurang jien biak ralo, ba tal WHO ngak takik veik.

Tong thong Madagascar, ong Mickael Randrianirina khan lac gah chuc nang duah mboh patau intal - ngọc lục bảo praong 300kilo di medil tong thong ban ine taneh ia ini. Urang ngak praong di Madagascar khan lac patau intal hijao praong nan pablei piah mek jien kadung di taneh ia. Tal tukwak ini, bruk ba tal dom gah chuc nang Madagascar duah mboh patau intal hijao di medil tong thong lac bruk daok kandauk oh thei thau./.