Gilang paraik Công thương Việt Nam (VietinBank) bahrau ba tabiak paok jien brei masaiy 5.000 tỷ đồng ngan haong jien laba bier jang tal 2% sa thun dut saong yaom jien laba bhian mboh, brei ka doanh nghiệp ngak mbang pablei salih pandap tame tabiak negar, labik ngak mbang, pablei salih atau dom bruk ngak dalam gah ngak praong di Bhum taneran kraong Cửu Long yau ye: kaya tasik, padai brah, ngak nong, pandap panda ngak nong, pandap mbang dalam bruk raong glang, ngak glai… Sarak ini piah daong prein saong nao gam haong doanh nghiệp dalam tukvak pasiam veik saong cak rok patagok.

Ravang saong tadhau ayuh Giám mục Chánh tòa Giáo phận Long Xuyên Trần Văn Toản di tuk uan Noel 2022 saong thun bahrau 2023, Bí thư tỉnh ủy An Giang Lê Hồng Quang caong lac Giám mục Chánh tòa Giáo phận Long Xuyên Trần Văn Toản jeng yau dom Giám mục, Linh mục Tòa Giám mục Giáo phận Long Xuyên daok patui jalan tacei pato dom Linh mục, dom urang pan bruk agama, urang Katolic patagok bruk anit ranam taneh ia, nao gam haong bangsa, patui bruk buh prein tame haong Đảng bộ, karja saong bhap bini padang ngak An Giang dak harei dak siam mekre, kaya meda.

Uan Noel thun 2022 tỉnh Sóc Trăng hu peih mbang taom mbaok dom linh mục, mục sư, nữ tu Công giáo, Tin lành di dalam tỉnh. Urang par akaok tỉnh Sóc Trăng brei thau lac, dom chức sắc, chức việc saong mikva Công giáo tuk halei jeng jumpataom gauk, pambuak haong gauk, klaah rabha saong rahra dom bangsa peih ngak siam jalan ngak, sarak di Đảng, hukum di Kanja. Tỉnh Sóc Trăng urak ini hu labaih 64 ribau urang tui agama, dom thun tapa, mikva tui agama công giáo, dom xứ đạo halain hatain rik tame rilo jien padai, drap ar, rik tame harei ngak bruk piah padang ngak palei pala bahrau, rik tame bruk dak padang ngak mbaok meta puk palei dak harei dak siam makre, kaya mada.

Dalam 3 thun lac: 2020-2021-2022, Sở LĐTBXH TP.HCM hu buh tabiak labaih 19,5 tỷ đồng brei ka bruk pacang caga jit ruak COVID-19 saong iek glang urang njaom ruak, taduan urang daok ban glai ban klo dalam bhap bini. Gam haong nan, buh tabiak labaih 1.273 tỷ đồng daong ka urang ngak padeih bruk oh hu mbang jien bilan. Min bruk daong ka bhap bini gaok kan kandah kayua jit ruak COVID-19, tal urak ini bahrau daong hu labaih 88%. Abih di nyu lac hu dom huyện, bhap bini taduan hu jien daong oh ka tal 30%.

UBND tỉnh Bến Tre pambuak haong Gilang paraik ngak nong saong patagok palei pala (Agribank) dhar tỉnh bahrau jao alin 60 baoh sang anit ranam, sang jum pataom gauk ka dom baoh sang sarak kanja, sang kan kathaot, jaik kathaot saong baoh sang gaok kan kandah ka sang danaok di pak ini. Yaok baoh sang hu yaom meng 65-100 triệu đồng, dalam nan Agribank dhar Bến Tre daong 50 triệu đồng sa baoh sang. Dalam thun ini Agribank dhar Bến Tre jeng hu daong radaih cứu thương, jao alin pandap ka sang kan kathaot, sang kan kandah, sang sarak kanja ngan haong yaom jien abih tih labaih 15 tỷ đồng.

Thượng viện Mỹ hu buh phiếu brei tapa danak dak hukum pandar cai tagok tal 1.700 tỷ đô la daong ka rajaei liên bang daok ngak bruk mbiah tal bilan 9 thun 2023. Ini lac danak dak hukum puac abih bo Thượng viện Mỹ mbang 117 brei tapa dahlau di mbang padeih puac thun. Danak dak hukum hu maong lac sa dalam dom jak jeng gah lập pháp dua đảng di karja Tổng thống John Biden dalam 2 thun camereip di nhiệm kỳ.

 Hãng thông tấn negar Triều Tiên (KCNA) ba panuac urang pathau khan di Mintri Ngoại giao negar ini brei thau lac, bruk giao dịch phao ndao ka oh tuk halei rahtabiak di Triều Tiên saong Nga. Mintri Ngoại giao Triều Tiên brei thau lac, khau tin Triều Tiên pabak đạn dược ka Nga lac oh njauk, oh hu yaom glaong piah ndem mayai nao mai saong oh hu lang yah halei. Dahlau di nan, Triều Tiên jeng hu rilo mbang oh njauk gauk bruk taneh ia ini pabak phao ndao ka Nga anak dom cáo buộc meng Mỹ saong dom taneh ia đồng minh.

Tổng thống Philippines bahrau patabiak sarak lac, harei 26/12, sa harei hadei di Noel, lac harei padeih dalam taneh ia. Sarak brei padeih sa harei gilac piah daong ka menuac sia hu tukvak padeih padei haong gauk gar. Dahlau di nan, Tổng thống Marcos hu tabiak sa sarak brei pabak 2 harei lac harei 2/1 saong harei 2/11 tame angan dom harei padeih lễ dalam thun 2023. Sarak ndom lac, njauk pabak dom harei padeih ini piah tui jalan kinh tế học ka harei padeih, tui nan, mbang padeih atah jang meda daong pachreih bruk nao mai dalam taneh ia saong pachreih patagok bruk du lịch”. Abih tih bhap bini Philippines hu 9 mbang padeih atah harei dalam thun 2023./.