Rajaei birau ba tabiak sarak pabak dom asar kadha pasiam veik dom bruk gah taong chap ikan. Tui nan, tang phat meng 500 trieu dong tal 700 trieu dong ka bruk oh tavak tame tapuk taong cap ikan ia tathik atau tavak oh njauk haong bruk ba tabiak di kapol nyaom taong chap ikan di bhum tathik. Phat jien meng 80 tal 100 trieu dong ngan haong po gilai saong urang peih gilai praong atah meng 24 m tagok chap mek ikan di labik tapen ar saong labik atah ar tathik meng 6 hai ly tal 24 hai ly.

TPHCM daok jak ba urang buh jien tame peih ngak sumu gauk 6 jalan metro, kham merat ngak salah dahlau di thun 2030 piah ngak siam ka jalan mbak do thi. Brei panuac di var ginum biai haong Mban khik iek jalan pasei do thi TPHCM birau ini, Bi thu Thanh uy TPHCM Trần Lưu Quang kakei lac brei ngak dahlau labik daok tui yaok danak dak. Dalam tuk bhap bini ramik nao bo labik padang sang daok birau oh ka salah, ban raya brei daong jien pah sang.

Ngan haong bruk patagok ha tang so, tinh Vĩnh Long kham merat tal thun 2030 so balai 5G papar riyak hu labaih 50% dut haong balai 4G daok papar riyak; 70% bhap bini rahra praong bak dam bak dara hu mbaoh tangin taka so atau huroh mbaoh harak dien tu. Piah ngak siam bruk nan, So Ilamo kong nghe Vĩnh Long, caong khin langyah got talei cap mblieng, mbon jaleih; cáp, talei cap cadu trun, ramik pasiam bruk oh mekre meta di ban do thi, khik brei salamat jalan mbak saong salamad ky thuat.

Hajan ribuk ia sua di Gia Lai daok rah tabiak kan thau dahlau, piah khik brei salamat ka bhap bini, Jabat  Thuong truc Pacang caga bala meng langik di tinh Gia Lai brei khan samar chip. Urak ini, ia di dom kraong di Gia Lai  daok tagok samar, abih di nyu lac kraong Hà Thanh saong krong Kôn. Karja bhum palei caong khin bhap bini nao tal dom labik salamat, abih di ngu lac di dom bhum mbuan rah tabiak bala di huyen Tuy Phuoc dahlau saong Ban Quy Nhon dahlau diah. Page ini, rilo jalan saong labik daok di bhap bini dalam dom phuong Quy Nhon, Quy Nhơn Bắc saong xã Tuy Phước gal tavak kayua ia ribuk sua glong tal sa met.

Hajan ribuk meng blaoh di tinh Khanh Hoa ngak 10 urang metai, dalam nan hu 6 urang dalam mbang glut jaleih jalan ceik Khánh Lê, 2 urang lahik, 19 urang njauk rambuac. Tui yaok kuhria oh ka ginup, hu 9.000 baoh sang di 14 xã, phuong dauk dalam ia. Glut jaleih taneh di ralo labik, pataom tame dom labik ceik, cakak jalan saong ngak kan  kandah tal taong abih bhap bini…Langiu di nan daok khat lahik rilo drap ar, jalan mbak, danak dak karei.

Canh sat Indonesia duah mboh ka kapol nyaom di gah khung bo pambuak nyaom Karja Hoi giao IS, palih ruah uranaih online dalam thun tapa. Bruk palih ruah angaok mang xa hoi, ma-in game saong dom tin nhan ma hoa, brei kol kanjiak jhak hu taom gaok uranaih kandauk saong brei ka dom uranaih bac dom asar kadha kanjiak. Kol nyu dui ba dom uranaih tame kapol khung bo saong pato ka dom adei ngak bruk khung bo.

Han Quoc birau khan ka bruk pachot pagat tapa mang dak harei dak rilo dalam bilan  blei pandar online, njauk ndem tal harei suk Black Friday jaik tal. Di Han Quoc, bhap bini mbuan gaok pachot pagat, hu 81% dom urang oh thau cambaic laic blah web pachot pagat. Dom urang an ninh mang khan lac, dom bruk padang tabiak blah web pagat mek angan dom kaya chiat jien, iew urang khan brei thau khaw tin di drei atau pagam phan mem pagat.

Page ini, di ban Oita, gah Tây Nam di negar Nhật Bản, sa bala paui khuah praong di labik daok bhap bini, mbang palai 170 baoh sang saong dom danak dak karei. Labaih 170 urang  brei panduan ba nao labik karei. Sa ong taha umo 70 thun, daok lahik hadei bruk nan rah tabiak. Karja tinh Oita brei pandar hukum daong bala ka ban, brei karja pakat negar saong tinh bayar jien karei karei, dalam nan hu jien pah labik daok ka bhap bini./.