Mentri Ngak nong saong Patagok palei pala pambuak haong UB Bhap bini tinh Bac Lieu peih bruk ginum biai haong mbao chi ka bruk peih ngak Festival bruk ngak Sara Viet Nam – Bac Lieu thun 2025 “Adhua 100 thun bruk ngak sara - Rai manuac” ngan haong kadha “Pok glaong makna asal sara Viet Nam”. Festival kuhria peih ngak di Bac Lieu meng harei 06/3 tal harei 08/3/2025. Tapa harei Festival mbang ini lac pok meyaom, khik ramik saong patagok bruk ngak sara meng kan, tapa nan pamedeih hatai anit ranam bruk ngak di uranaih hu ilimo piah hu mbaok tame bruk ngak sara, pablei salih, padak padang jalan mbang birau meng bruk ngak sara. Ini lac sa tukvak piah yaih khan, parang thaot binguk, manuac, siam lagaih, prein khang, pandap panda hadah krah di tinh Bac Lieu mai haong mikva, tuai damuai dalam saong langiu nagar…

UB Bhap bini tinh Ba Ria - Vung Tau bahrau brei angan ka 5 xa mek hu tanut chuan palei pala bahrau kieu mau. Nan lac dom xa: Hòa Long, Long Phước, Tân Hưng (ban Ba Ria); xa Bàu Lâm saong xa Phước Tân (huyen Xuyên Mộc). Tal puac thun 2024, jien mek tame kuhria tui akaok menuac di dom xa ini hu labaih 84 trieu ndong sa urang sa thun; oh daok baoh sang kathaot rilo gah. Mbiah tal ini dalam tinh hu 47/47 xa mek hu tanut chuan palei pala bahrau. Hu abih tih labik pakat huyen hu Thu tuong Rajaei mbaoh tangin ka bruk ngak salah blaoh bruk ngak saong mek hu tanut chuan palei pala bahrau.

Kuhria mboh bilan pandiak(bhang)  thun ini di tinh Hau Giang hu jaik 170.000ha padai saong baoh kayau, raong kaya dalam ia mbuan gaok khat lahik kayua tua riya saong njom ia mbak. Ong Nguyễn Vũ Trường, Akaok UB Bhap bini huyen Long Mỹ, tinh Hau Giang khan brei thau, dalam 10 harei tapa palei pala hu mboh tanut njom ia mbak di ralo labik hu tapa tanut 1,5 ngaok sa rabau, hu tukvak tanut njom ia mbak di ralo labik meng 1,7 - 3 ngaok sa rabau. Urakni grauk huyen hu 42 braong, binek pacang ia mbak, tuk ia mbak tagok tapa tanut 1,5 ngaok sa rabau, bhum palei lac kareik dom braong, binek ini piah pabak ia hacih ka mikva.

Urang nao tasik tinh Ca Mau bahrau salah blaoh mbang tabiak tasik akaok thun taong mek hu rilo ikan hadang, ba mai jien mek tame rilo. Urak ini, mực that hu yaom meng 140 - 150 ribau dong sa kilo, daok janih mực praong hu pablei dalam melam mek hu yaom 300 ribau ndong sa kilo. Bruk tani tanat ini mai meng dom pandap panda daong ka bruk taong ikan hadang hu buh jien tame ngak tani tanat, rilo gilai blei angaok tasik daong khik kajap siam that bingi, tagok yaom kaom kaya tasik. Bruk tabiak tasik akaok thun hu kein lagaih, urang nao tasik Ca Mau hu rilo caong takre tame sa thun bahrau mek hu rilo jak jeng meng tasik.

Mikva Ban Phu Quoc, tinh Kien Giang urakni biak uan tabuan tuk yaom pablei amraik talu tagok glaong, yaom pablei meng 200.000 – 300.000 ndong sa kilo, tagok 20.000 – 50.000 ndong sa kilo tui yaok janih. Amraik talu tagok yaom kayua hu ralo manuac caong blei. Tuai damuai mai ma-in Phu Quoc ralo nan hu caong blei amraik talu piah mbang saong alin hadiah. Tukvak anak tal Kapul Urang ngak nong Ban Phu Quoc daong mikva masre phun jien, hu ralo kein lagaih piah pala saong maong iek, pabak hu ka asal amraik talu, khik kajap mblang taneh pala amraik talu ngaok kaoh pulao.

Tong thong Mỹ Donald Trump kuhria ka bruk pathau khan kuhria jien ikak je tanut 25% ngan haong taong abih dom pandap kaya thép saong nhôm hu blei tame negar Mỹ, dalam nan hu Mexico saong Canada. Tong thong Mỹ ndom lac, yaok janih thép saong nhôm halei hu blei tame negar Mỹ jeng hu ciuk tanut jien je 25%. Dalam 2 harei anak tal Tong thong Mỹ jeng kuhria khan brei thau tanut jien je daong gauk “hu nao hu mai” haong dom negar taong jien je pandap panda Mỹ saong bruk kuhria jien je ini hu ba tame pandar jaik tuk nan chip.

Tong thong Prang Emmanule Macron kuhria buh jien 109 ty Euro (sumu 113 ty ndo la My) tame dom danak dak tri tue nhan tao (AI). Tong thong Prang khan brei thau, Phap lac nagar ginup mada ka 5 di dunya gah AI, min daok tadhun atah dut haong My saong Trung Quoc. Kayua nan, Prang kuhria buh jien tame dom danak dak AI dalam dom thun anak tal. Ini lac bruk ngak salih praong di tukvak jaik yam tame mbang nyaom raya tabung glaong AI grauk dunya peih ngak dalam dua harei 10 - 11/2.

Rilo labik y te di Japon daok rah tabiak bruk kurang biak ralo vaccine pacang caga ruak sởi saong rubella. Ini lac bruk ba tal jalan kuhria ka bruk klauk jru caga di rilo labik brei tayah klak atau brei takik veik. Amuk Kawakami Kazue, Yam ndok Kapuk Y khoa Tokyo ndom lac: Dalam labaih 10 tapa, Japon hu rah tabiak bruk kurang rilo janih vaccine karei gauk. Kayua nan, rajaei oh lac brei ngak meng dom jalan ngak samar chip, khik kajap hu gah pabak jru piah langyah bruk ini, bo brei ba tabiak jalan langyah suai atah./.