Mesup ni  (25/10) di Hà Nội, Pasak  peih bruk pablei salih ngak nong, Mintri ngak nong song patagok palei pala peih  họp báo ka drak pasa palei ngak song pandap  OCOP Việt Nam mbang ka 18 song Harei pataom pakacah pandap  thủ công mỹ nghệ Việt Nam thun  2022. Ni lac 2 bruk ngak prong di  “Festival Palei ngak  Việt Nam thun  2022”, piah yaih khan, pok meyaom dom palei ngak meng kan, dom nghệ nhân, jang ngak gheih hu pandap siam, yaih khan dom bruk di palei ngak, labik ngak siam gheih dalam negar. Taphia di nan, yaih khan danak dak yaok xã sa pandap (danka dak  OCOP), pambuak bruk pablei  pandap OCOP; pachreih urang tame ngak mbang, pachreih patagok prein khang gah ilamu du lịch song bruk ngak palei pala.

UBND tỉnh Ninh Thuận hu harak payua Sở Ngak nong saong patagok palei pala ieu pasang iek, langyah bruk ra-ai talah sang bhap bini meng ngak binek gah ala kraong Dinh. Tui nan, Sở Ngak nong saong patagok palei pala peih bruk pasang iek, hu jalan khik kajap salamat ka dom sang bhap bini saong taduan duas meyah caik rah tabiak bala. Gam haong nan, pachreih ba bruk bayar jien daong pasiam veik sang daok ka dom baoh sang nan, ngak salah dalam bilan 10/2022. Tui Chi cục Thủy lợi tỉnh Ninh Thuận (po ngak binek di kraong Dinh), abih tih yaom jien daong mbang ini, lac labaih 1 tỷ 200 triệu đồng. 

Di Bình Thuận, Sở Ilamu, Thể thao song  Du lịch tỉnh peih mbaok Nyaom drak pasa  du lịch online thun  2022 song brei thau danak dak pachreih bruk du lịch thun 2023. Rah tabiak meng harei  24/10 tal harei  28/10, Nyaom drak pasa  Du lịch online  Bình Thuận thun  2022 piah ngak jeng jalan khau tin, pambuak công nghệ 3D bahrau, brei adat ka doanh nghiệp du lịch, lữ hành, tuai du lịch hu peih sa binah atau tong abih bruk pablei salih atau  pabak  dịch vụ du lịch, meng parang iek, yaih khan pandap, dịch vụ tal bruk mbaoh tangin pambuak bruk, pabak song bayar jien. Hu mbaok di nyaom drak pasa hu labaih  100 jabat peih bruk du lịch song  doanh nghiệp dalam taneh ia.

Mesup ini (25/10), Tòa án bhap bini tỉnh Đồng Nai peih mbang langyah camereip dom kol dalam jalan talei pablei salih pandap pakauk, pablei xăng ja biak praong. Mbang langyah tui kuhria dui atah meng 45 tal 60 harei. Tapa pasang iek, duah thau mboh lac, meng bilan 3/2020 tal bilan 2/2021, kol nan pajeng ba labaih 198 triệu lít xăng lậu, yaom jaik 2.800 tỷ đồng. Pambuak tal bruk nan, sa urang jakar Tổng Cục Hải quan mbang jien 10.000 USD, 500 triệu đồng, 1 thẻ ATM hu jien dalam nan lac 100 triệu đồng. Langiu di nan, hu dom urang dalam gah Cảnh sát tasik haong Bộ đội biên phòng jeng gam tal bruk mbang jien hối lộ.

Hadei di jiak 5 bilan tabiak panuac lac abih jit, jit tả pabui  châu Phi di  Trà Vinh daok tamuh veik, 300 drei pabui brei am cuh song jit dok rah tabiak srau kadau. Sở ngak nong song patagok palei pala tỉnh brei thau, meng hadei di tuk mboh tapol pabui ruak, hu panuac tacei Chi cục rong glang song  Thú y pambuak bruk song karja palei pataom tame pacang jit; dong ka sang rong am cuh; peih bruk puh ramik, pametai anek ruak di labik rong, patrun njom mbak. Kuhria ta-eng mbang jit meng bloh, Trà Vinh hu  156 sang di  28 xã hu tapol pabui njom ruak jit tả pabui châu Phi. Gah chức năng brei am cuh klak jiak  4.000 drei pabui, tong abih tih trak jiak 238 tấn.

 Ong Rishi Sunak, umo 42 thun, lac thủ tướng Anh ranaih umo di abih urak ini, jeng lac urang klaik sambo camereip abih pan akaok Negar Anh.  Khau tin meng negar Anh brei mboh lac ong Sunak, anek likei di sa baoh sang mai meng India, lac menuac tapa mbaok rilo kỷ lục dalam sajarah chính trị negar Anh urak ini. Sa kadha njauk caik hatai brei mboh bruk chính trị chreih chrai di negar Anh lac bruk ong Sunak jeng thủ tướng ka 4 patui gauk bo oh tapa tổng tuyển cử.

Nga khan lac taong tame dom gilang menyek di bol lin Ukraine, dalam nan hu labik hu labaih 100.000 tấn xang kapan haoh. Dalam 2 adit tapa, gah Ngan gam gam tong tame dom  labik hạ tầng năng lượng Ukraine. Mintri Năng lượng Ukraine brei thau Nga peih labaih  300 mbang  tong tame dom labik  năng lượng di Ukraine meng harei  10/10, ngak ka 30-40% cơ sở hạ tầng điện dalam negar njauk khut, tayah. Gah Ukraine hu panuac ieu bhap bini takik pandar pandap điện song khan lac mbuan si lahik điện di rilo labik praong.

Truyền thông đối lập di Myanmar harei 24/10 brei thau, takik di nyu 30 urang metai dalam mbang không kích di bol bala Myanmar pamaong tame sa mbang hòa nhạc di bang Kachin, gah barak negar ini. Min bol bala Myanmar oh ka ba tabiak panuac halei ka bruk ini. Kuhria meng hadei di bruk srau kadau di bilan 02/2021, bruk taong paoh, mesruh gauk rah tabiak srau kadau di Myanmar. Rilo tapon pan phao kraong cagar veik hu padang tagok saong patagok bruk ngak, nan ye karja quân sự Myanmar njauk patagok dom bruk kateik greik piah padang saong khik quyền pasang iek di drei./.

Urang lang: H.Pha & M.Phuong